Երկուշաբթի, 8 Օգոստոսի 2022 13:14

Արմինֆո.Անկարայից շարունակում են սպառնալ Հայաստանին։

Թուրքիայի արտգործնախարար Մևլութ Չավուշօղլուն օգոստոսի 8-ին Անկարայում Թուրքիայի դեսպանների 13-րդ համաժողովի բացմանը հավաստիացրել է, որ Թուրքիան եղել և մնում է ճշմարտության կողմում և հանդես է գալիս արդարության օգտին։ Նրա խոսքով ՝ դա եղել է նաև Լեռնային Ղարաբաղի հակամարտության հարցում։

 

Այնուհետև Չավուշօղլուն ցինիկաբար հայտարարել է, որ 44-օրյա պատերազմից հետո Անկարան շարունակում է ջանքերը Հարավային Կովկասում խաղաղության և կայունության ապահովման, համագործակցության մթնոլորտի ձևավորման ուղղությամբ: "Մենք կրկին զգուշացնում ենք Հայաստանին հետագա սադրանքների անթույլատրելիության մասին", - ասել է թուրք նախարարը: "Մեր երկիրը թշնամի չէ որևէ երկրի։ Բոլոր նրանք, ովքեր հակառակն է պնդում, կանխակալ են", - ընդգծել է թուրք նախարարը, հաղորդում է "Անադոլու"-ն:

 

Նշենք, որ այսօր Անկարայում բացվել է Թուրքիայի դեսպանների 13-րդ համաժողովը: "Իմաստուն և բարյացակամ թուրքական դիվանագիտություն. 2023 և դրանից հետո" թեմայով համաժողովը կշարունակի իր աշխատանքը մեկ շաբաթվա ընթացքում: Օրակարգում, ի թիվս այլ հարցերի, նշվում են ճգնաժամային իրավիճակների կարգավորման ուղղությամբ թուրքական դիվանագիտության ջանքերը, այդ թվում ՝ Ռուսաստանի եւ Ուկրաինայի միջեւ հրադադարի ռեժիմի ապահովումը, "հացահատիկային միջանցքի" թեման, արեւելյան միջերկրածովյան տարածաշրջանում եւ ՆԱՏՕ-ում տեղի ունեցող գործընթացները: