Արմինֆո. Եվրասիայում աշխարհաքաղաքական անկայունությունը դեռ մի տաս տարի կշարունակվի։ Համապատասխանաբար, մենք պետք է պատրաստ լինենք դիմակայել ցնցումներին այդ ողջ ժամանակահատվածում։ ԱրմԻնֆո-ին այդպիսի կարծիք է հայտնել Արցախի Հանրապետության նախկին արտգործնախարար, արտակարգ և լիազոր դեսպան Արման Մելիքյանը։
"Խոսքը Եվրասիայի վերաֆորմատավորման մասին է։ Եվ մենք պետք է պատրաստ լինենք նշված ժամանակահատվածում ռուսական "ԽՍՀՄ 2.0" աշխարհաքաղաքական նախագծի գործարկմանը։ Ի դեպ, այդ անվանումը պայմանական է եւ դրա իրական բովանդակության եւ ռազմավարական նպատակների հետ որեւէ առարկայական կապ չի ունենալու: Իսկ այդ նախագծի կարևորագույն տարրը, կարծես, Ռուսաստանի և Եվրոպայի միջև բացարձակ ջրբաժանի անցկացումն է", - նկատել է նա։
Դիվանագետը դժվարացել է պատասխանել այն հարցին, թե արդյոք Հայաստանը Ռուսաստանի հետ միասին կհայտնվի հիպոթետիկ ջրբաժանի այս կողմում։ Նրա կանխատեսմամբ, այս հարցի պատասխանը կախված է Մոսկվայի ցանկությունից: Մասնավորապես, արդյոք նա նման պահանջ կներկայացնի Երեւանին, թե, այնուամենայնիվ, կնախընտրի հայկական "պատուհանը դեպի Եվրոպա" բաց պահել, այդ թվում՝ սեփական կարիքների համար։
Արցախի շուրջ ստեղծված իրավիճակը դիվանագետը բնութագրում է ալիեւյան ռեժիմի ձգտմամբ՝ տարբեր սադրանքների միջոցով արցախցիներին ստիպել լքել սեփական տները՝ զուգընթաց Երեւանին պարտադրելով բազմաթիվ զիջումներ։ Մինչդեռ, Ուկրաինան օրինաչափորեն Արցախը հետ է մղում Մոսկվայի նախապատվությունների երկրորդ պլան՝ զուգահեռաբար ամրապնդելով այժմ արդեն Կովկասում երկրորդ ռազմաճակատ բացելու նրա ցանկության բացակայությունը։ Այս լույսի ներքո և նման ֆոնին՝ Մելիքյանը համոզված է ադրբեջանական ռազմական սադրանքները չեզոքացնելու համար ինքնուրույն որոնումների և բազմաթիվ ելքեր գտնելու անհրաժեշտության հարցում: Ինչպես քաղաքական եւ դիվանագիտական, այնպես էլ ռազմական եղանակներով։
Նման աշխարհաքաղաքական իրավիճակում չբացառելով նոր լայնամասշտաբ պատերազմի հավանականությունը՝ Մելիքյանն ընդգծել է նաև նման սցենարին Հայաստանի նախապատրաստման անհրաժեշտությունը։ Այս համատեքստում նա համոզմունք է հայտնել, որ նման հեռանկարի անխուսափելիության դեպքում անհրաժեշտ է պայմաններ ստեղծել այն Հայաստանի համար առավել բարենպաստ և հարմար ժամանակահատվածում սկսելու համար:
"Համոզված եմ, որ զինված ուժերի բարեփոխումից զատ Հայաստանի ղեկավարության առաջնահերթ խնդիրը աշխարհազորի տարածքային կառույցների հնարավորինս արագ ձևավորումն է: Ինչպես նաեւ ռմբապաստարանների սարքավորումը քաղաքացիական բնակչության պաշտպանությունն ապահովելու նպատակով, պարենի եւ դեղորայքի պաշարների ստեղծումը: Այս ամենը պետք է անել Ադրբեջանի հետ բանակցություններին եւ խաղաղության մասին խոսակցություններին զուգահեռ։ Խաղաղության մասին խոսակցություններին զուգահեռ ամենակարեւոր քայլը պետք է դառնան դիվանագիտական եւ իրավաքաղաքական քայլերը՝ նոր պատերազմի վտանգը կանխելու ուղղությամբ",-ամփոփել է դիվանագետը։