Ալավերդիում տեղի ունեցած իրադարձությունները կարելի է բնորոշել որպես օրենքի հաղթանակ. նախարար

Արմինֆո.Ալավերդիում տեղի ունեցած իրադարձությունները կարելի է բնորոշել որպես օրենքի հաղթանակ։ Այդ մասին դեկտեմբերի  ԱԺ-ում կառավարության ժամի ընթացքում հայտարարել է ՀՀ տարածքային կառավարման եւ ենթակառուցվածքների նախարար Գնել Սանոսյանը ՝ պատասխանելով իշխանամետ պատգամավոր Արեն Մկրտչյանի հարցին։

Նա նշել է, որ համայնքի ղեկավարի վերընտրություններն անցել են երկրի օրենքներին համապատասխան, իսկ ահա այն, ինչ տեղի է ունեցել դրանցից հետո, մասնավորապես, քաղաքային վարչակազմի շենքի ելքերի արգելափակումը, քվեատուփի շրջումը եւ այլ հակաիրավական գործողությունները պահանջում են հատուկ քննություն:

Սանոսյանը նշել է, որ, օրենքի պահանջներին համապատասխան, Ալավերդիում գործող քաղաքապետին անվստահության քվե է հայտնվել, և նոր  քաղաքապետ է ընտրվել: Նախարարը կարևորել է, որ երկրի 71 համայնք չմնա անկառավարելի, այսինքն, համայնքն ունենա ղեկավար, և ավագանու աշխատանքն ընթանա բնականոն հունով:

Հիշեցնենք, որ նախօրեին Ալավերդի համայնքի ավագանին անվստահություն էր հայտնել համայնքի ղեկավար Արկադի Թամազյանին: Նոր քաղաքապետ է ընտրվել իշխող "Քաղաքացիական պայմանագիր" կուսակցության խմբակցության ղեկավար Դավիթ Ղումաշյանը: Թամազյանի հրաժարականի օգտին քվեարկել է ավագանու 27 անդամներից 14-ը: Թամազյանը հայտարարել է, որ նիստը սկսվել է օրենքի խախտմամբ ։ Նիստի ընթացքում դահլիճում լարված իրավիճակ է ստեղծվել, ծեծկռտուք է տեղի ունեցել, Ոստիկանությունը քաղաքապետարանի դիմացի հրապարակից հետ է մղել "Ապրելու երկիր" կուսակցության համահիմնադիրներ Մեսրոպ Առաքելյանին և Արկադի Թամազյանին:

Հիշեցնենք նաեւ, որ 2022 թվականի սեպտեմբերի 25-ին Ալավերդիում կայացած ընտրություններում "Քաղաքացիական պայմանագիրը" և "Ապրելու երկիրը" ստացել էին 13-ական մանդատ, որոնցից ոչ մեկը չի հաղթահարել 50 տոկոսի շեմը։ "Ապրելու երկիրը" կոալիցիա էր կազմել ընդամենը մեկ մանդատ ստացած "Հայ ազգային կոնգրես" կուսակցության հետ, իսկ ավագանին քաղաքապետ էր ընտրել կուսակցության ներկայացուցիչ Թամազյանին: Սույն թվականի հուլիսի 28-ից սկսած "Քաղաքացիական պայմանագիր" խմբակցությունը, չմասնակցելով ավագանու նիստերին, քվորում չի ապահովել: Կուսակցության նախաձեռնությամբ դեկտեմբերի 5-ին գումարվել է նիստ, որտեղ անվստահություն է հայտնվել համայնքի ղեկավարին: