Արմինֆո.Ընդդիմությունը հայտարարել է Հայաստանի, Ադրբեջանի եւ Ռուսաստանի ղեկավարների միջեւ տխրահռչակ եռակողմ հայտարարության ստորագրման տարեդարձի կապակցությամբ հակակառավարական բողոքի ակցիաների վերսկսման մասին:
Այս հայտարարությունն արվել է այն բանից հետո, երբ ԶԼՄ-ներում տարածվել է տեղեկատվություն այն մասին, որ նոյեմբերի 9-ին նախատեսվում է Հայաստանի եւ Ադրբեջանի ղեկավարների հանդիպում՝ Ռուսաստանի միջնորդությամբ, որի ընթացքում կստորագրվի հաշտության պայմանագիր, որը, ի թիվս այլ բաների, ենթադրում է սահմանազատման եւ սահմանագծտման գործընթացի սկիզբ: Տեղեկատվական լցոնումն արվել է ՀՀ վարչապետի նախկին խորհրդական Արսեն Խառատյանի կայքի միջոցով։
Այս առնչությամբ ՀՅԴ Գերագույն մարմնի ներկայացուցիչ, "Հայաստան" ընդդիմադիր դաշինքի պատգամավոր Իշխան Սաղաթելյանը հաղորդել է, որ Երեւանի քաղաքապետարանին տեղեկացրել է նոյեմբերի 9-ին եւ 10-ին Ազատության հրապարակում հանրահավաքներ անցկացնելու մտադրության մասին՝ ժամը 18:00-ից մինչեւ 20:30-ը: Քաղաքապետարանն, իր հերթին, նշել է, որ տեղեկությունն ընդունվել է ի գիտություն։
Այս հաղորդագրությանն արձագանքել են նաև Հայաստանի արտաքին քաղաքական գերատեսչությունում։
ՀՀ ԱԳՆ մամուլի քարտուղար Վահան Հունանյանը նշել է, որ այս պահին Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի միջև որևէ հանդիպում չի նախատեսվում: Նրա ասելով՝ հանդիպումների ձևաչափի վերաբերյալ կան տարբեր առաջարկներ, որոնք քննարկման փուլում են։
«Վարչապետ Փաշինյանը մի քանի անգամ հայտարարել է, որ Հայաստանի Հանրապետությունը պատրաստ է բարձր և բարձրագույն մակարդակով վերսկսել Լեռնային Ղարաբաղի հիմնախնդրի կարգավորման շուրջ բանակցություններն Ադրբեջանի հետ՝ ԵԱՀԿ Մինսկի խմբի համանախագահության շրջանակներում և մանդատի ներքո: Միևնույն ժամանակ, 2021 թվականի հունվարի 11-ի հայտարարության հիման վրա՝ Հայաստանը ներգրավված է եռակողմ (Հայաստան, Ռուսաստան, Ադրբեջան) աշխատանքային քննարկումներում, որոնք վերաբերում են տարածաշրջանի տրանսպորտային կոմունիկացիաների ապաշրջափակմանը: 2021 թվականի մայիսից ի վեր եռակողմ ֆորմատով քննարկվել է նաև ՀՀ տարածքից ադրբեջանական զինված ուժերի ստորաբաժանումների դուրսբերումը ու Հայաստանի և Ադրբեջանի սահմանների դելիմիտացիայի և դեմարկացիայի գործընթացի հնարավոր մեկնարկի գաղափարը, որը մինչ այս պահը կյանքի չի կոչվել: Սահմանների դելիմիտացիայի և դեմարկացիայի, ինչպես նաև տարածաշրջանային կոմունիկացիաների բացման հարցում խորհրդատվական օժանդակություն ցուցաբերելու պատրաստակամություն են հայտնել ԵԱՀԿ Մինսկի խմբի մյուս երկու համանախագահող երկրները՝ ԱՄՆ-ն և Ֆրանսիան, ինչպես նաև Եվրամիությունը:
Հայաստանի Հանրապետության կառավարությունը վերը նշված օրակարգի մասին հայտարարել է դեռ ամիսներ առաջ և հետևողական է լինելու դրա առաջմղման, Հայաստանի Հանրապետության և Արցախի շահերը պաշտպանելու, տևական խաղաղություն և կայունություն հաստատելու հարցում:
Միևնույն ժամանակ ուզում եմ ընդգծել, որ այս պահի դրությամբ Հայաստանի վարչապետի և Ադրբեջանի նախագահի միջև որևէ հանդիպում նախատեսված չէ։ Կան տարբեր ֆորմատներով տարբեր հանդիպումների առաջարկներ, որոնք քննարկման փուլում են:
Ուզում եմ նաև ընդգծել, որ այս թեմայի շուրջ որոշ շրջանակների տարածած լուրերը ակնհայտ սադրիչ բնույթ ունեն և իրականությանը չեն համապատասխանում: Իրավիճակի մեջ ճիշտ կողմնորոշվելու համար խորհուրդ կտայի ուսումնասիրել 2021 թվականի հունվարի 11-ի մոսկովյան եռակողմ հանդիպմանը նախորդած լուրերը, պնդումները, «բացահայտումները», ծանոթանալ հանդիպման արդյունքներին ու բովանդակությանը և հետահայաց վերլուծել, թե որքանո՞վ էին համապատասխանում հանդիպումից առաջ տարածվող լուրերը իրականությանը», - ասվում է Հունանյանի ֆեյսբուքյան էջում զետեղված հաղորդագրությունում: