ՌԴ ԱԳՆ-ում մեկնաբանել են Հայաստանի տարածքում ԵՄ առաքելության տեղակայման շարժառիթների վերաբերյալ Նիկոլ Փաշինյանի խոսքերը

Արմինֆո.Ռուսաստանի ԱԳՆ-ում մեկնաբանել են Հայաստանի տարածքում ԵՄ դիտորդական առաքելության տեղակայման շարժառիթների վերաբերյալ ՀՀ վարչապետ Նիկոլ Փաշինյանի խոսքերը:

Փետրվարի 10-ին ամենշաբաթյա ճեպազրույցի ժամանակ անդրադառնալով Հայաստանի վարչապետի հայտարարությունները մեկնաբանելու խնդրանքին՝ Ռուսաստանի ԱԳՆ պաշտոնական ներկայացուցիչ Մարիա Զախարովան, մասնավորապես, ասել է. «Եթե նման հայտարարությունները փորձ է արդարացնելու ԵՄ-ականներին դեպի տարածաշրջան ձգելը, ապա այդ փորձը կարելի է հաջողված համարել։ Ռուս խաղաղապահները խաղաղություն են ապահովում Լեռնային Ղարաբաղում։ Մեր զինվորականներն ու սահմանապահներն աշխատում են Հայաստանի տարածքում, այդ թվում ՝ հայ-ադրբեջանական սահմանի մոտ"։ Ընդ որում, նա հավելել է, որ Մոսկվայում երբեք չեն լսել Բաքվի մտավախություններ ու հավակնություններ այդ կապակցությամբ:

"Միևնույն ժամանակ, գիտենք Հայաստանում իր դիտորդական առաքելությունը ծավալելու ԵՄ որոշման նկատմամբ Ադրբեջանի քննադատական վերաբերմունքի մասին։ Ահա տեսնում եք, ամեն ինչ այնպես չէ, ինչպես դուք եք ձեւակերպել", - հեգնանքով ասել է Ռուսաստանի ԱԳՆ ներկայացուցիչը։

Նրա խոսքով ՝ ակնհայտ է, որ Բրյուսելում նպատակ են դնում փոխել տարածաշրջանում ստեղծված անվտանգության համակարգը ։ "Դրա անկյունաքարը Ռուս զինվորականների և սահմանապահների ներկայությունն է, ինչպես նաև Հայաստանի ՀԱՊԿ անդամությունը, և, բնականաբար, այն ոգին, քաղաքական կամքը, որը դրսևորվեց գործնականում այն պայմանավորվածությունների իրականացման ժամանակ, որոնք ձեռք են բերվել Հայաստանի, Ադրբեջանի և Ռուսաստանի միջև", - ասել է ռուս դիվանագետը, հավելելով, թե շատ է ուզում հավատալ, որ Երեւանում դա հասկանում եւ հաշվի են առնում։

Միեւնույն ժամանակ, Զախարովան ընդգծել է, որ Ռուսաստանը բաց է հայ գործընկերների հետ երկխոսության համար՝ Անդրկովկասում կայունության պահպանման միջոցառումների կատարելագործման հարցում, ինչպես երկկողմ, այնպես էլ բազմակողմ ձեւաչափերով, ներառյալ ՀԱՊԿ շրջանակներում համապատասխան մշակումները:

Նշենք, որ ՀՀ վարչապետ Նիկոլ Փաշինյանը փետրվարի 8-ին խորհրդարանի ամբիոնից, հիմնավորելով Հայաստանում ԵՄ նոր առաքելության ծավալման պատճառները, նշել էր, որ Բաքուն արևմտյան բազմաթիվ միջազգային հարթակներում, փորձելով հիմնավորել Հայաստանի դեմ իր ագրեսիան, հայտարարում է, թե ՀՀ վարչապետը, Ադրբեջանի սահմանների մոտ ավելացնելով ռուսական զորքերի խմբավորումը, հայկական զինված ուժերի հետ միասին պատրաստվում է ագրեսիա իրականացնել Ադրբեջանի դեմ, և այդ պատճառով Բաքուն ստիպված է բարձունքներ գրավել ՝ իրավիճակը հավասարակշռելու համար: "Մեզ մեր արեւմտյան գործընկերներն ասում են, թե ինչպես կարելի է, դուք ցանկանում եք գրավել Ադրբեջանի հողերը, ինչին ի պատասխան մենք հանդես ենք եկել դիտորդներ ուղարկելու նախաձեռնությամբ", - նշել է վարչապետը: Նա հավելել է, որ ՀԱՊԿ-ի և ԵՄ-ի հետ հարաբերություններում որևէ աշխարհաքաղաքական ենթատեքստ չկա, կա քաղաքական օրակարգ և կոնկրետ հարց, որը պաշտոնական Երևանը փորձում է լուծել։