Կրեմլ. Ռուսաստանի նախագահն ամեն ջանք գործադրում է հայ-ադրբեջանական սահմանին լարվածության թուլացմանը նպաստելու համար

Արմինֆո.Վլադիմիր Պուտինի և ՀՀ վարչապետ Նիկոլ Փաշինյանի հեռախոսազրույցի հունով լուրջ փորձագիտական աշխատանք է տարվում՝ հայ-ադրբեջանական սահմանին հակամարտության սրման առնչությամբ։ Այդ մասին հաղորդել է ՌԴ նախագահի մամուլի քարտուղար Դմիտրի Պեսկովը։

"Այսօր գիշերը հեռախոսազրույց է տեղի ունեցել ՀՀ վարչապետ Փաշինյանի հետ։ Քննարկվել է հայ-ադրբեջանական սահմանին տիրող իրավիճակը, այնտեղ տեղի ունեցած լուրջ էսկալացիան։ Կայացած խոսակցության հունով այժմ փորձագիտական մակարդակով ինտենսիվ աշխատանք է տարվում, հիմա ավելին առայժմ չեմ ասի։ Այդ աշխատանքի արդյունքները ստանալուն պես մենք ձեզ կտեղեկացնենք", - ասել է Պեսկովը։

"Բնականաբար, այստեղ դժվար է գերագնահատել ՌԴ-ի, անձամբ Պուտինի դերը։ Բնականաբար, նախագահն ամեն ջանք գործադրում է, որպեսզի նպաստի սահմանին լարվածության թուլացմանը։ Այդ ջանքերը շարունակվում են", - լրագրողներին ասել է Պեսկովը, պատասխանելով այն հարցին, թե Պուտինի եւ Հայաստանի վարչապետ Նիկոլ Փաշինյանի հեռախոսազրույցը ինչպես է նպաստել Հայաստանի եւ Ադրբեջանի սահմանին կրակի դադարեցմանը, հաղորդել է "ՌԻԱ Նովոստի"-ն։

Հիշեցնենք, որ սեպտեմբերի 12-ի լույս 13-ի գիշերը Հայաստանի հետ սահմանին ԱՀ զինված ուժերը լայնածավալ ռազմական գործողություններ են սկսել անօդաչու թռչող սարքերի եւ խոշոր տրամաչափի սպառազինության կիրառմամբ: Հայաստանը դիմել է Ռուսաստանին, ՀԱՊԿ-ին և ՄԱԿ-ի ԱԽ-ին ՝ Հայաստանի ինքնիշխան տարածքի դեմ Ադրբեջանի ագրեսիայի կապակցությամբ ։ Ստեղծված իրավիճակի կապակցությամբ ՀՀ ոստիկանությունն անցել է ուժեղացված ծառայության։ Հաղորդվում է երկու կողմերի զոհերի և վիրավորների մասին ։ ՀՀ վարչապետի հայտարարության համաձայն ՝ հայկական կողմն արդեն 49 զոհ ունի ։ Մոսկվայում հայտարարել են առավոտյան ժամը 09:00-ի դրությամբ կողմերի միջեւ հրադադարի մասին: Հայ-ադրբեջանական սահմանին տիրող իրավիճակի առնչությամբ Ֆրանսիան կդիմի ՄԱԿ ԱԽ-ին։