Բաքվում հիստերիա է առաջացրել Ֆրանսիայի ԱԳՆ հայտարարությունը, որով Ադրբեջանին կոչ է արվում դուրս բերել զորքերը Հայաստանի ինքնիշխան տարածքից

Արմինֆո. Բաքվում հիստերիա է առաջացրել Ֆրանսիայի ԱԳՆ հայտարարությունը, որով կոչ է արվում Ադրբեջանին դուրս բերել զորքերը Հայաստանի ինքնիշխան տարածքից:

ԱՀ ԱԳՆ-ում հավաստիացրել են, որ Ֆրանսիայի Եվրոպայի և արտաքին գործերի նախարարության ապրիլի 12-ի հայտարարությունը չի արտացոլում իրականությունը։ Չհանգստանալով, հերթական անգամ պարծենալով 2020 թվականի աշնանը Արցախի դեմ ագրեսիայով, Բաքուն Ֆրանսիային մեղադրել է "Ադրբեջանի դեմ զրպարտչական արշավ" իրականացնելու և "անարդար դիրքորոշում" դրսեւորելու համար։

"Այն փաստը, որ ֆրանսիական կողմը կոչ չի անում Հայաստանին հարգել Ադրբեջանի տարածքային ամբողջականությունն ու ինքնիշխանությունը, համաձայն եռակողմ հայտարարության և Պրահայի հանդիպման արդյունքների, որին մասնակցել է նաև Ֆրանսիայի նախագահը,  չի պահանջում Հայաստանից դուրս բերել իր զինված ուժերը ադրբեջանական տարածքներից, ինչպես նաև այն, որ ֆրանսիական կողմը միակողմանիորեն հայտարարել է միայն Հայաստանի տարածքային ամբողջականությունը հարգելու կարևորության մասին, մեր երկրի նկատմամբ նրա կանխակալ վերաբերմունքի օրինակ է", - հայտարարել են ԱՀ ԱԳՆ-ում, մոռանալով, որ սադրանքը տեղի է ունեցել Հայաստանի միջազգայնորեն ճանաչված ինքնիշխան տարածքում՝ այն համայնքի վարչական տարածքում, որի հողերը թշնամական ուժերը գրավել էին ընթացիկ տարվա մարտի վերջին՝ Հայաստանի տարածքների սողացող օկուպացիայի քաղաքականության շրջանակներում:

Վերջում ԱՀ ԱԳՆ-ը ֆրանսիական կողմին կոչ է արել զերծ մնալ նման հայտարարություններից, որոնք "Հայաստանին դրդում են հերթական սադրանքների, աջակցություն են ցուցաբերում ռևանշիստական ուժերին":

Հիշեցնենք, որ ապրիլի 11-ին Տեղ գյուղի մոտակայքում թշնամական ուժերը հարձակվել էին ՀՀ ԶՈՒ-ի վրա, որոնք այդ հատվածում ինժեներական աշխատանքներ էին իրականացնում: ՀՀ ԶՈՒ-ն կորցրել է 4 զինծառայող, ևս 6-ը  տարբեր աստիճանի ծանրության վիրավորում են ստացել, թշնամական կողմը պաշտոնապես ունի երեք զոհ։ Բոլոր գործողությունները տեղի են ունեցել ՀՀ ինքնիշխան տարածքում։ Ավելի վաղ թշնամական ուժերն այդ հատվածում գրավել էին ՀՀ ինքնիշխան տարածքից մինչև 9 քառ.կմ։

Ֆրանսիայի ԱԳՆ-ն այդ առնչությամբ հանդես է եկել հայտարարությամբ, որում, մասնավորապես, ընդգծել է. "Ֆրանսիան հիշեցնում է, որ սահմանազատումը պետք է իրականացվի բացառապես բանակցությունների միջոցով և Կողմերին կոչ է անում շարունակել ջանքերն այդ ուղղությամբ։  Հայաստանի տարածքային ամբողջականության նկատմամբ հարգանքը և շփման գծի հայկական կողմի օկուպացված դիրքերից ադրբեջանական ուժերի դուրսբերումը էական նշանակություն ունեն ապագա միջադեպերը կանխելու և տարածաշրջանում կայուն խաղաղությունը պահպանելու համար":