Արմինֆո. Հայաստանում հասունանում է սահմանադրական հեղաշրջում, ինչի մասին արդեն անթաքույց հայտարարում են գործող վարչախմբի ղեկավարը և նրա կամակատարները։ Այդ մասին ասվում է "Հայաքվե" նախաձեռնության հայտարարության մեջ։
«Սահմանադրական բարեփոխումների անվան տակ փորձ է արվում վերացնելու հայկական անկախ պետականությունը՝ այն վերածելով Թուրքիայից և Ադրբեջանից կախման մեջ գտնվող կիսապետական ինչ-որ կազմավորման։
«Նոր սահմանադրության» ընդունման նպատակը Հայաստանի անկախության հռչակագրի փաստացի չեղարկումն է, որով սահմանված են հայության ազգային անժամկետ նպատակները, մասնավորապես՝ ազգային հզոր պետության կառուցումը, Հայոց ցեղասպանության միջազգային ճանաչումն ու դատապարտումը, Հայաստանի և Արցախի վերամիավորումը։ Գործող վարչախմբի ներկայացուցիչներն իրենք են խոստովանել, որ այս ամենն անում են Բաքվի և Անկարայի պարտադրանքով։ Փաստացի մեր թշնամիների անմիջական հրահանգով նրանք ցանկանում են ժողովրդի ձեռքով հաստատել հակասահմանադրական կարգ, որը վերջ կդնի հայկական անկախ պետականության գոյությանը։
Այս հրեշավոր գործողությամբ փորձ է արվում զրկելու հայությանն իր պատմական իրավունքներից, մշակութային և պատմական ժառանգությունից, վերացնելու հայ մարդու հիշողությունը և արժանապատվությունը։
Մենք՝ «ՀայաՔվե» նախաձեռնության մասնակիցներս և համախոհներս, հետևողականորեն պայքարել ենք Հայաստանի Անկախության հռչակագրում ամրագրված ազգային նպատակներն իրականություն դարձնելու համար և այժմ վճռական պատասխանատվություն ենք ստանձնում՝ պայքարելու այս հակազգային ու պետականակործան գործընթացի դեմ․ կոչ ենք անում ազգային բոլոր ուժերին և հայրենիքի ճակատագրով մտահոգ քաղաքացիներին միանալու այս պայքարին և թույլ չտալու հայկական անկախ պետականության կազմալուծումը», - ասվում է հայտարարությունում, որի ներքո ստորագրել են «ՀայաՔվե» նախաձեռնությունը, «5165 ազգային պահպանողական շարժում» կուսակցությունը, «Ղարաբաղյան պատերազմի վետերանների միություն» ՀԿ, «Հայրենիքի Վահան» ՀԿ, «Բաբոն Տեր ա» կանանց նախաձեռնությունը:
Հիշեցնենք, որ հունվարի 19-ին ՀՀ վարչապետ Նիկոլ Փաշինյանը հայտարարել է նոր սահմանադրություն ընդունելու անհրաժեշտության մասին: "Հայաստանի Հանրապետությունը նոր սահմանադրության կարիք ունի։ Ոչ թե սահմանադրական փոփոխությունների, այլ՝ նոր սահմանադրության։ Մենք պետք է ունենանք սահմանադրություն, որը հանրապետությունը կդարձնի ավելի մրցունակ և ավելի կենսունակ աշխարհաքաղաքական և տարածաշրջանային նոր պայմաններում", - ասել է Փաշինյանը։
"Ազատություն" ռադիոկայանի հայկական ծառայության հետ հարցազրույցում մեկնաբանելով տվյալ հայտարարությունը՝ ՀՀ ԱԳ նախարար Արարատ Միրզոյանը, փաստորեն, խոստովանել է, որ Ադրբեջանը խնդրահարույց է համարում հանրապետության սահմանադրությունում հղումն Անկախության հռչակագրին, որում հիշատակվում է Լեռնային Ղարաբաղը: "Նրանք բարձրացրել են այդ հարցը, ասել են, որ, այո, դա խնդիր է Նրանք ներկայացրել են իրավական հարցեր։ Մենք էլ, համապատասխանաբար, խնդրահարույց ենք համարել իրենց մոտ եղած ձևակերպումները", - ասել է Միրզոյանը։ Ընդ որում, նա հայտարարել է, որ Հայաստանի և Ադրբեջանի միջև խաղաղության համաձայնագրի նախագծում Բաքուն Հայաստանի սահմանադրության հարցով պահանջներ չի առաջադրել: "Խաղաղության համաձայնագրի նախագծում Հայաստանի սահմանադրության մասին դրույթ չկա։ Այո, ընդհանուր խաղաղության գործընթացում կողմերը իրավական խնդիրներ են տեսնում միմյանց մոտ և բացատրություններ են տալիս։ Նման քննարկումներ դեռ կլինեն։ Ինչ վերաբերում է մեր սահմանադրությանը, ապա այն, բացի ներքին հարցերի լուծումից, ունի ավելի լայն նշանակություն և կարող է ազդել տարածաշրջանային և Հայաստանի եւ աշխարհի հարաբերությունների վրա: Բայց սահմանադրության մասով պահանջ կամ տեքստ չկա խաղաղության համաձայնագրի նախագծում", - նշել է Հայաստանի արտգործնախարարը:
Հարկ է նաեւ նշել, որ դեռևս 2021 թվականին Ադրբեջանի նախագահ Իլհամ Ալիևը հայտարարել էր Հայաստանի սահմանադրությունը վերաշարադրելու անհրաժեշտության մասին։ Թուրքական Anadolu գործակալության հետ հարցազրույցում նա ասել էր, որ հարեւան երկրի հիմնական օրենքի տեքստում "հղումներ կան Բաքվի եւ Անկարայի նկատմամբ տարածքային հավակնություններին": "Թող Հայաստանը ճիշտ ընկալի նոր ձևավորված իրականությունը, քայլեր ձեռնարկի՝ այդ իրականությանը համապատասխան, նայի քարտեզին և իրեն գտնի այնտեղ, եթե, իհարկե, կարողանա", - հայտարարել էր Ալիևը: