Արմինֆո.Ադրբեջանի հետ սահմանների սահմանազատման եւ սահմանագծման գործընթաց սկսել հենց այնպես, հեշտությամբ՝ ՌԴ պաշտպանության նախարարության առաջարկով, Հայաստանը, բնականաբար, չի կարող։ ԱրմԻնֆո-ին այդպիսի կարծիք է հայտնել "Հանուն հանրապետության" կուսակցության առաջնորդ Արման Բաբաջանյանը՝ մեկնաբանելով ՌԴ ՊՆ երեք առաջարկներին համաձայնություն տալու վերաբերյալ ՀՀ վարչապետ Նիկոլ Փաշինյանի հայտարարությունը։
"Քչերը գիտեն, բայց այս տարվա հունիսին ՀՀ պաշտպանության նախարարության և Կադաստրի պետական ծառայության աշխատակիցներից կազված աշխատանքային խումբն այդ ուղղությամբ աշխատանքներ է իրականացրել և համապատասխան առաջարկություններ է ներկայացրել կառավարությանը։ Մեզ թվում էր, թե արդյունքում Հայաստանի համար ռիսկերը հաջողվել է նվազագույնի հասցնել։ Բայց, ահա մենք տեղեկանում ենք դեմարկացիայի վերաբերյալ Մոսկվայի երեք առաջարկների մասին: Կարող եմ ենթադրել, որ իմ հիշատակած աշխատանքային խումբը ձևավորվել է ՌԴ ՊՆ երկրորդ առաջարկի հիման վրա", - նկատել է նա։
Նշված երեք առաջարկությունների հիման վրա սահմանազատումն ու սահմանագծումը գնահատելով որպես շատ առումներով հայ ժողովրդի եւ պետության ապագան որոշող՝ Բաբաջանյանը կանխատեսել է, որ այդ գործընթացը կարող է ապագայում որոշիչ դեր խաղալ հայոց պետականության հետագա գոյության գործում: Այս լույսի ներքո քաղաքական գործիչը միանգամայն անթույլատրելի է համարում բավական արագ ընթացող գործընթացներն ինքնահոսի թողնելը։
Արձանագրելով, որ միակ երկիրը, որին պարբերաբար օգնության համար դիմում է Հայաստանը, մնում է միայն Ռուսաստանը, Բաբաջանյանը հարց է ուղղել Երեւանից Վաշինգտոն, Փարիզ կամ Թեհրան համանման զանգերի բացակայության պատճառների մասին: Ընդգծելով այս փուլում Հայաստանի պետականության համար ուժային ճնշման միջոցով սահմանների հստակեցման բոլոր բացասական հետեւանքները կանխատեսելու անհնարինությունը՝ քաղաքական գործիչն ընդգծել է այդ գործընթացի հետեւանքների անշրջելիությունը Հայաստանի համար:
"Ուզում եմ հատկապես նշել, որ ՌԴ ՊՆ առաջարկների մասին վարչապետի հայտարարությունն անակնկալ էր Հայաստանում հավատարմագրված դիվանագիտական կորպուսի համար։ Անհրաժեշտ է օտարերկրյա դեսպանների հետ հետևողական աշխատանք տանել՝ դրա համար մոբիլիզացնելով տեղի ունեցողի մասին իրազեկ քաղաքական, վերլուծական-փորձագիտական և հասարակական ուժերը։ Այդ ամենը պետք է համակարգվի մեկ կենտրոնից։ Մեզ հենց հիմա օգնություն են առաջարկում։ Վիթխարի աջակցություն եւ օգնություն ցուցաբերելու պատրաստակամություն է հայտնվել ", - ասել է նա։
Բաբաջանյանն անհրաժեշտ է համարում նաև ճանապարհաշինության և այլ պետական ներդրումների անհապաղ կրճատումը։ Առկա բոլոր միջոցները, ողջ ներուժը, նրա կարծիքով, պետք է ուղղված լինեն անվտանգությանն առնչվող խնդիրների լուծմանը՝ կարճաժամկետ, միջնաժամկետ եւ երկարաժամկետ հեռանկարկում։ Հայաստանի ԱԳՆ բոլոր դիվանագիտական հնարավորությունների, խորհրդարանական դիվանագիտության, ԵԱՀԿ ԽՎ-ում, ԱՊՀ-ում, ՆԱՏՕ-ում, ՀԱՊԿ-ում եւ ԵԽԽՎ-ում հայաստանի պատվիրակության գործարկմամբ դա պետք է արդյունք տա եւ աշխարհի ուշադրությունը կենտրոնացնի 44-օրյա պատերազմի հետեւանքների եւ Հայաստանի նկատմամբ Ադրբեջանի վերջին ագրեսիայի վրա:
"Հայաստանի և, համապատասխանաբար, աշխարհի ներկայիս լռությունը, պարզապես, հանցավոր է։ Հայաստանի շուրջ ձևավորված բարդագույն մարտահրավերներն ու սպառնալիքները մեկ քաղաքական ուժի համար անհաղթահարելի են։ Դրանց լուծումը պահանջում է ազգային ջանքերի համակարգում։ Հայաստանը դադարի կարիք ունի՝ իրավիճակը կայունացնելու և դիրքերն ամրապնդելու համար։ Եթե մենք շարունակենք նույն ոգով, ինչպես հիմա, մեզ չեն ների ոչ մեր նախնիները, ոչ էլ մեր սերունդները", - ամփոփել է քաղաքական գործիչը։