Արմինֆո. Վերլուծելով Հայաստանի իշխանությունների գործողությունները՝ կարելի է հետեւություն անել, որ հանրապետությունը
աշխարհաքաղաքական առումով կարող է հայտնվել լիակատար մենության մեջ։ Այդ մասին ԱրմԻնֆո-ին հայտարարել է հայտնի քաղաքագետ Բենիամին Մաթևոսյանը:
Նրա ասելով՝ չի կարելի ուշադրություն չդարձնել այն փաստին, որ երկրում հետևողականորեն, քայլ առ քայլ շարունակվում է գործընթաց, որն ուղղված է ռուսական բոլոր ռազմական կառույցների դուրսբերմանը, սկսած 102-րդ ռազմակայանից, վերջացրած խաղաղապահներով և սահմանապահ զորքերով: "Բառացիորեն մի երկու օր մենք ականատես եղանք ադրբեջանցի բլոգեր Քյամիլ Զեյնալլիին առնչվող պատմությանը, որը Հայաստանում մեղադրվում է ծանր հանցագործություններ կատարելու համար։ Հայկական կողմի հարցմամբ նա ձերբակալվել է, ապա՝ ազատ արձակվել։ Ուշագրավ է, որ հայկական կողմից, ի տարբերություն ադրբեջանական կողմի, որևէ խելամիտ մեկնաբանություն չի հնչել։ Արդյունքում՝ տվյալ քաղաքացին վերադառնում է Ադրբեջան, իսկ Հայաստանում իշխանությունների հետ կապված աղբյուրները ակտիվ արշավ են սկսում ՌԴ-ի դեմ՝ ուղղված ԱՊՀ-ից, ԵԱՏՄ-ից և ՀԱՊԿ-ից երկրի դուրս գալուն։ Այս ամենը լիովին տեղավորվում է երկրից բոլոր ռուսական զինվորականներին դուրս բերելու իշխանությունների գործողությունների տրամաբանության մեջ", - ասել է քաղաքագետը։
Որպես իր խոսքերի հիմնավորում՝ նա հիշեցրել է ամիսներ առաջ Հայաստանի իշխանությունների ներկայացուցիչների կողմից հնչած հայտարարությունները՝ աշխարհաքաղաքական գործընթացներին հանրապետության արտադաշինքային մասնակցության անհրաժեշտության մասին: Հենց այս համատեքստում է Մաթևոսյանը դիտարկում նաև պաշտոնական Երևանի մտադրությունը՝ փոխել Սահմանադրությունը, որում ամրագրվելու է պետության արտադաշինքային կարգավիճակը, ինչն էլ, իր հերթին, հանգեցնելու է ռուսական զորքերի դուրսբերմանը։ "Այս ֆոնին՝ անվտանգության համակարգերի դիվերսիֆիկացման անհրաժեշտության մասին հայտարարություններն, առնվազն, տարօրինակ են թվում։ Մի կողմից՝ խոսվում է ՀԱՊԿ-ից դուրս գալու անհրաժեշտության մասին, մյուս կողմից՝ Ռուսաստանի հետ հարաբերությունների խորացման անհրաժեշտության մասին, ինչը, գործնականում, անհնար է", - ասել է քաղաքագետը։
Նա նաև մտավախություն է հայտնել Հայաստանի անվտանգության առնչությամբ՝ եվրոպացի դիտորդների ներկայության համատեքստում: Վկայակոչելով վարչապետ Նիկոլ Փաշինյանի վերջին հայտարարությանը, որն ասում էր, որ առաքելության խնդիրների մեջ է մտնում, ի թիվս այլ բաների, ռուսական և իրանական զորքերի տեղաշարժի դիտարկումը, Մաթևոսյանը նշել է, որ այդ դեպքում պարզ է դառնում, թե ինչու է Ռուսաստանը դեմ նրանց ներկայությանը: "Ինչ կամ ում են ուզում տեղափոխել Հայաստանով, որ այդպես պայքարում են տարածաշրջանում Ռուսաստանի ռազմական ներկայության դեմ",- հարց է տալիս փորձագետը: Մյուս կողմից, երրորդ ուժերի ներկայությանն Իրանի բացասական արձագանքը նույնպես լարվածություն է ստեղծում։
Արդյունքում, Մաթեւոսյանի կարծիքով, Հայաստանը վտանգում է հարաբերությունները գրեթե բոլոր հարեւանների հետ եւ ամբողջովին միայնակ մնալ։ "Այն գործընթացները, որոնք հիմա տեղի են ունենում, կհանգեցնեն այն բանին, որ Հայաստանը կմնա լիակատար որբ, ինչից չեն հապաղի օգտվել Թուրքիան և Ադրբեջանը։ Այդ դեպքում՝ նրանց մտքում կլինի ոչ միայն Սյունիքը։ Ինչու վերցնել մեկ մարզ, երբ կարելի է տիրանալ ողջ Հայաստանին։ Ադրբեջանն, ի դեպ, առաջնորդվում է հենց այդ տրամաբանությամբ, իսկ պաշտոնական Երևանի գործողությունները բերում են այն բանին, որ Անկարայի և Բաքվի քայլերը կյանքի են կոչվում", - ընդգծել է քաղաքագետը։