Արմինֆո.Բաքվում արձագանքել են գերիների մասին ՀՀ վարչապետ Նիկոլ Փաշինյանի հայտարարություններին։
Ադրբեջանի ԱԳՆ-ում հայտարարել են, որ Փաշինյանի հնչեցրած մեղադրանքները համարում են "անհիմն եւ կասկածի տակ են դնում Երեւանի անկեղծությունը Բաքվի հետ հարաբերությունների կարգավորման եւ տարածաշրջանում խաղաղության հասնելու հարցում":
"Ադրբեջանի նկատմամբ Հայաստանի վարչապետի կողմից առաջադրված անհիմն մեղադրանքները, ներառյալ հումանիտար հարցերի վերաբերյալ իրականությունից հեռու պնդումները, ցույց են տալիս, որ Հայաստանի ղեկավարությունը բոլորովին անկեղծ չէ երկու երկրների միջեւ հարաբերությունների կարգավորման հարցում։ Հայաստանի կողմից ականապատ տարածքների քարտեզների տրամադրումը "մարդասիրական ժեստ" չէ, դա Երեւանի պարտավորությունն էր 2020 թվականի նոյեմբերի 10-ի եռակողմ հայտարարության շրջանակներում: Այդ փաստաթղթի ստորագրումից հետո Ադրբեջանում ականների զոհ է դարձել 219 մարդ, հիմնականում, քաղաքացիական անձինք: Ինչ վերաբերում է ձերբակալված հայերին չվերադարձնելու մեղադրանքներին, ապա Բաքուն նրանց համարում է պատերազմի ավարտից հետո Ադրբեջանի տարածք ուղարկված դիվերսանտներ: Ադրբեջանի հասցեին անհիմն մեղադրանքները կասկածի տակ են դնում հանուն խաղաղության գործելու Հայաստանի պատրաստակամությունը", - ասել է Ադրբեջանի ԱԳՆ պաշտոնական ներկայացուցիչ Լեյլա Աբդուլաեւան։
Աբդուլաեւայի տրամաբանությամբ՝ ստացվում է, որ համաձայնագրով պարտավորություններ ունի միայն Երեւանը, իսկ Բաքվի համար դրանք պարտադիր չեն։ Հարկ է նաև նշել, որ եռակողմ հայտարարության մեջ ոչ մի խոսք չկա ականապատ տարածքների քարտեզների փոխանցման մասին, սակայն 2020թ. նոյեմբերի 9-ի հայտարարության 8-րդ կետը վերաբերւոմ է "բոլորին բոլորի դիմաց" սկզբունքով ռազմագերիների և պահվող անձանց փոխանակման անհրաժեշտությանը:
Նշենք, որ մայիսի 11-ին Նիդերլանդներում Նիկոլ Փաշինյանն անդրադարձել է Բաքվում պահվող հայ գերիների վերադարձի հարցին։ Նա ափսոսանք է հայտնել, որ չնայած 2020թ. նոյեմբերի 9-ի հայտարարությանը, բազմաթիվ միջազգային կազմակերպությունների կոչերին, 44-օրյա պատերազմի ընթացքում գերեվարված ՀՀ քաղաքացիները դեռ չեն վերադարձվել։ "Սա մարդկանց քաղաքական նպատակներով օգտագործելու և նրանց առևտրի առարկա դարձնելու պրակտիկա է, ինչը շատ դատապարտելի է", - ասել է Նիկոլ Փաշինյանը, ընդգծելով, որ հենց նման սակարկությունից խուսափելու նպատակով է ժամանակին որոշում կայացրել Ադրբեջանին փոխանցել ականապատ տարածքների քարտեզնները: Հայկական կողմը հույս ուներ, որ այդ մարդասիրական քայլին կհետևի մեկ այլ մարդասիրական քայլ։ "Այնուամենայնիվ, այսօրվա դրությամբ Ադրբեջանում մնում են մեր առնվազն 38 գերիներ (ոչ պաշտոնական տվյալներով դրանք շատ ավելի շատ են - խմբ.): Անընդհատ փորձեր են արվում այդ գործընթացը դարձնել առեւտրի առարկա տարբեր թեմաներով: Ի դեպ, վերջին անգամ Եվրախորհրդի նախագահի ներկայությամբ Ադրբեջանի նախագահը խոստացել էր ազատ արձակել գերիների եւս մեկ խմբի, սակայն դա առայժմ տեղի չի ունեցել։ Կարծում եմ՝ չի կարելի խոսել խաղաղության մասին, անտեսելով հարցի հումանիտար կողմը, մենք դա գործնականում ցույց ենք տվել", - ասել է Նիկոլ Փաշինյանը։