Արմինֆո. Հայաստանը չի միացել սահմանափակող միջոցների վերաբերյալ ԵՄ խորհրդի դեկտեմբերի 4-ի որոշմանը։ Այդ մասին ԱրմԻնֆո-ին հաղորդել է Հայաստանի ԱԳՆ մամուլի քարտուղար Անի Բադալյանը:
Ավելի վաղ ԱրմԻնֆո-ն դիմել էր Հայաստանի ԱԳՆ' խնդրելով մեկնաբանել ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելի' այսպես կոչված "Մագնիտսկու եվրոպական ցուցակի" վերաբերյալ սահմանափակող միջոցները ևս մեկ տարով երկարաձգելու մասին հայտարարությունը, որտեղ նշվում էր, որ Հայաստանն ու Ադրբեջանը աջակցել են այդ որոշմանը: Այդ առնչությամբ ԱրմԻնֆո-ն հետաքրքրվել էր, թե արդյոք հայկական կողմը գնահատել է այդ որոշման ռիսկերն ու հետևանքները, հաշվի առնելով այն փաստը, որ դրանում առկա են այնպիսի երկրներ, ինչպիսիք են Իրանը, Սիրիան, Ռուսաստանը, որոնք Երևանի համար բարեկամ պետությունների շարքին են դասվում:
Հավելենք նաև, որ Բորելի այդ հայտարարության հրապարակումից մեկ օր անց այն սրբագրվել է, և Հայաստանի ու Ադրբեջանի մասին հիշատակումները հեռացվել են:
Հայաստանի արտաքին քաղաքական գերատեսչության ներկայացուցիչն ընդգծել է, որ ելնելով արտաքին քաղաքական առաջնահերթություններից և ԵՄ-ի հետ գործընկերության շրջանակներում Երևանը դիտարկում և հաճախ է միանում Եվրամիության հայտարարություններին:
"Ելնելով արտաքին քաղաքական առաջնահերթություններից և ԵՄ հետ գործընկերության շրջանակներում՝ ՀՀ-ն դիտարկում և հաճախ միանում է ԵՄ հայտարարությունների՝ ցուցաբերելով իր աջակցությունն ու համերաշխությունը դրանցում արծարծվող հարցերի վերաբերյալ: Կոնկրետ ԵՄ խորհրդի դեկտեմբերի 4-ի սահմանափակող միջոցների վերաբերյալ որոշմանը (2023/2721) ՀՀ-ն չի միացել, ինչպես դա երևում է նաև ԵՄ խորհրդի դեկտեմբերի 17-ի հաղորդագրությունից", - ընդգծել է Բադալյանը։