Երեթշաբթի, 14 Հունիսի 2022 16:33

Արմինֆո. Այսպես թե այնպես, սակայն Հայաստանին ռուսական զենքի մատակարարումները շարունակվելու են։ ԱրմԻնֆո-ին նման կարծիք է հայտնել Ռազմավարությունների եւ տեխնոլոգիաների վերլուծության կենտրոնի տնօրեն Ռուսլան Պուխովը:

 

"Հայաստանը ՌԴ-ի համար կարեւոր ռազմավարական նշանակություն ունի մեր հարավային սահմաններին։ Եվ հարկ է նշել, որ Հարավային Կովկասում և հարակից տարածաշրջաններում թուրքական հզորացմանը զուգընթաց մեծանում են Հայաստանի թե նշանակությունը, թե դերը։ Ավելին, Հայաստանի աշխարհագրական դիրքը թույլ է տալիս անհրաժեշտության դեպքում ռազմական ճնշում գործադրել Թուրքիայի նկատմամբ՝ Ռուսաստան-Հայաստան հանգույցում։ Ինչը Երեւանին տալիս է չափազանց կարեւոր եւ անփոխարինելի դաշնակցի կարգավիճակ Մոսկվայի աչքերում", - համոզված է փորձագետը։

 

Ռուսական սպառազինության մատակարարումների առնչությամբ սպասվող բարդությունների թվում Պուխովն առանձնացրել է ՌԴ-ին արգելափակելու, միջազգային մի շարք ձևաչափերից դուրս մղելու Արևմուտքի արշավը։ Նրա կանխատեսմամբ՝ դա անխուսափելիորեն կվերաբերի նաեւ Մոսկվայի ռազմատեխնիկական համագործակցությանը գործընկերների հետ, ինչի արդյունքում, ի վերջո, Արեւմուտքին կհաջողվի Ռուսաստանին դուրս մղել սպառազինությունների վաճառքի որոշ շուկաներից: Արդյունքում՝ ռուսական ռազմարդյունաբերական համալիրն արդեն չի կարողանա տարեկան 15 մլրդ դոլար բերել։

 

"Եվ, իհարկե, դաշնակից երկրներին ռուսական սպառազինությունների մատակարարման հետ կապված լրացուցիչ բարդություններ է կրում Ուկրաինայում մեր հատուկ ռազմական գործողության ձգձգումը։ Այժմ մենք այնտեղ մարդկանց եւ տեխնիկայի զգալի կորուստներ ունենք, որոնք ստիպված ենք լրացնել: Հասկանալի է, որ այդ գործոնը նույնպես բացասաբար կանդրադառնա արտասահման, այդ թվում ՝ դաշնակիցներին մատակարարումների վրա։ Ընդ որում, ինչպես ժամկետների, այնպես էլ գների առումով, որոնք անխուսափելիորեն կաճեն", - կանխատեսում է փորձագետը։

 

Այդուհանդերձ, վերը նշվածը, Հայաստանի դերն ու աշխարհաքաղաքական նշանակությունը ՌԴ-ի համար, ըստ Պուխովի, Մոսկվայի համար  այլընտրանք չեն թողնում, քան Երեւանին անհրաժեշտ ռազմարդյունաբերական արտադրանքի մատակարարման շարունակումը։ Այս լույսի ներքո, չնայած բոլոր օբյեկտիվ դժվարություններին, ՀՀ զինված ուժերի հզորացման համար անհրաժեշտ սպառազինության մատակարարումները կշարունակվեն: Այդ թվում՝ սեփական կարիքները երկրորդ պլան մղելու հաշվին։