Արմինֆո. Վտանգ չներկայացնելով գործող իշխանության համար՝ ներկայիս ներքաղաքական մրրկայնությունը Հայաստանում կարող է դեռ բավականին երկար շարունակվել։ ԱրմԻնֆո-ին նման կարծիք է հայտնել Կովկասի ինստիտուտի տնօրեն Ալեքսանդր Իսկանդարյանը։
"Իրավիճակն այնպիսին է, որ այսօր Հայաստանի խորհրդարանում կառավարող կուսակցությունը միայնակ, ինքնուրույն որոշումներ կայացնելու բոլոր հնարավորություններն ունի։ Նման պայմաններում ընդդիմությանը մնում է միայն քննադատել այդ որոշումները, քանի որ դրանց ընդունմանը նա չի կարող մասնակցել իր փոքրաթիվ լինելու պատճառով։ Ինչը նրան այլընտրանք չի թողնում, քան՝ դժգոհությւոնը փողոց հանել", - նշել է նա։
Նշելով ընդդիմության տրամադրության տակ առայժմ ռեսուրսների առկայությունը՝ բողոքի շարժման ընթացիկ ակտիվությունն ապահովելու համար, քաղաքագետն ընդգծել է դրա ավելացման հեռանկարների բացակայությունը: Վերջինը նա պայմանավորում է հայ հասարակության ամենամեծ սոցիալական շերտի առկայությամբ, որը չի վստահում ոչ իշխանությանը, ոչ ընդդիմությանը։
Այդ շերտը, ըստ քաղաքագետի, քաղաքական ապատիայի մեջ է և, պարզապես, չի պատրաստվում հանրահավաքներին մասնակցել։ Ավելին, արդեն չցանկանալով քվեարկել Նիկոլ Փաշինյանի օգտին, բոլոր այդ մարդիկ բացարձակապես պատրաստ չեն սատարել Ռոբերտ Քոչարյանին կամ Սերժ Սարգսյանին, որոնք գործող իշխանության համար խրտվիլակ են ծառայում՝ իրենց վերադարձի հեռանկարով իսկ բնակչությանը վախեցնելու համար։ Հասարակության անվստահությունն ավելի է ամրապնդում ընդդիմությունն ինքը՝ սեփական ծրագրի բացակայությամբ՝ իշխանությունից Նիկոլ Փաշինյանի հիպոթետիկ հեռացման դեպքում։
"Այսպիսով, ներքաղաքական դաշտում առկա իրավիճակը կարելի է համեմատել նախահեղափոխական իրավիճակի հետ՝ թույլ իշխանություն, թույլ ընդդիմություն։ Այո, ներկայիս փողոցային ակցիաները շատ նման են նրանց, որոնք եղել են մինչեւ 2018-ի գարունը: Բայց այն ժամանակ առիթ են ծառայել առավելապես սոցիալ-տնտեսական խնդիրները, իսկ այսօր, պարզապես, իշխող ուժին իշխանությունից հեռացնելու պահանջներ են հնչում։ Իսկ վերջինս, պարզապես, սպասում է, թե երբ բողոքի ցույցերն ինքնըստինքյան կմարեն կամ կսկսեն նյարդայնացնել մարդկանց։ Իսկ մնացած բոլորը, պարզապես, կողքից հետևում են կատարվողին։ Հասկանալի է, որ նման պայմաններում բողոքի շարժումը չի կարող իշխանության համար ռիսկեր ստեղծել կարճաժամկետ եւ միջնաժամկետ հեռանկարում", - կանխատեսում է Իսկանդարյանը։