Սթենդֆորդի համալսարանի դոկտորը թվարկել է Հայաստանում մի խումբ գրանտակեր քարոզիչների տարածած առասպելները

Արմինֆո. Սթենդֆորդի համալսարանի քաղաքագիտության դոկտոր Արթուր Խաչիկյանը ներկայացրել է "Հայաստանում մի խումբ գրանտակեր քարոզիչների կողմից վերջին մի քանի տարիներին  տարածված կեղծ խոստումների և հեքիաթների ցանկը":

Քաղաքագետը թվարկել է նման խոստումների եւ առասպելների 15 կետ: Ցուցակը գլխավորում է այն թեզը, որ Ներկայացուցիչների պալատի նախագահ Նենսի Փելոսիի այցը նշանակում է, որ ԱՄՆ-ն կաջակցի Հայաստանին:

"Հայերին աջակցելու մասին Ֆրանսիայի նախագահ Էմանուել Մակրոնի հայտարարությունները և նրա հայերեն հուզիչ գրառումները նշանակում են, որ Ֆրանսիան մեզ կօգնի", - նշել է փորձագետը, հիշեցնելով, որ ինքը ՝ Մակրոնը, հայտարարել է, որ պատժամիջոցներ չեն լինելու, անտեսել է Արցախի էթնիկ զտումը և ոչ մի անգամ չի այցելել Հայաստան՝ ի տարբերություն Ուկրաինայի, Ուզբեկստանի, Ղազախստանի և այլն:

Մեկ այլ առասպել է, ըստ փորձագետի, այն, որ Արևմուտքը կօգնի Հայաստանին, քանի որ այն ժողովրդավարության հենակետն է: Այս առումով Խաչիկյանը հիշեցրել է, որ Արևմուտքը Ադրբեջանի նախագահ Իլհամ Ալիևին հայտարարել է իր հուսահելի և վստահելի գործընկեր:

"Լաչինի միջանցքի բացման մասին Հաագայի դատարանի որոշումը և միջազգային հանրության ճնշումը մեզ կօգնեն։ Մինչդեռ, Արցախի իննամսյա շրջափակումն աննկատ մնաց՝ չնայած օգնության բազմաթիվ խնդրանքներին", - հավելել է փորձագետը։

"Եվս մեկ թեզ. Արևմուտքը մեզ կօգնի, եթե մենք Ռուսաստանի դաշնակիցը չլինենք և դուրս գանք ՀԱՊԿ-ից։ Մինչդեռ Ֆրանսիան խորհրդանշական օգնություն ցույց տվեց, թեև մենք դեռ Ռուսաստանի դաշնակիցն ենք համարվում և դեռ ՀԱՊԿ-ում ենք։ Ադրբեջանը Ռուսաստանի պաշտոնական գործընկերն է, սակայն ռազմական օգնություն է ստանում ԱՄՆ-ից։ Վրաստանը Ռուսաստանի դաշնակիցը չէր, Բայց 2008 թվականի պատերազմի ժամանակ արևմուտքից օգնություն չստացավ", -  ուշադրություն է հրավիրել Խաչիկյանը։

Նրա խոսքով՝ առասպել է նաև այն պնդումը, որ Արևմուտքը կօգնի Հայաստանին՝ այնպես, ինչպես օգնում է Ուկրաինային։ Խաչիկյանն ընդգծել է, որ Արևմուտքը շատ ավելի լուրջ օգնություն է ցուցաբերել Ուկրաինային՝ 250 մլրդ դոլար և ամենաժամանակակից սպառազինություն, բայց հիմա լքում է Ուկրաինան ՝ նրան մեն-մենակ թողնելով հակառակորդի հետ, ասելով, որ փողը վերջացել է։

"Առասպել է նաև այն պնդումը, որ եվրոպացի դիտորդները մեզ կօգնեն ՝ իրենց ներկայությամբ նշելով Եվրոպայի սահմանը, ապահովելով մեր անվտանգությունը: Մինչդեռ, եվրադիտորդները չօգնեցին ոչ Սոթքում և այլ շրջաններում Հայաստանի վրա հարձակման ժամանակ, ոչ էլ Արցախի էթնիկ զտման ժամանակ", - շարունակել է փորձագետը։

Քաղաքագետը հեքիաթ է համարել նաև այն պնդումները, թե երկրաշարժի ժամանակ Թուրքիային "եղբայրական " օգնությունը հանգեցրել է հարաբերությունների բարելավման: Այս առումով նա հիշեցրել է, որ Թուրքիան ընդունել է օգնությունը, իսկ հետո օգնել է Ադրբեջանին Լեռնային Ղարաբաղից դուրս մղել հայերին և նույն կոշտ, հակահայ դիրքորոշումն է որդեգրել:

"Առասպել է նաև պնդումը, որ Արևմուտքը թույլ չի տա Արցախի էթնիկ զտում, ինչպես հայտարարել են Պետդեպարտամենտի և Եվրախորհրդարանի ներկայացուցիչները, քանի որ արևմտյան կառավարությունները թույլ են տվել տեղահանել հայերին և հրաժարվել են ընդունել, որ տեղի է ունեցել էթնիկ զտումն։ Արեւմտյան կառավարություններն անտեսել են Արցախի շրջափակումը նույնիսկ Դեկամպոյի հայտնի զեկույցից հետո, ով տեղի ունեցածը անվանել է ցեղասպանություն", - ընդգծել է Խաչիկյանը։

Նա անհիմն է համարել նաև այն թեզը, որ Արևմուտքը պատժամիջոցներ կկիրառի, եթե հարձակում լինի Հայաստանի վրա կամ էթնիկ զտում լինի Արցախում։ Քաղաքագետը ևս մեկ անգամ ընդգծել է, որ արևմտյան կառավարությունները հայտարարել են, որ պատժամիջոցներ չեն լինի:

"Առասպել է այն պնդումը, որ պետք է հանձնել Արցախը, որպեսզի խաղաղ ապրենք հարևանների հետ։ Չէ որ Արցախի կործանումից հետո հարևանները նորանոր պահանջներ են ներկայացնում Հայաստանին ՝ ներառյալ անկլավները, միջանցքները և ադրբեջանցիների վերադարձը Հայաստանի տարածք", - փաստել է փորձագետը։

Նրա խոսքով՝ սին է նաև այն պնդումը, որ Արևմուտքը կօգնի Հայաստանին, եթե վերջինս շարունակի Ժողովրդավարական գիծը և եվրոպական վեկտորը: "Արևմուտքը լուռ ընդունեց հայերի էթնիկ զտումը, ոչինչ չձեռնարկեց Ադրբեջանին պատժելու համար, և հայտարարեց, որ ավտորիտար Ադրբեջանը Կովկասում իր հիմնական դաշնակիցն է ՝ հաշվի առնելով իր նավթային ռեսուրսները", - հավելել է նա:

Խաչիկյանն առասպել է համարում նաև այն պնդումները, թե Ֆրանսիան Հայաստանին ռազմական օգնություն է ցուցաբերել։ "Ֆրանսիան Հայաստան է ուղարկել մարտական մեքենաներ, որոնցից հրաժարվել է ինքը՝ 23 տարի առաջ, որոնցից հրաժարվել Է Ուկրաինան, որոնք չեն կարող անձնակազմին պաշտպանել արկերից, հրթիռներից կամ դրոններից, և որոնք արտահանվում են աֆրիկյան ամենաաղքատ երկրներ՝ խաղաղապահ և հետախուզական առաքելությունների համար", - նշել է քաղաքագետը:

"Ժողովրդավարական Արևմուտքը և քաղաքակիրթ համաշխարհային հանրությունը Հայաստանի ապագան է, նույնպես առասպել է։ Ժողովրդավարական Արևմուտքն Ուկրաինային հրահրեց պատերազմի, ստիպեց ուկրաինացիներին դադարեցնել խաղաղ բանակցությունները 2020 թվականի գարնանը, իսկ այժմ նրան նետեց ճակատագրի քմահաճույքին։ Արևմուտքը լուռ ընդունում է Պաղեստինի բնակչության ցեղասպանությունը, խաղաղ բնակչության բնաջնջումը սեփական տարածքում, որը ՄԱԿ-ի կողմից ճանաչվել է դեռևս 1947 թվականին: Զոհերի թիվը հասնում է 20 000-ի, որոնց մեծ մասը երեխաներ են։ ԱՄՆ կառավարությունը եւ Պետդեպարտամենտը շարունակում են ակտիվորեն օգնել իսրայելական բանակին, անտեսում են պաղեստինցիների ցեղասպանությունը եւ արգելափակում են պատերազմը կանգնեցնելու համաշխարհային հանրության փորձերը", - նշել է նա։

Եվ տասնհինգերորդ կեղծ թեզը Խաչիկյանը համարում է այն պնդումները, թե հարևանների հետ խաղաղության պայմանագիրն ապագայում կպաշտպանի Հայաստանը պատերազմից։ "2020 թվականի նոյեմբերի 9-ի համաձայնագիրը խախտվեց դրա կնքումից ընդամենը 3 տարի անց։ 2014 թվականի Մինսկի համաձայնագրերը խախտվեցին վեց տարի անց, և Գերմանիայի ու Ֆրանսիայի առաջնորդները խոստովանեցին, որ այդ ժամանակն օգտագործել են նոր պատերազմի նախապատրաստվելու համար", - ամփոփել է նա։