Արմինֆո.Գոյություն ունի Ադրբեջանի կողմից Արցախում և Հայաստանի հետ սահմանին նոր ռազմական բախումների սանձազերծման վտանգ, և այսօր այն միանգամայն շոշափելի է։ ԱրմԻնֆո-ին այդպիսի կարծիք է հայտնել Հայաստանի պահպանողական կուսակցության առաջնորդ Միքայել Հայրապետյանը։
"Ես անձամբ այդ սպառնալիքը պայմանավորում եմ ռուս-թուրքական գործընկերության առկայության փաստով։ Հենց այդ փաստն է, որ լուրջ մտահոգություն է հարուցում ԵՄ-ում, մասնավորապես, Ֆրանսիայում։ Եվ հենց այդ փաստով է պայմանավորված մեր քաղաքակրթական դաշնակիցների կողմից Հայաստանին առաջարկվող ֆինանսական օգնությունը։ Եվ այսօր մենք պետք է ոչ թե սպասենք ապագա աշխարհաքաղաքական փոթորիկների՝ Մոսկվայի և Անկարայի կատարմամբ, այլ ակտիվորեն նախապատրաստվենք դրանց՝ դրանք շահեկան դիրքում դիմավորելու նպատակով։ Համոզված եմ, որ դա հնարավոր է։ Բայց դրա համար անհրաժեշտ է քաղաքական մտքի և պետական մտածողության առկայություն", - ընդգծել է նա։
Քաղաքական գործչի գնահատմամբ, չնայած իր ողջ կարեւորությանը, բարեկամ Ֆրանսիայի նախագահ Էմանուել Մակրոնի առաջիկա այցը Հայաստան էական փոփոխություններ չի բերի Հայաստանի շուրջ ստեղծված իրավիճակում: Առաջին հերթին, այն պատճառով, որ Ֆրանսիան, ցավոք, ի զորու չէ միայնակ լրջորեն փոխել Ռուսաստանի ծրագրերը։ Եվ այսօրվա իրողությունները, ըստ Հայրապետյանի, պահանջում են, որ Ֆրանսիայի ջանքերին այդ ուղղությամբ միանա ԱՄՆ-ը։ Առանց դրա, նրա կարծիքով, հնարավոր չի լինի սասանել Թուրքիայի և Ռուսաստանի կողմից տարածաշրջանում ձևավորված ստատուս-քվոն։
Մեկնաբանելով Եվրախորհրդի նախագահ Շառլ Միշելի Հայաստան կատարած այցի արդյունքները՝ Հայրապետյանն այն գնահատել է շատ կարեւոր եւ խորհրդանշական։ Նրա գնահատմամբ՝ Երևանում Միշելի հնչեցրած հայտարարություններն արժանի են խորը երախտագիտության։ Եվ այսօր Հայաստանը, նրա կարծիքով, պետք է ընդառաջ քայլեր անի Եվրոպայի ուղղությամբ։ Քայլեր, որոնք Երևանից ակնկալում են Բրյուսելում։
Հուլիսի 16-17-ը Երեւանում գտնվող Եվրոպական խորհրդի նախագահ Շառլ Միշելը Նիկոլ Փաշինյանի հետ համատեղ ճեպազրույցի ժամանակ հնչեցրել է "տարածաշրջանում ներգրավված լինելու" Եվրամիության ցանկությունը: "ԵՄ-ն ցանկանում է Հայաստանի հավատարիմ և ակտիվ գործընկերը դառնալ նրա բարեկեցության, կայունության և անվտանգության ապահովման գործում։ Ես ձեզ շատ ուժեղ ուղերձ եմ հղում ՝ մենք ձեր կողքին ենք։ Ես վերահաստատում եմ եմ 2.6 մլրդ եվրո աննախադեպ ֆինանսական փաթեթ տրամադրելու ԵՄ մտադրությունը՝ Հայաստանի առաջնահերթ խնդիրների լուծմանն աջակցելու նպատակով", - նշել է Միշելը։
Ընդ որում, ըստ քաղաքական գործչի գնահատականների, այս փուլում Եվրամիության հնարավորությունները հանգում են Հայաստանի խոցելի տարածքների ենթակառուցվածքների ամրապնդմանն ու ուժեղացմանն աջակցությանը: Իսկ տարածաշրջանում ԵՄ ազդեցության էական աճ կարելի է ակնկալել միայն այն դեպքում, եթե նման լիազորություններ Բրյուսելին պատվիրակի Երևանի հիմնական և իրական դաշնակից Վաշինգտոնը։
"Մենք պետք է իրատես լինենք։ Եվ եթե մենք իսկապես ձգտում ենք խաղաղության հաստատման, մենք պետք է հասկանանք, որ դա հնարավոր կլինի բացառապես Հայաստանի և Թուրքիայի միջև ուղիղ երկխոսության հաստատման դեպքում՝ շրջանցելով Ռուսաստանի բոլոր հատուկ շահերը։ Կարծում եմ, որ ստեղծված պայմաններում Թուրքիան պատրաստ է նման երկխոսության։ Եվ, իհարկե, մենք պետք է կոտրենք մեր զզվելի երկհարյուրամյա կարծրատիպերը և խավարից դուրս գանք լույս աշխարհ", - եզրափակել է Հայրապետյանը։