Գեղամ Ստեփանյանն Արևմուտքին մեղադրել է Արցախի հայաթափման գործում Ադրբեջանին աջակցելու համար

Արմինֆո. Արցախի մարդու իրավունքների պաշտպան Գեղամ Ստեփանյանը հավաքական Արևմուտքին մեղադրել է Լեռնային Ղարաբաղի հայաթափման գործում Ադրբեջանին օժանդակելու համար:

Հրապարակելով Ադրբեջանի նախագահ Իլհամ Ալիևի՝ օկուպացված Ստեփանակերտ այցի աղմկահարույց լուսանկարով, որտեղ նա ցուցադրաբար ոտնահարում է Արցախի Հանրապետության դրոշը, Ստեփանյանը, մասնավորապես, գրել է. "Դուք ասում էիք իրավունքներ և անվտանգությու՞ն։ Տոյվո Կլաար (Հարավային Կովկասում ԵՄ հատուկ ներկայացուցիչ - խմբ.), Շառլ Միշել (Եվրախորհրդի նախագահ), քարտուղար Բլինքեն (ԱՄՆ պետքարտուղար), ողջունում ենք ձեր հանցակցին":

ՀՀ ԱԳՆ նախկին խոսնակ Աննա Նաղդալյանն, իր հհերթին, արձագանքելով ադրբեջանական բռնապետի կողմից Արցախի դրոշի պղծմանը, մասնավորապես գրել է. "Վերաինտեգրում՝ ըստ Ալիևի

Քայլ 1. սովամահության ենթարկել Լեռնային Ղարաբաղի 120 հազար հայերին;

Քայլ 2. իրականացնել ռազմական հարձակում և բնիկ հայ բնակչության էթնիկ զտում;

Քայլ 3. պղծել արցախահայության ազգային խորհրդանիշներն ու պատմական ժառանգությունը"։

Միեւնույն ժամանակ, իտալացի լրագրող Սիմոնե Զոպելարոն, արձագանքելով, թե ինչպես է Ալիևը տրորում Արցախի դրոշը ԼՂՀ նախագահի նստավայրում, «Թվիթերի» իր միկրոբլոգում գրել է. "Բավական չէ հաղթել պատերազմը, պատճառել հազարավոր մահեր և էթնիկ զտում։ Բռնապետ Ալիևի համար կարևոր է, որ իրեն նկարեն և լուսանկարեն, մինչ նա տրորում է փոքրամասնության դրոշը, որին հենց նոր ջնջել է":

Ընդ որում, ամերիկացի լրագրող Լինդսի Սնելը Twitter-ի իր միկրոբլոգում անդրադառնալով Ալիևի ՝ Ստեփանակերտ կատարած այցին, փաստել է, որ սա, թերևս, այն եզակի դեպքերից է, երբ ադրբեջանական կողմը ընդունել է Արցախից բոլոր հայերի տեղահանության փաստը:

"Ադրբեջանցի լրագրողը հրապարակում է Ստեփանակերտում զբոսնելու տեսանյութը և մակագրում այն." դատարկ Խանքենդին՝ առանց հայերի...": Դրանով նրանք մոտեցել են այն բանի ճանաչմանը, որ Ադրբեջանն այնտեղ էթնիկ զտում է իրականացրել", - նշել է Սնելը։

Իր հերթին՝ Twitter-ի օգտատերը, որն օգտագործում է ռուս հունահայ միստիկ Գեորգի Գյուրջիևի մականունը, մասնավորապես, գրել է. «Ալիևը զարմացել է՝ Արցախի նախկին նախագահ Արայիկ Հարությունյանի աշխատասենյակում տեսնելով Մեծ Հայքի քարտեզը: Մտավոր հետամնաց քոչվոր»:

Հավելենք, որ Ադրբեջանի նախագահի՝ օկուպացված Արցախ և, հատկապես, Ստեփանակերտ կատարած այցի կադրերը ցանկացած ադեկվատ մարդու զզվանքի զգացում են առաջացնում։ 10 միլիոնանոց պետության ղեկավարն իրեն պահում է ոչ թե որպես պետական գործիչ և մի բողջ, թեկուզ ավտորիտար, բայց պետություն ղեկավարող անձ, այլ՝ որպես մանկական լուրջ հոգեբանական վնասվածքներով երեխա։ Մի մարդ, ով ի լուր աշխարհի խոսում էր, այսպես կոչված, ազգային փոքրամասնությունների իրավունքների պաշտպանության մասին, մեծ հաճույքով ոչ միայն ոտնատակ է տալիս Արցախի դրոշը, այլև չի ամաչում իր այդ ցածր գործողությունները ի լուր աշխարհի ներկայացնել։ Երբ տեսնում ես այդ պետության ցածր խավի ներկայացուցչի կողմից նման գործողություններ, դեռ մի տեսակ ընդունում ես դա, պատճառաբանելով, որ մեծ խելքից կամ կրթության պակասից չէ ։ Բայց ՄՄՀՊԻ-ի նախկին ասպիրանտի և դասախոսի կողմից նման պահվածքը, առնվազն, տարակուսանք է հարուցում։