Նենսի Փելոսին վճռականորեն դատապարտել է Ադրբեջանի հարձակումը Հայաստանի տարածքի վրա

Արմինֆո. ՀՀ ԱԺ նախագահ Ալեն Սիմոնյանը հանդես է եկել հայտարարությամբ՝ սեպտեմբերի 18-ին ԱՄՆ Ներկայացուցիչների պալատի խոսնակ Նենսի Փելոսիի հետ հանդիպումից հետո: ԱԺ մամուլի ծառայության հաղորդման համաձայն, հայտարարությունում ասվում է.

«Քիչ առաջ ավարտվեց մեր հանդիպումն ԱՄՆ Ներկայացուցիչների պալատի խոսնակ տիկին Փելոսիի հետ։ Քննարկեցինք տարածաշրջանային խնդիրները եւ երկկողմ փոխգործակցության լայն շրջանակը:

Մեզ համար չափազանց կարեւոր է այս ծանրագույն շրջանում տիկին Փելոսիի այցը Հայաստան, ում աջակցությունը մենք մշտապես զգացել ենք ամենադժվարին եւ մեզ համար զգայուն հարցերում:

Հանդիպման ընթացքում խոսել ենք սեպտեմբերի 13-ին Ադրբեջանի կողմից Հայաստանի ինքնիշխան տարածքի նկատմամբ ռազմական ագրեսիայի մասին։ Տեղեկացրել եմ, որ ադրբեջանական զինուժը դաժան ռմբակոծությունների է ենթարկել ոչ միայն Հայաստանի սահմանային դիրքերը, այլեւ բազմաթիվ բնակավայրեր ու քաղաքացիական ենթակառուցվածքներ, որի հետեւանքով կան բազում մարդկային կորուստներ։

Հստակ է, որ Ադրբեջանի ռազմաքաղաքական իշխանությունն օգտվում է այն հանգամանքից, որ միջազգային հանրության ուշադրությունը սեւեռված է Ուկրաինային։

Երախտապարտ ենք Միացյալ Նահանգներին, որի միջնորդությամբ սեպտեմբերի 14-ին ձեռք է բերվել փխրուն զինադադարի համաձայնություն։ Շնորհակալ ենք նաեւ ԱՄՆ իշխանությանը, մասնավորապես, բազմաթիվ կոնգրեսականներին՝ Ադրբեջանի պատերազմական գործողություններին հասցեական գնահատական տալու համար։

Հանդիպմանը ներկայացրել եմ Հայաստանի Հանրապետության կողմից 2018 թ. Թավշյա հեղափոխությունից հետո ժողովրդավարական ինստիտուտների եւ օրենքի գերակայության ամրապնդման գործում արձանագրված հետեւողական առաջընթացը եւ իրականացվելիք քայլերը:

Անդրադարձել ենք հայ-ամերիկյան միջխորհրդարանական հարաբերությունների զարգացմանն ու քննարկել այդ ուղղությամբ համագործակցության ընդլայնման հեռանկարները: Այս համատեքստում բարձր եմ գնահատել Կոնգրեսի հայկական հարցերով հանձնախմբի գործունեությունը եւ իր առանցքային դերը երկկողմ կապերի ամրապնդման գործում:

ԱՄՆ Կոնգրեսը շարունակաբար ապացուցել է, որ հուսալի գործընկեր է եւ կարեւոր հարթակ, որտեղ փոխըմբռնման եւ իրական բարեկամության մթնոլորտում կարող են քննարկվել Հայաստանին, Արցախին եւ հայ ժողովրդին վերաբերող բազմաթիվ հարցեր:

Քննարկել ենք նաեւ տարածաշրջանային խնդիրներին, ինչպես նաեւ երկկողմ համագործակցությանն առնչվող այլ հարցեր։  Երկուստեք կարեւորել ենք ժողովրդավարական արժեքներին միտված համատեղ օրակարգի շարունակական ընդլայնման անհրաժեշտությունը»։

ԱՄՆ Կոնգրեսի Ներկայացուցիչների պալատի նախագահ Նենսի Փելոսին, իր հերթին, գոհունակությամբ  արձանագրել է Երևանում կայացած բանակցությունների արդյունավետությունը: ԱՄՆ Կոնգրեսի անունից նա հաստատել է ամերիկյան կողմի մտադրությունը ՝ շարունակել աշխատանքը Հայաստանի եւ տարածաշրջանի պետությունների հետ՝ անվտանգության, տնտեսության, ժողովրդավարության հարցերի շուրջ: Փելոսին նշել է, որ ԱՄՆ Կոնգրեսը կարեւորագույն դեր է խաղացել Հայոց ցեղասպանության ճանաչման հարցում, որն օրենսդրական մակարդակով ճանաչվել է 2019 թվականին եւ անցյալ տարի  հաստատվել է նախագահ Ջո Բայդենի կողմից։ Խոսքը երկկուսակցական օրենքի մասին է, որի վրա երկար ժամանակ աշխատանք է տարվել Կոնգրեսում։

Ներկայացուցիչների պալատի խոսնակը նաեւ հայտարարել է, որ Կոնգրեսի անունից դատապարտում է Ադրբեջանի հարձակումը Հայաստանի տարածքի վրա: "Անվտանգության հարցերը միշտ կարևոր են մեր հանդիպումների օրակարգի տեսանկյունից։ Տեղի է ունեցել հարձակում Հայաստանի տարածքի և ինքնիշխանության վրա։ Հայաստանը մեզ համար կարևոր նշանակություն ունի։ Մենք Կոնգրեսի անունից վճռականորեն դատապարտում ենք Ադրբեջանի մահաբեր հարվածները Հայաստանի տարածքին", - ասել է նա։ Փելոսիի խոսքով, ԱՄՆ-ը՝ որպես ԵԱՀԿ Մինսկի խմբի համանախագահ երկիր, վաղուց և հստակ արձանագրել է, որ հակամարտությունը ռազմական լուծում չի կարող ունենալ։ Ներկայացուցիչների պալատի խոսնակը նշել է, որ ամերիկյան կողմը շարունակում է հետեւել իրադարձություններին ՝ ձգտելով բանակցությունների միջոցով ղարաբաղյան հակամարտության երկարաժամկետ խաղաղ կարգավորման: Այդ կապակցությամբ նա մատնանշել է կոնգրեսականներ Ֆրենկ Փալոնի և Ջեքի Սփեյերի դերը։