Հինգշաբթի, 12 Մայիսի 2022 20:41

Արմինֆո. Հայաստանի, Ադրբեջանի և Ռուսաստանի արտաքին գործերի նախարարներ Ջեյհուն Բայրամովը, Արարատ Միրզոյանը և Սերգեյ Լավրովը մայիսի 12-ին Դուշանբեում ԱՊՀ արտգործնախարարների խորհրդի հարթակներում քննարկել են Ղարաբաղի վերաբերյալ եռակողմ հայտարարությունների կատարմանը և Բաքվի ու Երևանի միջև հարաբերությունների կարգավորմանն առնչվող հարցեր: Ըստ ՏԱՍՍ-ի՝ այդ մասին հաղոդել է Ադրբեջանի ԱԳՆ մամուլի ծառայությունը։

 

"Հանդիպմանը կողմերը քննարկել են տարածաշրջանում առկա իրավիճակը եւ եռակողմ հայտարարությունների կատարման հետ կապված հարցեր", - ասվում է հաղորդագրությունում: ԱԳՆ-ի տվյալներով՝ տեղի է ունեցել կարծիքների փոխանակում "Ադրբեջանի եւ Հայաստանի միջեւ հարաբերությունների կարգավորման, այդ թվում ՝ պետական սահմանի սահմանազատման գործընթացի մեկնարկի, տրանսպորտային եւ հաղորդակցության բոլոր գծերի բացման, երկու երկրների միջեւ խաղաղության պայմանագրի համաձայնեցման հետ կապված հարցերի շուրջ": "Կողմերը կարեւորել են ձեռք բերված պայմանավորվածությունների կատարումը՝ հանուն տարածաշրջանում խաղաղության եւ անվտանգության ապահովման", - նշվում է հաղորդագրությունում:

 

Ըստ ՏԱՍՍ-ի՝ հանդիպման սկզբում ՌԴ արտաքին գործերի նախարար Սերգեյ Լավրովը շնորհակալություն է հայտնել Ադրբեջանի եւ Հայաստանի իր գործընկերներին այն բանի համար, որ նրանք արձագանքել են "երեքով հանդիպում անցկացնելու համար ԱՊՀ ԱԳՆԽ-ին մասնակցությունից օգտվելու ռուսական կողմի առաջարկին, ինչը թույլ կտա շարունակել եռակողմ հայտարարությունների կատարումը դիտարկելու ուղղությամբ  համատեղ աշխատանքը", որոնք ավելի վաղ ընդունվել էին բարձր մակարդակով: "Մենք շահագրգռված ենք, որպեսզի Հարավային Կովկասը վերածվի խաղաղության, կայուն զարգացման, բարգավաճման գոտու", - ասել է Ռուսաստանի դիվանագիտական գերատեսչության ղեկավարը, հավելելով, որ Մոսկվայի համար կարեւոր է կողմերի միջեւ վստահության բարձրացումը՝ հայ-ադրբեջանական հարաբերությունների լիարժեք կարգավորման համար պայմաններ ստեղծելիս: "Ես հույս ունեմ, որ այսօրվա հանդիպումը թույլ կտա առաջ շարժվել այն ճանապարհով, որը գծվել է մեր ղեկավարների կողմից", - նշել է Լավրովը:

 

Ադրբեջանի ԱԳՆ ղեկավար Բայրամովը, իր հերթին, բացման խոսքում ընդգծել է, որ այդ հանդիպումը "լավ հնարավորություն է քննարկելու առաջընթացը, որը կարող է ձեռք բերվել": Ընդ որում, նա ափսոսանք է հայտնել, որ առայժմ տարածաշրջանում տրանսպորտային հաղորդակցությունների բացման աշխատանքների պատշաճ բարելավումներ չկան: "Գիտեմ, որ գործընկերների միջեւ շփումները շարունակվում են։ Եվ կարծում ենք, որ կա լավ հեռանկար, լավ հնարավորություն արդյունքի հասնելու և եռակողմ հայտարարություններն ամբողջությամբ կատարելու համար, - ասել է նա։ - Վերջին շրջանում մենք բավականին ինտենսիվ շփումներ ենք ունեցել պետական սահմանի սահմանազատման գործընթացի մեկնարկի տեսանկյունից: Կարծում եմ, որ կան լավ մշակումներ, ըմբռնումներ սահմանազատման հանձնաժողովում կողմերի կազմի եւ ներկայացուցչական լինելու տեսանկյունից, ու, նաեւ կարծում եմ, որ առաջիկայում հնարավոր կլինի, առնվազն, գործարկել այդ գործընթացը": Բայրամովը նշել է, որ Բաքուն, իր կողմից, "պատրաստ է սկսել խաղաղության պայմանագրի շուրջ աշխատանքը" այն դեպքում, երբ նախարարների հանդիպումը, կողմերի շփումների պահպանումը "դրականորեն կանդրադառնան այդ թեմայի շուրջ քննարկման շարունակության վրա":

 

Հայաստանի արտաքին գործերի նախարար Միրզոյանն ընդգծել է, որ Երեւանը եղել եւ մնում է հավատարիմ  երեք երկրների ղեկավարների միջեւ բոլոր պայմանավորվածությունների եւ հայտարարությունների կատարմանը: "Մենք պատրաստ ենք շարունակել բոլոր աշխատանքները գործող ձևաչափերով՝ տարածաշրջանում տնտեսական ենթակառուցվածքների հաղորդակցությունների բացման և խաղաղության պայմանագրի, կամ, ինչպես հավանաբար, ավելի ճիշտ է ասել, հարաբերությունների կարգավորման, հարաբերությունների հաստատման պայմանագրի շուրջ, մնացած բոլոր խնդիրների լուծման ուղղությամբ, ներառյալ հումանիտար, ռազմագերիների ազատումը և այլ խնդիրները, որոնք մնում են չլուծված", - ասել է նա:

 

Մինչ այդ Լավրովն առանձին հանդիպումներ է անցկացրել Ադրբեջանի և Հայաստանի իր գործընկերների հետ։