Արմինֆո. Հայաստանը շարունակում է մնալ Արցախի անվտանգության երաշխավորը։ Այդ մասին հայտարարել է Անվտանգության խորհրդի քարտուղար Արմեն Գրիգորյանը։
ԱԽ քարտուղարը հավելել է, որ 44-օրյա պատերազմից հետո աճել է նաև Ռուսաստանի դերն այստեղ: "Այն եղել է նաեւ դրանից առաջ, բայց 44-օրյայից հետո հատկապես աճել է՝ Լեռնային Ղարաբաղում տեղակայված խաղաղապահ զորակազմի տեսքով",- հայտարարել է Գրիգորյանը՝ անդրադառնալով արցախցիների եւ Արցախի հասցեին ՔՊ-ի պատգամավորների սկանդալային հայտարարություններին:
Նա նաև հիշեցրել է, որ Հայաստանը շարունակում է սոցիալ-տնտեսական օգնություն ցուցաբերել Արցախին, և այն հասել է աննախադեպ մակարդակի։ Նրա խոսքով՝ միայն 2021 թվականին Հայաստանն Արցախին տրամադրել է 400 մլն դրամ օգնություն, որն, ինչ-որ իմաստով, պարունակում է անվտանգության բաղադրիչ։ "Եվ այդ առումով Հայաստանը շարունակում է լինել անվտանգության բաղադրիչ Արցախի համար", - ասել է Գրիգորյանը civilnet.am-ին հարցազրույցում:
Այս համատեքստում նա նշել է, որ Հայաստանը, իմանալով, որ գլոբալ առումով հայկական պետականության հիմնական հենասյունն է, մշտապես աջակցել է Արցախին առկա խնդիրների լուծման գործում, այդ թվում ՝ անվտանգության ոլորտում: "Կարծում եմ ՝ Հայաստանն այսուհետեւ էլ շարունակելու է դա անել։ Բայց մենք նաև պետք է հաշվի առնենք աշխարհաքաղաքական տեղաշարժերը, և որոշ դեպքերում վտանգի տակ կարող է հայտնվել Հայաստանի ինքնիշխանությունը։ Եվ, կարծում եմ, այս համատեքստում մտքեր են արտահայտվել այն մասին, որ Հայաստանը խնդիրներ ունի իր ինքնիշխանության տեսանկյունից։ Եվ այդ հարցը մնում է առանցքային գործոն մեր իշխող ուժի համար, և պետք է ամեն ինչ անել ՀՀ ինքնիշխանությունը պաշտպանելու համար", - ասել է նա։
Ճշգրտմանը, թե, այնուամենայնիվ, կա Հայաստանի և Արցախի պետական շահերի տարանջատում, Գրիգորյանը վստահեցրել է, որ դա ոչ թե պետական շահերի տարանջատում է, այլ, ընդամենը, հասկացողություն, թե որտեղ է գտնվում կենտրոնը, և որն է առաջնահերթությունը։ "Եթե չլինի Հայաստան, չի լինի Արցախ", - ասել է նա:
Լրագրողի դիտարկմանը, թե առանց Արցախի չի լինի նաև Հայաստան, Գրիգորյանը, մասնավորապես, ասել է. "Կա նման բան, այդ պատճառով Հայաստանը մեծ ջանքեր է գործադրում Արցախի պաշտպանության եւ անվտանգության համար: Եվ արտաքին քաղաքականության օրակարգում մեծ դեր ունի Արցախը"։
Անդրադառնալով հայ-ադրբեջանական սահմանի սահմանազատման գործընթացին' Գրիգորյանը հավաստիացրել է, որ այդ հարցերով զբաղվելու լիազորություն ունեցող հանձնաժողովը կքննարկի սահմանային հարցերը եւ անվտանգության հետ կապված հարցերը: Այս համատեքստում նա եւս մեկ անգամ հիշեցրել է զորքերի հայելային հետ քաշման վերաբերյալ հայկական կողմի առաջարկի մասին՝ սահմանազատման եւ սահմանագծման գործընթացի անցկացման համար ավելի բարենպաստ, հանգիստ մթնոլորտ ստեղծելու նպատակով։
Անդրադառնալով բրյուսելյան բանակցություններին՝ Գրիգորյանը նշել է, որ Հայաստանի իշխանություններն ամեն ինչ անում են, որպեսզի դրանք լինեն թափանցիկ ՝ շահարկումների առիթ չտալու համար։
Անդրադառնալով հարցին, թե արդյոք Լեռնային Ղարաբաղի հարցը ներառելու է Ադրբեջանի հետ համապարփակ խաղաղության պայմանագիր, ԱԽ քարտուղարը նշել է, որ, դա բնական է: Այդ առումով նա հիշեցրել է Ադրբեջանի 5 առաջարկների, Հայաստանի պատասխան կետերի մասին, որտեղ, ինչպես հավաստիացրել է ԱԽ քարտուղարը, նշվում են նաեւ Լեռնային Ղարաբաղի հայերի անվտանգության եւ իրավունքների հարցերը, որից պետք է բխի նաեւ Արցախի կարգավիճակը: "Բնականաբար, խաղաղությունը չի կարող չանդրադառնալ Լեռնային Ղարաբաղին։ Մեծ հաշվով, սահմաններին և հաղորդակցությունների ապաշրջափակմանն առնչվող մյուս երկու առանցքային հարցերը լրջորեն փոխկապակցված են Լեռնային Ղարաբաղի հետ։ Կարծում եմ, որ եթե չլիներ ղարաբաղյան հարցը, հազիվ թե այդ երկու հարցերը լինեին", - ասել է նա։
ԱԽ քարտուղարը նաև վստահեցրել է, որ թե Մոսկվայում, թե Բրյուսելում քննարկվում են նույն հարցերը, այդ թվում ՝ Արցախի կարգավիճակը: