Երեւանում բացվել է "Ուկրաինական ֆորում" ՀԿ՝ Ուկրաինայի փախստականներին օգնելու համար

Արմինֆո.Երևանում Ուկրաինայից փախստականներին օգնություն ցուցաբերելու նպատակով բացվել է "Ուկրաինական ֆորում" բարեգործական հասարակական կազմակերպությունը, որի նախաձեռնողն ու հիմնադիրը ծնունդով Օդեսայից Ելենա Շեւչուկն է:

Նա շուրջ 10 տարի ապրում է Հայաստանում եւ ուկրաինական համայնքի ակտիվ մասնակիցներից է: Վերջին 2 տարիներին Ելենան ուկրաիներեն է դասավանդել Հայաստանի ուկրաինացիների ֆեդերացիային առընթեր կիրակնօրյա դպրոցում: Իսկ Ուկրաինայում ռազմական գործողությունների սկսվելուց ի վեր Շեւչուկը ՀՀ-ում բնակվող ուկրաինացիների հետ համատեղ նախաձեռնել է խաղաղ ակցիաների անցկացում ՝ ի պաշտպանություն պատմական հայրենիքի։

ԱրմԻնֆո-ի թղթակցի հետ զրույցում նա պատմել է, որ կազմակերպության գործունեությունը,  կարիքավորներին մարդասիրական օգնություն տրամադրելուց զատ, նախատեսում է գործընկեր կազմակերպությունների և մասնավոր նախաձեռնությունների միջոցով հոգեբանական օգնություն ցուցաբերել, աջակցել ապաստանի հարցում, բուժսպասարկմանը, երեխաների համար կրթական գործընթացի ապահովմանը: Բացի այդ, կանոնադրությունը նախատեսում է տարբեր սոցիալական, կրթական նախագծերի կազմակերպում, որոնք արդեն ակտիվորեն իրականացվում են ՀԿ-ի ստեղծման առաջին իսկ օրվանից: Շեւչուկն՝ ինքը, ստեղծված կազմակերպությունն անվանում է սիրո եւ ազատության տարածք: Նա ընդգծել է, որ "Ուկրաինական ֆորումն" այն վայրն է, որտեղ մարդը կարող է գալ իր դժվարություններով ։ Հարցին, թե աառավելապես ինչ օգնության կարիք ունեն ուկրաինացի փախստականները, ինչով կարող են այսօր օգնել Հայաստանի սրտացավ քաղաքացիները, Շեւչուկը նշել է, որ առավել պահանջված ակտիվը կարեկցանքն է: "Հիմնական պահանջը ոչ թե բրինձ, հնդկաձավար ստանալն է, այլ, պարզապես, ընդունված լինելը, լսելի լինելը,  կարեկցանքի արժանանալը։ Ըմբռնումն այժմ ստեղծված իրավիճակում Ուկրաինայից փախստականներին օդի պես անհրաժեշտ է: Եվ այս կառույցն ստեղծվել է, հիմնականում, նրա համար, որ բոլոր այդ մարդիկ հասկանան, որ իրենք այստեղ միայնակ չեն", - պատմել է ՀԿ-ի հիմնադիրը։

Շեւչուկը պատմել է, որ ՀԿ-ի համար տարածք վարձակալել հաջողվել է, հիմնականում, Հայաստանի քաղաքացի մասնավոր անձանց միջոցների եւ իր անձնական ֆինանսական միջոցների շնորհիվ: Տարածքը բարեկարգվել է՝ ինչպես Հայաստանի քաղաքացիների, այնպես էլ ուկրաինական համայնքի ներկայացուցիչների ուժերով։ "Հնարավոր է, որ այդ բոլոր գործընթացների նախաձեռնողը ես եմ, բայց ինձ ոչինչ չէր հաջողվի՝ առանց կարեկից մարդկանց աջակցության", - ընդգծել է կազմակերպության ղեկավարը:

Այսօր Շևչուկի թիմում կա շուրջ 30 մարդ, որոնք ներգրավված են ուկրաինացի փախստականներին օգնություն ցուցաբերելու բոլոր գործընթացներում։ Ուշագրավ է, որ "Ուկրաինական ֆորումի" կամավորական շտաբ են մտել ոչ միայն այստեղի հայերն ու ուկրաինացիները, այլև՝ ռուսները, որոնք դեմ են Ուկրաինայի պատերազմին։

Նորաստեղծ կազմակերպությանն օգնության համար այսօր դիմում են, հիմնականում,

փախստականներ Խարկովից, Կիևից, Մարիուպոլից, ինչպես հայեր, այնպես էլ ուկրաինացիներ։ «Նրանք առայժմ շատ չեն, բայց բոլոր նրանք, ովքեր եկել են մեզ մոտ,  ձեռնունայն չեն հեռացել", - ասել է Շեւչուկը:

Հետագայում, ըստ նրա, նախատեսվում է հայկական բանկերից մեկում բացել հաշիվ, որին հնարավոր կլինի գումար փոխանցել ողջ աշխարհից՝  փախստականներին օգնություն ցուցաբերելու համար: Հետագա տարիներին, եթե դրա անհրաժեշտությունը լինի,  կազմակերպությունը պատրաստ է աջակցել նաև արցախցի փախստականներին։

Կիսվելով իր անձնական պատմությամբ՝ Ելենա Շեւչուկը պատմել է, որ հայրենի Օդեսայում, որը վերջին ժամանակներս ավելի ու ավելի հաճախ են հրթիռակոծում, ապրում են նրա ծնողներն ու հարազատ եղբայրը։ "Իմ կյանքը պատերազմի սկսվելուց հետո կտրուկ փոխվեց։ Եվ այն ամենը, ինչ այսօր անում եմ, իմ միջոցն է դիմադրելու տեղի ունեցող սարսափին", - ասել է Շեւչուկը։

Նշենք, որ "Ուկրաինական ֆորում" ՀԿ-ն համագործակցում է "Մենք ենք" հիմնադրամի, "Syunik - Development" ՀԿ-ի, ինչպես նաև Հայաստանի միգրացիոն ծառայության հետ: