Արմինֆո.Արևմուտքը ճնշում է գործադրում Հայաստանի նկատմամբ՝ Արցախն Ադրբեջանի մաս ճանաչելու հարցում։ Նպատակը՝ այնտեղից ռուս զինվորականների հետագա դուրս բերումն է։ Ինչից հետո՝ հայկական Սյունիքով իրար կապել Ռուսաստանը շրջապատող թյուրքական աշխարհը։ ԱրմԻնֆո-ին նման կարծիք է հայտնել քաղաքագետ Ստեփան Դանիելյանը։
"Ընդհանուր առմամբ, Արեւմուտքի առջեւ հիմա խնդիր է դրված Ռուսաստանի դեմ բացել երկրորդ ճակատ Հարավային Կովկասում։ Այդ նպատակին հասնելու ճանապարհին կա աշխարհաքաղաքական հավասարակշռություն, որը հաստատվել է Ռուսաստանի, Իրանի և Թուրքիայի միջև Աստանայի պայմանավորվածություններով։ Եվ հենց հայ-ադրբեջանական հակամարտությունը, դրա վերաաճումը լայնածավալ պատերազմի Արևմուտքին թույլ կտա ոչնչացնել այդ հավասարակշռությունը՝ բախում հրահրելով տարածաշրջանի բոլոր երկրների միջեւ", - կարծում է նա։
Քաղաքագետի գնահատմամբ՝ հարևան երկրները, մասնավորապես, Իրանը ոչ մի կերպ չեն կարողանա անմասն մնալ Հայաստանի և Ադրբեջանի միջև պատերազմ սկսվելու դեպքում: Եվ Հայաստանի Սյունիքի մարզում ու ԻԻՀ հետ սահմանին որևէ տարածքային փոփոխության անթույլատրելիության մասին հենց նույն Թեհրանից հնչող հայտարարությունները խոսում են համապատասխան արտաքին ազդակների առկայության մասին։
Որպես հետեւանք՝ իրավիճակը տարածաշրջանում, ըստ Դանիելյանի գնահատականների, չափազանց վտանգավոր է այսօր եւ հղի է, նույնիսկ, ավելի լայնածավալ պատերազմով, քան ուկրաինականը՝ արդեն վաղը: Իսկ Հայաստանի ղեկավարությունն արդեն ընտրանքի առջեւ է՝ նոր պատերազմի հեռանկարի և ՌԴ-ից լուրջ ռազմաքաղաքական ու տնտեսական կախվածության միջև։ Իսկ պատերազմով շահագրգռված են շատ լուրջ արտաքին խաղացողներ։ Մասնավորապես՝ ԱՄՆ-ը, որը չի ցանկանում աշխարհում գերիշխանությունը զիջել Չինաստանին կամ ՌԴ-ին։
"Այստեղից արմատներ է վերցնում Հարավային Կովկասում ուժերի հավասարակշռության խախտմանն ուղղված ամերիկյան ռազմավարությունը։ Որի մասն են կազմում պետքարտուղար Բլինքենի բանակցությունները Փաշինյանի և Ալիևի հետ, Իրանից, ԱՄՆ-ից և ՌԴ-ից բարձրաստիճան պաշտոնյաների այցերն անդրկովկասյան մայրաքաղաքներ և այլն: Հավասարակշռությունը կարելի է խախտել՝ օգտագործելով Հայաստանի և Ադրբեջանի միջև առկա հակասությունները: Ինչից հետո նրանց միջև պատերազմի մեջ ներքաշել Թուրքիային, Ռուսաստանին և, ի վերջո, Իրանին։ Հայաստանի ղեկավարությունը, ի պատասխան այդ բոլոր մարտահրավերների եւ սպառնալիքների, նախընտրում է ժամանակ ձգել՝ սպասելով Ուկրաինայում պատերազմի ավարտին", - ամփոփել է Դանիելյանը։