Արմինֆո. Սահմանների սահմանազատման և սահմանագծման գործընթացը մինչև տարեվերջ հնարավոր չէ ավարտել։ Այդ մասին ճեպազրույցի ժամանակ հայտարարել է ԱԺ անվտանգության եւ պաշտպանության հարցերի մշտական հանձնաժողովի նախագահ Անդրանիկ Քոչարյանը, նշելով, որ գործընթացն ընթանում է, եւ ժամանակային սահմանափակումները չպետք է խոչընդոտ հանդիսանան։
«Ամենակարևորն այն է, որ մենք պայմանավորվենք գործընթացի տևողության և շարունակականության մասին: Եթե ժամանակային սահմանափակումներ դնենք, ապա գործընթացը մեզ ոչ մի տեղ չի բերի", - ասել է Քոչարյանը։ Նա կարևորել է, որ հանձնաժողովները սահմանազատման և սահմանագծման գործընթացի համատեքստում աշխատեն միջազգայնորեն ճանաչված սահմանների մասով փաստաթղթի շրջանակում:
Իր հերթին՝ կառավարող կուսակցության պատգամավոր Սարգիս Խանդալյանը նշել է, որ վարչապետի հայտարարությունը (մինչև տարեվերջ խաղաղության պայմանագիր կնքելու մասին - խմբ.) վերաբերում էր սահմանազատման և սահմանին անվտանգության մեխանիզմների ապահովման հարցերին։ "Քանի որ սահմանագծումը բոլորովին այլ գործընթաց է և՝ բավականին երկար", - բացատրել է նա:
Նշենք, որ հոկտեմբերի 26-ին խորհրդարանական ժամի ընթացքում ՀՀ վարչապետ Նիկոլ Փաշինյանը հայտարարել էր, որ կառավարությունը բոլոր ջանքերը կգործադրի, որպեսզի մինչեւ տարեվերջ Ադրբեջանի հետ խաղաղության պայմանագիր կնքվի: Այդ կապակցությամբ նա հույս էր հայտնել, որ մինչև պայմանագրի կնքումը պետք է իրականացվեն նաև սահմանի սահմանազատման աշխատանքներ։ Փաշինյանը հիշեցրել էր, որ Պրահայում հանդիպման արդյունքում պայմանավորվածություն է ձեռք բերվել 1991թ. սահմանների հիման վրա սահմանազատման աշխատանքներ իրականացնելու վերաբերյալ: