Արմինֆո.Լեռնային Ղարաբաղի համար ուղիղ մեկ տարի առաջ տեղի ունեցած 44-օրյա պատերազմում Հայաստանի կրած պարտությունն Ադրբեջանին առանձնաապես շահ չի բերել։ ԱրմԻնֆո-ին այդպիսի կարծիք է հայտնել ԱՊՀ երկրների ինստիտուտի եվրասիական ինտեգրման և ՇՀԿ զարգացման բաժնի վարիչ, ռազմական փորձագետ Վլադիմիր Եվսեևը։
"Անկասկած, երկրորդ ղարաբաղյան պատերազմը հանգեցրեց տարածաշրջանում ուժերի հաշվեկշռի փոփոխության։ Մասնավորապես, Հայաստանի զգալի թուլացման, ինչն ուղեկցվում է Բաքվի կողմից Երեւանի վրա ուժային ճնշման ուժեղացմամբ։ Ամրապնդվել է Թուրքիայի դիրքը, հատկապես, Նախիջեւանի Ինքնավար Հանրապետությունում։ Ընդ որում, 2020 թվի պատերազմում Ադրբեջանը մեծ կորուստներ է կրել, ուստի նրա հաղթանակը էական հաղթանակ չի թվում երկրի բնակչության աչքերում, ինչն արդեն իշխանությունների համար խնդիր է դարձել", - ընդգծել է նա։
Մասնավորապես, փորձագետի կարծիքով, անցյալ տարվա պատերազմի արդյունքները լուրջ խնդիր են դարձել վերջին երկու տասնամյակների ընթացքում Ադրբեջանում իրականացվող քարոզչության համար: Այսպես, չնայած երկրի իշխանությունների երկարամյա հավաստիացումներին, թե վիճելի տարածքները կբնակեցվեն, գործնականում, ազատագրումից անմիջապես հետո, առայժմ այնտեղ ավելանում է միայն ռազմական ներկայությունը, ընդ որում՝ ոչ միայն ադրբեջանական: Ըստ Եվսեևի՝ խոսքը Լեռնային Ղարաբաղի տարածքում մինչև 2 հազար սիրիացի գրոհայինների ներկայության մասին է, որոնք սպասում են իրենց ընտանիքների ժամանմանը։
Նրա կանխատեսմամբ՝ ռուս խաղաղապահները կմնան Ղարաբաղում այնքան ժամանակ, քանի դեռ այնտեղ կա հայ բնակչություն, որպեսզի երաշխավորեն, որ հայերը չեն արտաքսվի։ Ընդ որում, հաշվի առնելով Բաքվի կողմից ռազմական հակամարտության հրահրումը, Եվսեեւը բնավ չի բացառում դրա վերսկսումը. Լեռնային Ղարաբաղի հիմնախնդիրը մինչ օրս լուծված չէ: Ընդ որում, նրա կարծիքով, ապագայում իրավիճակի փոփոխությունը եւ Հայաստանի զինված ուժերի վերականգնումը լիովին կարող են հանգեցնել հակամարտության ռազմական փուլ տեղափոխելու փորձերինէ արդեն Երեւանի կողմից:
"Ֆրանսիայի եւ ԱՄՆ-ի ղեկավարության կողմից հետեւողականություն դրսեւորելու դեպքում ԵԱՀԿ Մինսկի խումբը լիովին կարող է վերադառնալ իր գործառույթներին ողջ ծավալով։ Մինչդեռ, Ռուսաստանն իրեն լիովին վստահ եւ հարմարավետ է զգում նաեւ Հայաստանի եւ Ադրբեջանի հետ աշխատանքքի գոյություն ունեցող եռակողմ ձեւաչափում։ Մասնավորապես, Մինսկի խմբի աշխատանքի հաջողությունը պայմանավորված է այն թեմատիկայով, որի շուրջ բանակցություններ են ընթանալու համանախագահների միջնորդությամբ։ Մենք տեսնում ենք, որ Բաքուն հակամարտությունը համարում է ավարտված եւ սպասում է անցյալ տարվա պատերազմի արդյունքների իրավաբանական ամրապնդման: Մինչդեռ, Երևանը շարունակում է բարձրացնել Ղարաբաղի կարգավիճակի հարցը, ինչում վայելում է Փարիզի և Վաշինգտոնի աջակցությունը։ Բոլորը փորձում են ընթացիկ իրավիճակում պահպանել սեփական շահերը, եւ այս փուլում բանակցությունները դեռ ապարդյուն են", - ամփոփել է ռազմական փորձագետը։