Արմինֆո. Հայաստանի դուրս բերումը անվտանգությանն առնչվող ընթացիկ, անընդհատ խորացող խնդիրներից, առաջին հերթին, պայմանավորված է մեր ղեկավարության հոգեբանության, համապատասխանաբար,մտածողության փոփոխությամբ։ ԱրմԻնֆո-ին այդպիսի կարծիք է հայտնել անկախ վերլուծաբան Սարո Սարոյանը։
"Դրանից հետո միայն մեր ղեկավարությունն ի վիճակի կլինի գիտակցել մեր տարածաշրջանում կեղծ խաղաղասիրության գաղափարների հիման վրա քաղաքականություն կառուցելու անհնարինությունը։ Միայն այդ ժամանակ հնարավոր կլինի հայկական real politic-ի ձևավորումը տարբեր տերությունների շահերը համադրող, որոշ չափով ագրեսիվ-միլիտարիստական քաղաքականության հիման վրա, որը թույլ կտա լուծել Հայաստանի անվտանգության ապահովման խնդիրները", - ընդգծել է նա:
Հայաստանի անվտանգությունը ապահովելուն կոչված ինստիտուտների աշխատանքի փաստացի տեղապտույտի ֆոնին՝ այդ նույն անվտանգության հետ կապված նոր խնդիրների ի հայտ գալը, մասնավորապես, Սյունիքի ուղղությամբ, Սարոյանի կարծիքով, միանգամայն կանխատեսելի էր։ Հատկապես՝ Բաքվի ագրեսիվ ռազմատենչ տրամադրվածության ֆոնին, որն արդեն մեկ տարի ձգտում է ամեն գնով զարգացնել նախորդ տարվա հաջողությունը ռազմավարական բնույթի խնդիրը լուծելու նպատակով ՝ ապահովել ուղիղ ցամաքային կապ Ադրբեջանի և Թուրքիայի միջև։
Նման թյուրքական հավաքական վճռականության ֆոնին՝ ակնկալել, թե Բաքուն եւ Անկարան կհրաժարվեն օգտվել ընձեռված հնարավորությունից՝ ի շահ Երևանի խաղաղասիրության, վերլուծաբանի կարծիքով, ապարդյուն է։ Հետեւաբար, բարիդրացիական հարաբերությունների կառուցմանն ուղղված Հայաստանի ներկայիս խաղաղասիրական քաղաքականությունը ապրիորի չի համապատասխանում, ընդհանուր առմամբ, աշխարհաքաղաքական իրողություններին և, մասնավորապես, թուրք-ադրբեջանական տանդեմի նպատակներին։
Ընթացիկ աշխարհաքաղաքական իրողությունները, որոնք ֆոն են ծառայում Հայաստանի շուրջ իրավիճակի համար, ըստ Սարոյանի, բնութագրվում են թուրքական էքսպանսիայով Անկարայի քաղաքականության կարևորագույն ուղղություններից մեկում՝ դեպի Արևելք։ Նրա գնահատմամբ՝ թյուրքական աշխարհի գաղափարի գոյության միջոցով Թուրքիան այսօր էական հնարավորություններ է ձեռք բերել դեպի Կենտրոնական Ասիայի երկրներ էքսպանսիայի համար։ Այդ թվում ՝ Աֆղանստանում տեղի ունեցած վերջին իրադարձությունների լույսի ներքո, ինչը ստիպում է հարևան երկրներին անվտանգության ապահովման նոր աղբյուրներ փնտրել, քանի որ արդեն բոլորը գիտակցում են այդ անվտանգությունն ապահովելու Ռուսաստանի անկարողությունը։
"Եվ, ահա, Թուրքիայի էքսպանսիոնիստական ծրագրերի իրականացումը պահանջում է տարածման ուղիներ։ Իսկ դեպի Արևելք նման միակ ճանապարհը Թուրքիայի համար Հարավային Կովկասն է, իսկ ավելի ճիշտ՝ հայկական Սյունիքը։ Այդ պատճառով մենք բոլորս պետք է մեզ համար շատ հստակ պարզենք տարրական մի ճշմարտություն. Թուրքիան երբեք կանգ չի առնի։ Եվ Ադրբեջանի աջակցությամբ ու միջոցով շարունակելու է փորձել ամեն գնով լուծել դրված խնդիրը։ Նրանք փորձեցին միջանցք ճեղքել Սյունիքի հարավում, Մեղրում և այնտեղ անմիջապես բախվեցին են Իրանին։ Ըստ այդմ, այժմ թուրքերը փորձում են շրջանցել այդ խոչընդոտը և Իրանի սահմանից հեռու նոր ճանապարհ գտնել Սյունիքում՝ Սև լճի շրջանում, այժմ՝ արդեն Վայոց ձորում։ Եվ այս ֆոնին՝ մեր հիմնական խնդիրն այն է, որ մենք դեռ հույս ունենք, թե թուրքերը կանգ են առնելու", - ամփոփել է վերլուծաբանը։