Դեսպան. Եվրամիությունը միշտ ասում է. բռնությունը երբեք չպետք է դառնա խնդրի լուծման միջոց

Արմինֆո.Եվրամիությունը միշտ ասում է, որ բռնությունը երբեք չպետք է դառնա խնդրի լուծման միջոց։ Այդ մասին սեպտեմբերի 29-ին Գեղարքունիքի մարզում լրագրողների հետ զրույցում հայտարարել է Հայաստանում ԵՄ դեսպան Անդրեա Վիկտորինը։

"Պետք է գնալ, նստել բանակցությունների սեղանի շուրջ, քննարկել, որից հետո լուծում կգտնվի։ Ռազմական լուծումը լուծում չէ", - ասել է դեսպանը՝ սեպտեմբերի 13-ի գիշերը ադրբեջանական ագրեսիայից տուժած սահմանամերձ գյուղեր դիվանագետների այցի ընթացքում։ Այս համատեքստում նա շնորհակալություն է հայտնել իրավասու մարմիններին՝ Գեղարքունիք այցելելու և սեփական աչքերով տեսնելու հնարավորություն ընձեռելու համար: Վիկտորինը հավելել է, որ իրենց խնդիրն է նշումներ անել եւ ուղարկել կենտրոնակայան։ "Կարծում եմ՝ պարզ է, որ թիրախը քաղաքացիական ենթակառուցվածքներն էին։ Մենք դա տեսանք, դա վերաբերում է և Կութ համայնքի շենքին, և դպրոցին (Սոթքում - խմբ.)։ Մենք տեսանք բնակելի տներ, գյուղատնտեսական ենթակառուցվածքներ։ Ես կարծում եմ, որ դա խորապես մտահոգիչ է: Ես կարծում եմ, որ ամենակարեւորն այն է, որ մարդիկ վախենում են: Վարչապետը բավական հստակ հիշատակել է այդ մասին իր ելույթում։ Եվ վախը, որ դա կարող է կրկնվել, հանգեցնում է մի իրավիճակի, երբ մարդն այլևս ակտիվ չէ։ Եվ դա, իսկապես, կարող է շատ վտանգավոր լինել", - ասել է դիվանագետը, հավելելով, որ շատ լավ հասկանում է այստեղ ապրող մարդկանց վիճակը և ստեղծված իրավիճակի ողջ բարդությունը։

Միեւնույն ժամանակ, այն հարցին, թե ինչ պետք է անեն միջազգային հանրությունն ու Արեւմուտքը, որպեսզի կանգնեցնեն Ադրբեջանին, որը, չնայած բոլոր կոչերին, շարունակում է խախտել հրադադարի ռեժիմը, Վիկտորինը հիշեցրել է, որ ինքը դիվանագետ է, ով աշխատում է մի կազմակերպությունում, որը ցանկանում է օգնել լուծել խնդիրը: "Մեզ համար խնդիրը լուծելու միայն մեկ միջոց կա. նստել բանակցությունների սեղանի շուրջ և բանակցություններ վարել: ԵՄ-ը շարունակելու է դա անել։ Մեր կարծիքով ՝ սա է միակ ելքը", - ասել է Վիկտորինը։

Անդրադառնալով հայ կին զինծառայողների նկատմամբ ադրբեջանցի զինվորականների վայրագություններին միջազգային հանրության պասիվ արձագանքին ՝ Վիկտորինը հիշեցրել է, որ ԵՄ ներկայացուցիչը պատասխանել է այդ հարցին: "Բնական է, որ դա պետք է ապացուցվի։ Մենք ասում ենք, որ պատերազմական հանցագործությունը պետք է հետաքննվի, և վերջ։ Սա է պատասխանը: Մենք պետք է շարունակենք աշխատանքը դրական նոտայով", - նշել է եվրոպացի դիվանագետը։

Ճշգրտող հարցին, թե ինչով կարող է օգնել ԵՄ-ն ադրբեջանական ագրեսիայի հետեւանքով առաջացած հումանիտար խնդիրների լուծման հարցում, Վիկտորինը պատասխանել է, որ այժմ իրենք բանակցում են ԵՄ-ի կենտրոնակայանի հետ: "Մենք որոշակի փոփոխություններ կմտցնենք հումանիտար ոլորտում իրականացվող ծրագրերում։ Ինչպես ասացի, այժմ մենք USAID-ի հետ քննարկում ենք մանրամասները, թե ինչպես կարող ենք լուծել ցամաքային ականների խնդիրը: Բնականաբար, մենք կշարունակենք տնտեսական զարգացման հետ կապված մեր մեծ նախագծերը: Անցյալ գիշեր ես ցնցված էի, երբ իմացա, որ երիտասարդներ են սպանվել։ Երեկ տեղի ունեցավ համաժողով տեխնոլոգիաների և գիտության վերաբերյալ, ինչն այդքան դրական ազդակ է, քանի որ երկիրը մեծ ուշադրություն է գրավում, շատ մարդիկ գալիս են մասնակցելու այդ կոնֆերանսին, որին աջակցում են ԵՄ-ը, Գերմանիան, GIZ-ը", - ասել է դեսպանը։

Նշենք, որ Հայաստանում հավատարմագրված դիվանագիտական առաքելությունների ներկայացուցիչները (32 երկիր, 45 առաքելություն) սեպտեմբերի 29-ին այցելել էին Գեղարքունիքի մարզ, որտեղ նրանց ներկայացվել են Ադրբեջանի զինված ուժերի կողմից խաղաղ բնակավայրերի գնդակոծման հետեւանքները: Դիվանագետներին ուղեկցում էին ՀՀ տարածքային կառավարման և ենթակառուցվածքների նախարար Գնել Սանոսյանը և Գեղարքունիքի մարզպետ Կարեն Սարգսյանը: