Երեթշաբթի, 28 Հունիսի 2022 10:05

Արմինֆո. Հայաստանը ռուս գործընկերների հետ աշխատանքային քննարկումներ է անցկացնում Հայաստանը Արցախի հետ կապող նոր երթուղու վերաբերյալ։ Այդ մասին առցանց մամուլի ասուլիսի ժամանակ հայտարարել է ՀՀ վարչապետ Նիկոլ Փաշինյանը։

 

Նա նշել է, որ ներկայում ընթանում է ճանապարհի շինարարություն, որը Լաչինի միջանցքին այլընտրանք կդառնա։ 2020 թվականի նոյեմբերի 9-ի եռակողմ հայտարարության համաձայն, երեք տարվա ընթացքում կողմերի համաձայնությամբ պետք է տեղի ունենա տվյալ միջանցքի երթուղու փոփոխություն, որի արդյունքում նախկին ԼՂԻՄ-ից դուրս գտնվող տարածքները կհանձնվեն Ադրբեջանին: Երթուղու փոփոխության նպատակը Հայաստանի և Լեռնային Ղարաբաղի միջև առավել ամուր և հուսալի ավտոմոբիլային հաղորդակցության ապահովումն է: "Բերձորի բնակիչների խնդիրները մենք լուծում ենք ՀՀ կառավարության որոշումներով ։ Բնակչությունը, իհարկե, պետք է ապահովված լինի տներով։ Ինչ վերաբերում է Աղավնոյին, ապա Աղավնո գյուղի բնակիչների խնդիրները կարող են լուծվել Արցախի կառավարության միջոցներով",- ասել է վարչապետը, հավելելով, որ երթուղու փոփոխությունը պետք է տեղի ունենա այն բանից հետո, երբ ռուս խաղաղապահները վերահսկողություն սահմանեն նոր երթուղու նկատմամբ։ Նա ընդգծել է, որ միջանցքը պետք է գտնվի ռուս խաղաղապահների լիակատար վերահսկողության ներքո, հույս հայտնելով, որ նոր երթուղին ավելի լավ որակի կլինի:

 

Վարչապետն անդրադարձել է նաև հայ ռազմագերիների հարցին։ Նրա խոսքով, պաշտոնական Բաքուն փորձեր է ձեռնարկում վարկաբեկելու Ղարաբաղում ռուս խաղաղապահներին եւ այդ պատճառով չի վերադարձնում ռազմագերիներին: Փաշինյանն ընդգծել է, որ այն անձանց 90 տոկոսը, որոնց գերեվարումը հաստատվել է, գերի են դարձել ռուս խաղաղապահների տեղակայումից հետո եւ նրանց պատասխանատվության գոտում, ինչի մասին հայկական կողմը բազմիցս խոսել է ռուս գործընկերների հետ հանդիպումների ժամանակ: Նա որպես օրինակ նա հիշատակել է նոյեմբերի 9-ի եռակողմ հայտարարության ստորագրումից հետո Խծաբերդում տեղի ունեցած դեպքը, երբ գերեվարվեց հայ զինծառայողների մեծ խումբ: Վարչապետը նշել է, որ Խծաբերդի դե յուրե տարածքը պետք է լիներ ռուս խաղաղապահների հսկողության ներքո, սակայն տեղի են ունեցել փոփոխություններ։ Տեղաբաշխման դիրքերը մի քանի անգամ վերանայվել են քարտեզների հիման վրա: Փաշինյանը նշել է, որ Հայաստանը, Ռուսաստանը եւ միջազգային հանրությունը պետք է միջոցներ ձեռնարկեն բոլոր գերիներին վերադարձնելու համար: Ներկայումս ադրբեջանական գերության մեջ է գտնվում երկու խումբ. մեկ խումբը, որոնց գտնվելը հաստատվել է Բաքվի իշխանությունների կողմից, նրանց թիվը 38 է, իսկ երկրորդ խումբը' անձինք, որոնց գերեվարման մասին տեղեկատվություն է եղել, սակայն հակառակ կողմի հաստատում չկա: Հայկական կողմը նրանց համարում է բռնի անհետացած։ Փաշինյանը հիշեցրել է, որ գերիների հարցը բարձրացվում է բոլոր աշխատանքային հանդիպումների ժամանակ, եւ կան դատական գործընթացներ միջազգային կառույցներում: "Մենք հետևողական կլինենք, որպեսզի բոլորը վերադառնան հայրենիք", - ընդգծել է նա: