Հունաստանի ԱԳՆ ղեկավար. Լուծումներն ու խաղաղությունը չեն կարող կառուցվել ուժի կիրառման սպառնալիքի առկայության պայմաններում

Արմինֆո.Հունաստանը բազմիցս ընդգծել է աջակցությունը բոլոր պետությունների ինքնիշխանությանն ու անկախությանը, եւ դա վերաբերում է մեր լավ բարեկամներին՝ հայերին։ Այդ մասին սեպտեմբերի 27-ին Երեւանում Հայաստանի ԱԳ նախարար Արարատ Միրզոյանի հետ ճեպազրույցի ժամանակ հայտարարել Է Հունաստանի արտգործնախարար Նիկոս Դենդիասը, նշելով, որ ուրախ է երկու տարի անց կրկին Հայաստանում գտնվելու համար։

"Մենք հավատում ենք սահմանների անխախտելիությանը։ Եվ այն, ինչ տեղի ունեցավ մի քանի օր առաջ, երբ Հայաստանի տարածքը գնդակոծվում էր ադրբեջանական զինուժի կողմից։ Այդ կապակցությամբ ցանկանում էի մեջբերել Ֆրանսիայի նախագահ Էմանուել Մակրոնի խոսքերը, որը երեկ, մասնավորապես, ասել է. "Ես դատապարտում եմ այն, ինչ տեղի է ունեցել և ուղղված է եղել խաղաղ բանակցությունների դեմ", - ասել է հույն նախարարը:

Միաժամանակ, անդրադառնալով երկկողմ հարաբերություններին, նա բարձր է գնահատել հայ և հույն համայնքների դերը համագործակցության զարգացման գործում: "Ես նաեւ կցանկանայի հստակ ուղերձներ հղել այն երկրներին, որոնք ցանկանում են վերաձեւել քարտեզները. վերաձեւման ծրագրերը ձախողվելու են։ Այս կապակցությամբ կցանկանայի հիշատակել ևս մեկ ուժ, որը փորձում է օգտվել ստեղծված իրավիճակից և նպաստում է ապակայունացմանը։ Խոսքը Թուրքիայի մասին է։ Մենք՝ հույներս, ականատեսն ենք թուրքական հռետորաբանության։ Պետք է ասեմ, որ Թուրքիան դեմ է Աթենքի կողմից որոշակի քանակությամբ պաշտպանական սպառազինության ուղարկմանը հունական կղզիներ։ Եվ դա արվում է այն պայմաններում, երբ Հունաստանը գործում է Լոզանի համաձայնագրից բխող իր պարտավորությունների շրջանակներում", - ուշադրություն է հրավիիրել Դենդիասը։

Ընդ որում, նա ուշադրություն է հրավիրել այն հանգամանքին, որ Հունաստանն անպաշտպան չի թողնում իր տարածքները, ինչը Թուրքիայի բողոքն է առաջացնում: "Այժմ էլ Թուրքիան սպառնում է Հունաստանին պատերազմով ՝ Էգեյան կղզիներից մի քանի մղոն հեռավորության վրա տեղակայելով իր ռազմական նավատորմը։ Մենք կրկնել ենք, որ պատրաստ ենք Թուրքիայի հետ կառուցողական երկխոսություն սկսել միջազգային իրավունքի շրջանակներում, բայց, դրա հետ մեկտեղ, մենք նաեւ պատրաստ ենք պաշտպանել մեր երկիրն ու մեր իրավունքները", - ասել է Դենդիասը։ Ընդ որում, նա, դիմելով թուրք գործընկերներին, կոչ է արել սխալ չհասկանալ, ընդգծելով, որ Հունաստանը կանի ամեն ինչ՝ իր երկրի եւ իր իրավունքների պաշտպանության համար:

"Մենք այսօր քննարկել ենք նաև Կովկասում անվտանգության մարտահրավերները։ Անհամբերությամբ սպասում եմ վարչապետ Փաշինյանի և պաշտպանության նախարարի հետ հանդիպմանը։ Ինչ վերաբերում է Լեռնային Ղարաբաղի հակամարտության կարգավորման վերաբերյալ մեր դիրքորոշմանը, ապա այն անփոփոխ է։ Մենք աջակցում ենք խաղաղ լուծմանը՝ փոխընդունելի զիջումների միջոցով և միջազգային իրավունքի շրջանակներում", - ասել է նա։

Ընդ որում, նա հավելել է, որ Հունաստանը ողջունում է Նիկոլ Փաշինյանի համարձակությունը, որը նոր մոտեցումներ է առաջարկել տարածաշրջանի ապագայի համար, ինչի մասին երեկ հայտարարել է Մակրոնը:

"Սակայն, լուծումները և խաղաղությունը չեն կարող կառուցվել ուժի կիրառման սպառնալիքի առկայության պայմաններում։ Դա վերաբերում է և Կովկասին, և ողջ աշխարհին ։ Հունաստանը շարունակել է աջակցել բանակցությունների մեկնարկին, նշանակալի է ԱՄՆ-ի եւ ԵՄ-ի ներդրումը: Մենք պատրաստ ենք եվրոպացի մյուս գործընկերների հետ միասին օգնել որպես միջնորդներ՝ ԵԱՀԿ Մինսկի խմբի հովանու ներքո շարունակելու բանակցությունները։ Աշխարհագրությունը փոխել մենք չենք կարող, բայց մարդիկ պետք է հնարավորություն ունենան խաղաղ ապրել կողք կողքի", - ասել է նա, հավելելով, որ Հունաստանում հավատում են հումանիտար հարցերի լուծման անհետաձգելիությանը։ Այդ համատեքստում նա ընդգծել է, որ միջազգային մարդասիրական իրավունքը պետք է հարգվի։

Վերջում, մատնանշելով երկու երկրների միջև օրինակելի հարաբերությունները, հույն նախարարն անդրադարձել է նաև երկու երկրների պատմության ընդհանուր ողբերգական էջերին՝ Օսմանյան Թուրքիայում հայերի և Պոնտոսի հույների ցեղասպանությանը և այդ առնչությամբ ՀՀ և Հունաստանի օրենսդիր մարմինների ընդունած փաստաթղթերին: "Ցանկանում եմ նաև շնորհակալություն հայտնել ձեզ Կիպրոսի Հանրապետության մի մասի ապօրինի բռնակցման հարցում ցուցաբերած աջակցության համար։ Եվ մենք անհամբերությամբ սպասում ենք Հայաստան-Հունաստան-Կիպրոս եռակողմ ձևաչափն առաջ մղելուն և որակապես նոր մակարդակի բարձրացնելուն ուղղված քայլերին", - ասել է Դենդիասը։