Վալերի Բուայեն կրկին կոչ է արել միջազգային հանրությանը աչք չփակել Հայաստանի նկատմամբ ադրբեջանական ագրեսիայի վրա

Արմինֆո.Ֆրանսիայի ԱԺ պատգամավոր, "Ֆրանսիա-Արցախ" բարեկամության շրջանակի հիմնադիր անդամ Վալերի Բուայեն կրկին կոչ է արել միջազգային հանրությանը աչք չփակել Հայաստանի նկատմամբ ադրբեջանական ագրեսիայի վրա:

ԵԱՀԿ-ում Լեհաստանի նախագահությանը նվիրված իր ելույթի ընթացքում ֆրանսիացի դիվանագետը, հիշեցնելով Ուկրաինայի ժողովրդի հետ Ֆրանսիայի համերաշխության մասին, կոչ է արել չմոռանալ հայերի մասին եւ պատժամիջոցներ սահմանել Ադրբեջանի նկատմամբ։

"Մեր ձայնը պետք է միասնական լինի Ուկրաինայի հետ ամենաուժեղ համերաշխությունն արտահայտելու համար։ Բայց թող այն նաև լայնորեն լսվի, որպեսզի մեր ուշադրությունը հրավիրվի մեկ այլ հումանիտար դրամայի վրա, որն ուղեկցվում է պատերազմական և այլ հանցագործություններով: Ես խոսում եմ Հայաստանի մասին։ Միթե՞ հայերի կյանքն ավելի քիչ արժե, քան ուկրաինացիների կյանքը", - հարցադրում է արել պատգամավորը։

Մատնանշելով երկակի ստանդարտների անթույլատրելիությունը՝ Բուայեն կոչ է արել աչք չփակել պատերազմական և մարդկության դեմ ուղղված հանցագործությունների, հայերի նկատմամբ դաժան խոշտանգումների վրա։

Ընդ որում, պատգամավորը հիշեցրել է, որ ինքը ջերմորեն աջակցել է Ֆրանսիայի Սենատի բանաձևին, որն ընդունվել է նոյեմբերի 15-ին Փարիզում և ուղղված է Ադրբեջանի նկատմամբ պատժամիջոցներ կիրառելուն։ Նա ուշադրություն է հրավիրել այն հանգամանքի վրա, որ բանաձևը նաև պահանջում է ադրբեջանական զինված ուժերի անհապաղ դուրս բերում Հայաստանի տարածքից և 2020թ. նոյեմբերի 9-ի հրադադարի համաձայնագրի կիրարկման ապահովում ։ Փաստաթուղթն աջակցում է ցանկացած նախաձեռնության, որը կնպաստի Երևանի և Բաքվի միջև կայուն խաղաղության հաստատմանը։

"Բանաձևում խոսվում է նաև ԵՄ միջնորդության մասին։ Ես սատարում եմ ԵՄ դիտորդական առաքելության մանդատը երկարաձգելու Հայաստանի խնդրանքը", - ասել է Բուայեն, հիշեցնելով, որ Ֆրանսիայի նախագահ Էմանուել Մակրոնի, Եվրոպական խորհրդի ղեկավար Շառլ Միշելի, ինչպես նաեւ Ադրբեջանի նախագահի եւ Հայաստանի վարչապետի միջեւ նախնական պայմանավորվածության համաձայն, դրանք տեղակայվել են երկու ամսով։ Այդ կապակցությամբ պատգամավորը կոչ է արել Ֆրանսիայի կառավարությանը աջակցել Եվրոպական քաղաքացիական առաքելության մանդատի երկարաձգման առաջարկին:

"Ես կոչ եմ անում անվերապահորեն ազատ արձակել եւ անհապաղ հայրենադարձել բոլոր հայ ռազմագերիներին, որոնք ներկայումս գտնվում են Ադրբեջանում կալանքի տակ, կամ որոնցից նորություններ չկան", - ասել է պատգամավորը:

Բուայեն նաև ընդգծել է դիվանագիտական ճանապարհով բանակցային գործընթացին Ադրբեջանի անհապաղ միանալու կարևորությունը ՝ տարածաշրջանում կայուն խաղաղության հաստատման հասնելու համար:

Մտահոգություն հայտնելով ուկրաինացիների ճակատագրի առնչությամբ, որոնց դաժան ձմեռ է սպասվում, Բուայեն կոչ է արել չմոռանալ, որ անցած ձմռանը միջազգային հանրության անտարբերության ֆոնին Լեռնային Ղարաբաղի բնակչությունը նմանատիպ խնդրի է բախվել Ադրբեջանի գործողությունների պատճառով (ադրբեջանական կողմը վնասել էր դեպի Արցախ գազատարը, և հայ բնակչությունը գրեթե մեկ ամիս սառել էր տներում ՝ եղանակային ծանր պայմանների ֆոնին - խմբ.):

"Ուստի, ուզում եմ ասել, որ եթե մենք մեղադրում ենք Ռուսաստանին Ուկրաինայի համար, մենք պետք է մեղադրենք և Ադրբեջանին և նրա թուրք հանցակցին՝ Հայաստանի համար", - ամփոփել է Բուայեն։