Զախարովա. ԱՄՆ-ը և ԵՄ-ը Հայաստանին, ընդամենը, գործիքի դեր են վերապահում՝ նոր մեծ հրդեհ հրահրելու համար

Արմինֆո.ԱՄՆ-ը և ԵՄ-ը Հայաստանին, ընդամենը, գործիքի դեր են վերապահում՝ նոր մեծ հրդեհ հրահրելու համար։ Այդ մասին ապրիլի 18-ին ամենշաբաթյա ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

Ի պատասխան որոշ ԶԼՄ-ների խնդրանքին՝ մեկնաբանելու, որ ապրիլի 5-ին Բրյուսելում Հայաստան - ԱՄՆ-ԵՄ բարձր մակարդակի հանդիպման ժամանակ ձեռք են բերվել ինչ-որ ռազմաքաղաքական պայմանավորվածություններ, եւ արդյոք Մոսկվան տեղյակ է, թե ինչի մասին է խոսքը, Զախարովան փաստել է, որ վերոնշյալը կոչվում է "արտահոսք": "Իսկ ավելի վաղ Երևանում վստահեցնում էին, թե Արևմուտքի երկրների հետ հանդիպումն ուղղված չէ երրորդ երկրների դեմ։ Մենք, հաշվի առնելով վերը նշված գործոնների ամբողջությունը, Հայաստանի իշխանություններից ակնկալում ենք հստակ արձագանք, ինչպես դուք ասացիք, հայտնված տեղեկություններին, իսկ, լավագույնը, դրանց հերքում։ Բայց, ամեն դեպքում, խոսքը պաշտոնական Երևանին է", - ասել է ռուս դիվանագետը։

Նրա խոսքով, միևնույն ժամանակ, Մոսկվայում չեն զարմանա, եթե նշված փաստաթղթում՝ "Building Armenian defense security reselians", ծրագիր, որը ենթադրում է Ռուսաստանի սահմանապահների եւ  ռազմակայանի փոխարինում ԱՄՆ-ԵՄ-ՆԱՏՕ-ի մասնագետներով, ամերիկացիների եւ ԵՄ-ականների կողմից Ադրբեջանի եւ Իրանի դեմ քայքայիչ աշխատանքի ընդլայնում սահմանին, ինչպես նաեւ Հայաստանի կարեւորագույն ենթակառուցվածքի եւ էներգահամակարգի վերակողմնորոշում՝ Մեծամորի ԱԷԿ-ի ապամոնտաժմամբ, իրոք, պարտադրվել է Երեւանին ԵՄ-ի եւ ԱՄՆ-ի ներկայացուցիչների կողմից ապրիլի 5-ին Բրյուսելում կայացած բարձր մակարդակի հանդիպման ժամանակ: "Ակնհայտ է, որ և Վաշինգտոնում, և Բրյուսելում նպատակ են դրել կոտրել Ռուսաստանի և Հայաստանի կապերի ողջ զանգվածը անվտանգության և տնտեսության ոլորտում, խարխլել տարածաշրջանային անվտանգության մեխանիզմները և տնտեսական գործընկերությունը ՀԱՊԿ-ի և ԵԱՏՄ-ի հետ։ Արևմտամետները, ինչպես հասկանում ենք, նաեւ ձգտում են գժտեցնել մերձավոր հարևաններին՝ ի դեմս Ադրբեջանի, Հայաստանի, Վրաստանի, Իրանի, Թուրքիայի և Ռուսաստանի։ Հարավային Կովկասում խաղաղության մասին հոգ տանելու վերաբերյալ ինչպիսի գեղեցիկ խոսքեր էլ որ ասեն, Հայաստանին վերապահվում է միայն գործիքի դեր, որի օգնությամբ ԱՄՆ-ն ու ԵՄ-ն ցանկանում են նոր մեծ հրդեհ հրահրել", - հավաստիացրել Է Զախարովան, հավելելով, որ այ դա հավաքական Արևմուտքը սովորել է անել։ Նրա խոսքով ՝ հաշտեցնել չգիտեն, արյունահեղությունը կանգնեցնել չգիտեն, այլ միայն կարողանում են բորբոքել, հրահրել ու քայքայել։

"Միամտություն է կարծել, թե վերը նշված Արևմուտքի միջոցառումները գոնե ինչ-որ կերպ կբարձրացնեն Հայաստանի պաշտպանունակությունը, կբարձրացնեն նրա սահմանային անվտանգությունը, կապահովեն նրա տնտեսական բարգավաճումը։ Ընդհակառակը, Հայաստանին ցանկանում են զրկել ամեն ազգայինից ՝ ազգային պաշտպանությունից, տնտեսությունից, էներգետիկայից և փոխարենը տալ ակնհայտ անիրագործելի "ճանապարհային քարտեզներ" և այլ անվերջ դեմագոգիա", - կարծում է Ռուսաստանի ԱԳՆ ներկայացուցիչը։ Նա վստահ է, որ հետո, խաղալով և լուծելով իրենց կոնյունկտուրային խնդիրները, արևմտամետները կհեռանան Հայաստանից։

Խոսելով էներգետիկայի ոլորտի մասին՝ նա հիշատակել է Լիտվայի օրինակը, որին ստիպեցին հրաժարվել ռուսական խաղաղ ատոմից, իսկ հիմա Վիլնյուսը ստիպված է կրկնակի թանկ էլեկտրաէներգիա գնել ։ "Ժամանակն ապացուցել է, որ խաղաղ ատոմի ռուսական տեխնոլոգիաներն ամենաառաջադեմն ու ամենահուսալին են աշխարհում։ Եվ մենք պատրաստ ենք հետագայում ևս դրանք տրամադրել Հայաստանին, որտեղ գեներացնող հզորությունների 30% - ը բաժին է ընկնում Մեծամորի ատոմակայանին", - ամփոփել է դիվանագետը։

Ապրիլի 5-ին Բրյուսելում կայացել է Փաշինյան-Բլինքեն-ֆոն դեր Լյայեն հանդիպումը ։ Բանակցությունների սկզբում, մասնավորապես, Եվրահանձնաժողովի նախագահը տեղեկացրել է, որ Բրյուսելը Հայաստանին լրացուցիչ 270 միլիոն եվրո աջակցություն կտրամադրի առաջիկա չորս տարիների ընթացքում ՝ փոքր եւ միջին բիզնեսին աջակցելու, ինչպես նաեւ ենթակառուցվածքների զարգացման նպատակով: ԱՄՆ պետքարտուղարը հայտարարել է նաև լրացուցիչ օգնության մասին, ընդ որում, օգնությունը մի քանի անգամ պակաս է եվրոպականից ՝ 65 մլն դոլար: ՀՀ վարչապետը շնորհակալություն է հայտնել այս մշտական հանձնառության համար, ընդգծել, որ Հայաստանը պատրաստ է շարունակել բարեփոխումները և սերտ հարաբերություններն Արևմուտքի հետ: