Ադրբեջանը շարունակում է ոչնչացնել հայկական հուշարձաններն օկուպացված Արցախում՝ միջազգային հանրության անգործության ֆոնին

Արմինֆո.Արցախում իրականացված ցեղասպանական գործողություններից, էթնիկ զտումներից` տարածքը բնիկ հայերից մաքրելուց հետո, Ադրբեջանը պատերազմ է հայտարարել հայկական արժեքներին։ Այդ մասին ասվում է Արցախի պատմական միջավայրի պահպանության պետական ծառայության հաղորդագրությունում։

«Ադրբեջանցիները այս անգամ ավերել են Մարտակերտ քաղաքի Դանիել Վարուժանի փողոցում գտնվող Հարութ Բաբայանի և Գարիկ Մնացականյանի հիշատակն հավերժացնող խաչքար - հուշաղբյուրը։

Այն կանգնեցվել էր 2021 թվականի հոկտեմբերին Հարութ Բաբայանի հոր՝ Ռաշիդ Բաբայանի մտահղացմամբ ու անձնական միջոցներով»,- ասվում է հայտարարությունում։

Հավելենք, որ անցած շաբաթվա վերջին հայտնի դարձավ, որ ադրբեջանցիները քանդել են Օմարի լեռնանցքում զոհված Տիգրան Աբրահամյանի և նրա ընկերների հիշատակին կանգնեցված խաչքար-հուշարձանը: Խաչքարը տեղադրվել էր Արցախի Քաշաթաղի շրջանի Աղանուս բնակավայրի Թթու ջուր կոչվող տարածքում: Այդ մասին հաղորդել է monumentwatch.org-ը: "Մինչ ադրբեջանական օկուպացիան դա աղբյուր-հուշարձան էր, իսկ կենտրոնում և հուշարձանի կողքին կանգնած էր 2 խաչքար: Տարածքը գրավելուց հետո արված լուսանկարից պարզ է դառնում, որ խաչքարերը ոչնչացվել են, իսկ հուշարձանի ամբողջականությունը խախտվել և պղծվել է ներկերով", - նշվում էր հաղորդագրության մեջ: Աղանուս գյուղի մոտ գտնվող պատմական աղբյուրի շուրջ զանգվածաբար ծառեր են հատվել, այստեղ պատրաստվում են հանգստի գոտի կառուցել։