Պուտին. Հետեւողականորեն կատարելով ձեռք բերված պայմանավորվածությունները՝ կարելի է հասնել Հայաստանի եւ Ադրբեջանի միջեւ հարաբերությունների կայուն կարգավորման

Արմինֆո.ՌԴ նախագահ Վլադիմիր Պուտինը ՀԱՊԿ երկրների ղեկավարների գագաթնաժողովում հայտարարել է, որ Լեռնային Ղարաբաղի հակամարտության կարգավորման սուր հարցերի համալիր լուծման ուղղությամբ ջանքերը հետագա ուշադրություն են պահանջում:

"Մեր հետագա ուշադրությունը, իհարկե, պահանջում են, ես համաձայն եմ այն գործընկերների հետ, ովքեր արդեն խոսել են այդ մասին, եւ հայ - ադրբեջանական համալիր կարգավորման հասնելու ջանքերի հետ կապված հարցերը: Իհարկե, դրանք սուր հարցեր են, որոնք մեր ուշադրությունն են պահանջում", - ասել է Պուտինը՝ նեղ կազմով նիստում իր ելույթի ժամանակ։

Նա հավելել է, որ Սոչիում հոկտեմբերի վերջին Ռուսաստանի, Հայաստանի եւ Ադրբեջանի ղեկավարների եռակողմ բանակցությունները "լավ հիմք են ստեղծել սկզբունքային հարցերի շուրջ ապագա փոխզիջումների համար":

"Միայն հետեւողականորեն կատարելով սահմանների սահմանազատման, տրանսպորտային հաղորդակցությունների ապաշրջափակման, հումանիտար խնդիրների լուծման հարցերում նախկինում ձեռք բերված պայմանավորվածությունները՝ կարելի է հասնել Հայաստանի եւ Ադրբեջանի միջեւ հարաբերությունների կայուն կարգավորման։ Հուսով ենք, որ դա, ի վերջո, թույլ կտա հասնել Երեւանի եւ Բաքվի միջեւ խաղաղության պայմանագրի կնքման", - ասել է Պուտինը։