Դիվանագետ. Անհրաժեշտ է Հայաստանի ազգային, պետական շահերի իրացման գաղափար

Արմինֆո.Հայաստանի հասցեին  պարբերաբար հնչող Ալիևի սպառնալիքների, մեր սահմանամերձ գյուղերի գնդակոծությունների, մեր զինվորականների պարբերական սպանությունների ֆոնին հայ հասարակության ինքնակազմակերպումը շարունակում է մնալ չափազանց ցածր մակարդակի վրա։ ԱրմԻնֆո-ին այդպիսի կարծիք է հայտնել Արցախի ԱԳՆ նախկին ղեկավար, արտակարգ եւ լիազոր Դեսպան Արման Մելիքյանը:

Օգոստոսի 16-ին ադրբեջանական բանակը ինտենսիվ կրակ է բացել Գեղարքունիքի մարզի Կութ եւ Նորաբակ գյուղերի, ինչպես նաեւ Սոթքի լեռնանցքի ուղղությամբ: Փամփուշտներն ընկել են որոշ բնակելի տների տանիքներին։ Մայիսի 12-ից սկսած ադրբեջանցի զինվորականները ՀՀ Սյունիքի եւ Գեղարքունիքի մարզերում խախտել են պետական սահմանը: Լարվածության ևս մեկ օջախ գտնվում է Արարատի մարզի Երասխ գյուղի մոտակայքում։ Բոլոր այդ հատվածներում պարբերաբար գնդակոծություններ են տեղի ունենում ադրբեջանական կողմից։ Միայն օգոստոսի 16-ին ադրբեջանցի դիպուկահարները սպանել են Հայաստանի ԶՈՒ երկու զինծառայողի։

"Խնդիրն այն է, որ ինչպես արտահերթ խորհրդարանական ընտրություններից առաջ, այնպես էլ հետո գործող իշխանություններին այդպես էլ չհաջողվեց հասարակությանը համախմբել իրենց շուրջ։ Դրա համար, նախևառաջ, անհրաժեշտ է բուն գաղափար, որը թույլ է տալիս ապահովել մեր ազգային, պետական շահերի իրագործումը։ Գաղափար, որի շրջանակում հնարավոր կլինի իրականացնել, պաշտպանել մեր երկրի շահերը հնարավոր առավելագույն չափով՝ ներկայիս աշխարհաքաղաքական իրողություններում", - ընդգծել է նա։

Նման գաղափար Հայաստանում, ըստ դիվանագետի, դեռեւս չկա։ Մինչդեռ, հենց նման, կոնկրետ գործողություններով ամրապնդված գաղափարը կարող էր հայ հասարակությանը հավատ ներշնչել ապագայի հանդեպ։ Ավելին, կառավարությանը չի հհհհաաաջողվում, նույնիսկ, արագ համալրել դեռեւս թափուր տեղերը անվտանգության ապահովման և դիվանագիտության ոլորտներում, ինչը, նրա կարծիքով, խոսում է իշխանության աշխատասենյակներում իրավիճակի ողջ բարդության լիարժեք ըմբռնման բացակայության մասին։

Որպես հետևանք՝ Հայաստանն այս փուլում, դիվանագետի կարծիքով, ի վիճակի չէ համարժեք արձագանքել իր առջև ծառացած մարտահրավերներին։ Եվ սեփական գաղափարների, առաջարկությունների, հարթակի և աշխատունակ իշխանության բացակայության պայմաններում, համապատասխանաբար, պատրաստ չէ արդյունավետ բանակցություններ վարել Արցախի նույն կարգավիճակի որոշման ուղղությամբ։

"Մինչդեռ, ի տարբերություն մեզ, Ալիևը նման բանակցությունների պատրաստ է, քանի որ կրկին, ի տարբերություն մեզ, ունի դեռևս տասնյակ տարիներ առաջ հստակ ձևակերպված պահանջներ։ Հենց այդ պատճառով էլ Ադրբեջանը ձգտելու է հնարավորինս պոկել Հայաստանից ։ Առաջին հերթին՝ տարածքներ: Իսկ հետո արդեն հասնել Երևանի կողմից իր ռազմաքաղաքական գերազանցության և իր կողմից վերահսկվող հաղորդակցություններով ուղղահայաց առևտրատնտեսական հարաբերությունների ճանաչմանը։ Ալիեւի ընդհանուր նպատակն է Հայաստանին կախվածության մեջ գցել Ադրբեջանից", - ամփոփել է Մելիքյանը։