Ինչու է զանգահարել շատ երկրների ղեկավարների, բայց ոչ՝ ՌԴ նախագահին.  Փաշինյանը պարզաբանում է պատճառը

Արմինֆո. Հայ-ադրբեջանական սահմանին իրավիճակը լարված է, քանի որ Ադրբեջանի զորքերի որոշակի կենտրոնացում կա, նաև՝ Լեռնային Ղարաբաղի շուրջ։ Այդ մասին հայտարարել է վարչապետ Նիկոլ Փաշինյանը՝ Հանրային հեռուստատեսության հարցազրույցում, հավելելով, որ կառավարության նախորդ նիստում տրված գնահատականները չեն փոխվել:

Հիշեցնենք, որ սեպտեմբերի 7-ին կառավարության նիստում Փաշինյանը հայտարարել էր, որ անցած շաբաթ Հարավային Կովկասում ռազմաքաղաքական իրավիճակը զգալիորեն սրվել է, ինչը պայմանավորված է Լեռնային Ղարաբաղի հետ շփման գծի երկայնքով և Հայաստանի հետ սահմանին ադրբեջանական զորքերի կուտակումներով: Կառավարության ղեկավարը նաեւ ասել էր, որ Հայաստանի ինքնիշխան տարածքի նկատմամբ ոտնձգությունների քաղաքականությունը շարունակվում է: Հիշեցնելով, որ սեպտեմբերի 1-ին Ադրբեջանի ԶՈՒ-ն հերթական սադրանքն է ձեռնարկել Գեղարքունիքի մարզի Սոթքի հատվածում ՀՀ ինքնիշխան տարածքի նկատմամբ, որի հետևանքով զոհվել է ՀՀ ՊՆ 3 զինծառայող, ինչպես նաև Ադրբեջանի կողմից Լաչինի միջանցքի շարունակական ապօրինի շրջափակման մասին, ՀՀ վարչապետը նշել էր, որ վերջին գործողություններով Բաքուն ի ցույց է դնում Հայաստանի և Լեռնային Ղարաբաղի դեմ նոր ռազմական սադրանք ձեռնարկելու իր մտադրությունը: Միևնույն ժամանակ, նա կրկին հայտարարել էր խաղաղության օրակարգին իր հավատարմության և Ադրբեջանի հետ խաղաղության համաձայնագիր ստորագրելու պատրաստակամության մասին:

Հարցին, թե ինչու է վարչապետն այս իրավիճակում զանգահարել Ֆրանսիայի, Գերմանիայի, Իրանի, Վրաստանի, ԱՄՆ առաջնորդներին, այլ ոչ թե Ռուսաստանի նախագահին, ինչը տրամաբանական կլիներ, Փաշինյանը պատասխանել է, որ, իրականում, առաջին զանգը հենց ՌԴ նախագահին է եղել: <Վերջերս ես խոսել եմ ՌԴ նախագահի հետ՝ այս իրավիճակի հետ կապված, և ուրիշների հետ չեմ խոսել։ Նշեմ, որ այդ զանգերի իմաստն ու նպատակն այն էր, որ այն գործընկերներին, որոնք, ամենայն հավանականությամբ, տեղյակ չեն ինչ-որ նրբություններից, փոխանցեմ այդ տեղեկատվությունը, իսկ ՌԴ նախագահը, ամենայն հավանականությամբ, տեղյակ է այդ իրավիճակի մասին։ Լաչինի միջանցքի ապօրինի շրջափակման և ԼՂ-ում հաստատված հումանիտար ճգնաժամի հետ կապված իրավիճակը սկսվել է 2022 թվականի դեկտեմբերից։ Այդ ժամանակից ի վեր ես մեկ տասնյակից ավելի զրույցներ եմ ունեցել ՌԴ նախագահի, այլ գործընկերների հետ, քանի որ կա տեղեկատվություն նոր իրավիճակի մասին, կարծում եմ, որ այն պետք է կիսվեր նրանց հետ, իսկ ՌԴ նախագահի հետ մենք տեղեկատվությունը վաղուց էինք կիսում ։ Այս առումով, ցավոք, մեր զրույցից ի վեր իրավիճակը չի փոխվել, որպեսզի անհրաժեշտություն առաջանա նոր զրույց ունենալ ՌԴ նախագահի հետ։ Անհրաժեշտության դեպքում այդ հեռախոսազրույցները կարող են տեղի ունենալ>, - ասել է Նիկոլ Փաշինյանը։