Երեթշաբթի, 27 Փետրվարի 2024 17:48

Արմինֆո. Արևմուտքը Հայաստանի հաշվին փորձում է ընդլայնել հակառուսական ճակատը։ Այդ մասին փետրվարի 27-ին լրագրողների հետ զրույցում հայտարարել է ԱԺ "Հայաստան" խմբակցության պատգամավոր, ՀՅԴ ներկայացուցիչ Արմեն Ռուստամյանը։

 

Նրա ասելով՝ Հայաստանի կառավարության գործող ղեկավարն Արևմուտքի և Ռուսաստանի միջև գլոբալ հակամարտությունը փորձում է բերել հայկական հող: Դրանից օգտվում է Արևմուտքը, որն առաջնորդվում է տարրական տրամաբանությամբ.  եթե պատերազմի մեջ ես Ռուսաստանի հետ, ապա պետք է ընդլայնես հակառուսական ճակատը։ <Եվ այդ ընդլայնումն այսօր տեղի է ունենում մեր հաշվին, ինչը աղետալի հետևանքներ կունենա Հայաստանի համար։ Ես չգիտեմ, թե ով այս հակամարտության մեջ ով և ինչքան կկորցնի, բայց այն, որ Հայաստանը կարող է անհետանալ աշխարհի քարտեզից, դա միանգամայն իրատեսական է։ Վաղ առավոտյան, արթնանալով, մենք կարող ենք հանկարծ իմանալ, որ մենք այստեղ չենք", - ընդգծել է ընդդիմադիրը։

 

Նա հավելել է, որ ՀՀ կառավարության 2021-2026թթ. ծրագրում հստակ ամրագրված է Հավաքական անվտանգության պայմանագրի կազմակերպության հետ կապերի խորացման անհրաժեշտության մասին դրույթ: <Իսկ այսօր ամեն ինչ տեղի է ունենում ճիշտ հակառակը: Ավելին, իշխանություններն սկսել են կիրառել "պայմանական սահմաններ" տերմինը։ Հարց է առաջանում. իսկ ԵՄ քաղաքացիական դիտորդական առաքելությունը ինչ սահմաններ է դիտարկում", - ընդգծել է պատգամավորը։

 

Նա նշել է, որ այս ամենի մեղքն ամբողջությամբ երկրի իշխանությունների վրա է։ Ներկայում Ադրբեջանի հետ բանակցություններ, որպես այդպիսին, չկան։ "Մեր դիտարկումները բերում են այն մտքին, որ հայկական կողմն ամեն ինչ անում է Բաքվի պահանջները բավարարելու համար, ելնելով այն տրամաբանությունից, որ "միայն թե պատերազմ չլինի"։ Ընդ որում, նրանք ամեն ինչ անում են, որպեսզի իրենց գործողություններով ու հայտարարություններով երկիրը հասցնեն նոր սպառնալիքների, որպեսզի երկիրը պատրաստ չլինի հակազդելու այդ սպառնալիքներին։ Եվ այս իրավիճակում նրանք հայտարարում են, որ քանի որ մենք անգործունակ ենք, ապա պետք է գնանք զիջումների ճանապարհով։ Այս ֆոնին մեծանում է նաև Բաքվի ախորժակը։ Կարգավորման հինգ պայմաններին գրեթե ամեն օր ավելանում են նորանոր պահանջներ, և այս ամենին վերջ չկա։ Նոր պահանջներ առաջ քաշած Իլհամ Ալիևի վերջին հայտարարությունները դրա վառ ապացույցն են։ Ավելին, Ալիևը հայտարարել է, որ Հայաստանը չպետք է կողքից դաշնակիցներ փնտրի, և Երևանը պետք է դա լավ հասկանա։ Հայաստանի միակ փրկությունը, Ալիևի տրամաբանությամբ, հենց Ադրբեջանն է։ Խաղի նույն կանոններն ընդունել են նաև Հայաստանի իշխանությունները, - նշել է Ռուստամյանը։

 

Նա ընդգծել է, որ Թուրքիայի և Ադրբեջանի նպատակը հայկական գործոնի, հայկական ինքնության բացառումն է: "Մեր ճանապարհն էլ ավելի անանցանելի կդառնա, եւ այն իրենց նման պահվածքով այդպիսին են դարձրել երկրի ներկայիս իշխանությունները", - ընդգծել է ընդդիմադիրը: