Ուրբաթ, 27 Հունվարի 2023 22:48

Արմինֆո. Մոսկվայում ցանկանում են իմանալ Լեռնային Ղարաբաղի հակամարտության կարգավորման վերաբերյալ Հայաստանի հիմնական դիրքորոշումը։

 

Հունվարի 27-ին ամենշաբաթյա ճեպազրույցի ընթացքում Ռուսաստանի ԱԳՆ պաշտոնական ներկայացուցիչ Մարիա Զախարովան, ի պատասխան 2020 թվականի նոյեմբերի 9-ի եռակողմ հայտարարության շուրջ գաղտնի պայմանավորվածությունների առկայության մասին հարցին, հետաքրքրվել է, թե "իսկ ինչպիսին է Հայաստանի իշխանությունների դիրքորոշումը Լեռնային Ղարաբաղի կարգավորման ճակատագրական հարցի վերաբերյալ"։

 

"Տեղաբնակները վաղուց ուզում են հասկանալ, թե որն է, այնուամենայնիվ, Հայաստանի պաշտոնական իշխանությունների պաշտոնական դիրքորոշումը այդ մասին։ Իսկ այն, կարծես, ստացվում է այնպես, որ ձեւակերպված չէ", - ասել է Զախարովան։ Նրա ասելով՝ երբ ձեւակերպվի հիմնական դիրքորոշումը, շատ հարցեր հստակություն կստանան։

 

Դիտարկմանը, թե հունվարի 18-ին կայացած մեծ մամուլի ասուլիսի ժամանակ ՌԴ ԱԳ նախարարի խոսքերը վկայում են այն մասին, որ կան ինչ-որ պայմանավորվածություններ, որոնք չեն հիշատակվում նոյեմբերի 9-ի հայտարարության մեջ, Զախարովան խոստացել է ճշտել այդ մասին: "Բայց եկեք ինչ-որ նրբություններ չփնտրենք նրանում, ինչը չկա, բայց կարող է լինել։ Եկեք, այնուամենայնիվ, սպասենք կարևորագույն հարցի վերաբերյալ հիմնարար դիրքորոշման ձևակերպմանը։ Եվ երբ բոլորը՝ տեղաբնակները, ներգրավված կողմերը, հասկանան, թե որն է երկրի ղեկավարության հիմնական դիրքորոշումն այդ հարցում, այն ժամանակ բոլորի համար շատ բան ինքնըստինքյան հասկանալի կդառնա։ Իսկ մինչ այդ, դա թեմա է, որը հաճախ տարբեր կերպ է մեկնաբանվում", - ամփոփել է Ռուսաստանի ԱԳՆ պաշտոնական ներկայացուցիչը։