Արմինֆո Օգոստոսի 1-ին Սպենդիարյանի անվան օպերայի և բալետի ազգային ակադեմիական թատրոնում մեկնարկել է պատմության մեջ առաջին Հայկական երիտասարդական համաժողովը, որին մասնակցում են աշխարհի ավելի քան 50 երկրներից շուրջ 600 հայեր, ինչպես նաև հրավիրված են 100 բանախոսներ ավելի քան 15 երկրներից: Այս տարի համաժողովն անցկացվում է "Երիտասարդները երիտասարդների համար" կարգախոսի ներքո:
Համաժողովի նպատակն է սփյուռքահայ երիտասարդներին հնարավորություն ընձեռել մասնակցելու Հայաստանի զարգացման գործընթացին, կապեր հաստատելու և հզորացնելու, ինչպես նաև խրախուսելու նրանց ընդլայնել իրենց աշխատանքը և ներգրավվածությունը համայնքային կյանքում:
ՀՀ սփյուռքի գործերի գլխավոր հանձնակատար Զարեհ Սինանյանն ընդգծել է, որ համաժողովն ուղղված է երիտասարդների փոխճանաչելիության և փոխգործակցության բարձրացմանը, համալիր խնդիրների առաջադրմանը, դրանց լուծման ուղղությամբ համակարգված աշխատանքին, անձնական փորձի, գիտելիքների և կարողությունների նպատակային ներդրման հնարավորությունների որոնմանը:
Հայազգի հայտնի արտիստներ Սերժ Թանկյանը, Ռոզա Լինն ու աշխարհահռչակ թենիսիստ Կարեն Խաչանովը նույնպես տեսաուղերձով ողջունել են երիտասարդներին:
Համաժողովում քննարկվող թեմաները կներառեն երիտասարդության դերին, երիտասարդների հետ փոխգործակցության մոդելներին, Հայաստանի շահերի պաշտպանությանը, ազգային անվտանգությանը, Հայաստան-Սփյուռք հարաբերություններին, ինքնությանը, գիտության և կրթության զարգացմանը, տեխնոլոգիական առաջընթացին, հայրենիքում հնարավորություններին, հայրենադարձությանը և այլ ոլորտներին վերաբերող հարցեր: Միջոցառումը կտևի երեք օր:
Համաժողովի առաջին օրվա ընթացքում բանախոսությամբ հանդես կգան իսպանահայ աստղաֆիզիկոս, գիտնական, Starmus փառատոնի հիմնադիր Գարիկ Իսրայելյանը, ԱՄՆ Համահայկական ուսանողական ասոցիացիայի նախագահ Մհեր Հարությունյանը, Տեխնոլոգիաների գիտության հայկական հիմնադրամի (FAST) գլխավոր տնօրեն Արմեն Օրուջյանը, Հայկական բարեգործական ընդհանուր միության Սփյուռքի երիտասարդական ծրագրերի ղեկավար Գայանե Մանուկյանը, Սանկտ Պետերբուրգի հայկական տարածաշրջանային երիտասարդական ասոցիացիայի հիմնադիր և ղեկավար Արշակ Հովհաննիսյանը, "Հայ առաջադեմ երիտասարդություն" հասարակական կազմակերպության նախագահ Գրիգոր Երիցյանը, իրավաբան-միջազգայնագետ Գառնիկ Քերքոնյանը, ՀՀ Զբոսաշրջության կոմիտեի նախագահ Սիսիան Պողոսյանը, "CyberHUB-AM" - ի համահիմնադիր Սամվել Մարտիրոսյանը, "reArmenia" հարթակի համահիմնադիր Գևորգ Պողոսյանը, Հարավային Կալիֆորնիայի համալսարանի Հայագիտության ինստիտուտի հետազոտող Գեղամ Մուղնեցյանը, Յեյլի համալսարանի բանասիրական գիտությունների թեկնածու Գոհար Ավագյանը, Հրանտ Դինք հիմնադրամի ծրագրային մենեջեր Ատոմ Շաշկալը և գիտության, կրթության, մշակույթի, բիզնեսի ոլորտի այլ անվանի մասնագետներ Հայաստանից և Սփյուռքից:
Հայկական երիտասարդական համաժողովի երեք օրերը կանցկացվեն ինտերակտիվ և ներառական ձևաչափով ՝ պանելային նստաշրջաններով, քննարկումներով, հանդիպումներով, շնորհանդեսներով, սեմինարներով, ինչպես նաև ցուցահանդեսներով, ցանցային և մշակութային միջոցառումներով:
Առաջին Հայկական երիտասարդական համաժողովի գլխավոր գործընկերն է Fast Bank-ը: Համաժողովի կազմակերպիչն է ՀՀ սփյուռքի գործերի գլխավոր հանձնակատարի աշխատակազմը: