Չորեքշաբթի, 31 Մայիսի 2023 22:15

Արմինֆո.ՄԻԵԴ-ը որոշում է կայացրել Ադրբեջանին մինչև հունիսի 6-ը տրամադրել ժամանակ՝ 2 հայ զինծառայողների վերաբերյալ տեղեկատվություն հայտնելու համար: Այդ մասին հաղորդել է  Միջազգային իրավական հարցերով ՀՀ ներկայացուցչի գրասենյակը:

 

«ՀՀ կառավարության կողմից ավելի վաղ ներկայացված դիմումի հիման վրա Մարդու իրավունքների եվրոպական դատարանը կայացրել է որոշում և պահանջել Ադրբեջանից մինչև սույն թվականի հունիսի 6-ը ներառյալ տրամադրել հետևյալ տեղեկությունը՝

 

Արդյո՞ք 2 զինծառայողները գերու կամ այլ կարգավիճակում գտնվում եմ Ադրբեջանի տիրապետության տակ: Եթե այո, Դատարանը Ադրբեջանից պահանջել է տրամադրել տեղեկություն զինծառայողների պահման պայմանների և բժշկական հետազոտությունների մասին», - ասվում է հաղորդագրությունում:

 

Սույն թվականի մայիսի 28-ին Միջազգային իրավական հարցերով ներկայացուցչի գրասենյակը Մարդու իրավունքների եվրոպական դատարան էր ներկայացրել  Ադրբեջանի իրավասության ներքո գտնվող ՀՀ ԶՈՒ երկու զինծառայողների  հիմնարար իրավունքների պաշտպանության վերաբերյալ դիմում և պահանջել, որպեսզի Դատարանի կանոնագրքի 39-րդ կանոնի համաձայն միջանկյալ միջոց կիրառվի Ադրբեջանի նկատմամբ՝ զերծ մնալու հայ զինծառայողների իրավունքների խախտումներից: Միաժամանակ պահանջ էր ներկայացվել տրամադրելու տեղեկատվություն վերջիններիս պահման վայրի, պայմանների և առողջական վիճակի վերաբերյալ:

 

Հիշեցնենք, որ մայիսի 26-ին կապը կորել էր մարտական դիրքեր սնունդ մատակարարող ՀՀ ԶՈՒ երկու զինծառայողների (Հարություն Հովագիմյան և Կարեն Ղազարյան) հետ: ՀՀ ՊՆ հաղորդագրության համաձայն, միջդիրքային ճանապարհին հայտնաբերվել է մայիսի 26-ին՝ ժամը 19:00-ից որոնվող ՀՀ ԶՈՒ 2 զինծառայողների կողմից շահագործվող թիկունքային մատակարարման ավտոմեքենան, որը բեռնված էր սննդով և ջրով՝ նախատեսված մարտական հենակետերի համար: Արդեն մայիսի 27-ին Ադրբեջանում հասցրել են նախօրեին անհետացած հայ զինծառայողներին մեղադրել «մի խումբ անձանց կողմից նախնական համաձայնությամբ իրականացված ահաբեկչության, մաքսանենգության, ազգային, ռասայական, սոցիալական կամ կրոնական ատելություն և թշնամանք հրահրելու, ապօրինի զենք փոխադրելու և պետական սահմանն ապօրինի հատելու» համար: