Քաղաքագետ. Հայաստանը հայտնվել է պատային իրավիճակում Արեւմուտքի եւ Ռուսաստանի միջեւ  

Արմինֆո.Այս փուլում տարածաշրջանում ընթանում է արտաքին ուժերի, մասնավորապես, ԱՄՆ-ի շահերով պայմանավորված գործընթաց, որն առնչվում է Ռուսաստանի, Թուրքիայի և Ադրբեջանի գործողություններին։ ԱրմԻնֆո-ին այդպիսի կարծիք է հայտնել Կառուցողական կուսակցության առաջնորդ, քաղաքագետ Անդրիաս Ղուկասյանը։

"Խոսքը վերաբերւոմ է Հայաստանի եւ Ադրբեջանի միջեւ սահմանազատման-սահմանագծման գործընթացի նկատմամբ ԱՄՆ-ի ուշադրությանը եւ այդ ուղղությամբ Երեւանին ու Բաքվին հասցեագրված Մոսկվայի առաջարկություններին: Կարևոր է նշել ընտրություններից հետո Մոսկվայի նախաձեռնության տակ իր ստորագրությունը դնելու Նիկոլ Փաշինյանի համաձայնությունը։ Այսպիսով, այսօր խոսքը գնում է ոչ թե, նույնիսկ, Հայաստանի ինչ-որ նոր զիջումների մասին, այլ զիջումների իրականացման մասին, որոնց Հայաստանի կապիտուլյացիայի ստորագրման օրը արդեն ստացվել է Երեւանի համաձայնությունը", - ընդգծել է նա։

Քաղաքագետի գնահատմամբ՝ Հայաստանն այսօր չի կարող այդ զիջումներն էլ իրականացնել։ Առաջին հերթին, հենց Փաշինյանի՝ այդ բոլոր հակահայկական նախաձեռնություններն ու նախագծերը լեգիտիմացնելու անկարողության պատճառով։ Աանկարողություն, որը Փաշինյանը չի կարող փոխել անգամ իշխանության նկատմամբ վստահության հերթական մանդատը ստանալուց հետո։ Հայաստանի վարչապետի նման կաշկանդվածությունը Ղուկասյանը պայմանավորում է այդ հարցի վերաբերյալ ԱՄՆ-ի և Ֆրանսիայի դիրքորոշումներով։

Մեկնաբանելով ընթացիկ իրավիճակը, հայ-ադրբեջանական սահմանին լարվածությունը, մասնավորապես, հայ զինծառայողի սպանությունը, քաղաքագետը գնահատել է որպես միանգամայն կանխատեսելի և սպասելի։ Նրա կարծիքով, գործերի նման վիճակին, ցավոք սրտի, նպաստում է նաեւ Հայաստանի քաղաքացիների որոշակի թվի ընտրությունը վերջին խորհրդարանական ընտրություններում:  Նա նաեւ նշել է սահմանին սպանությունների եւ այլ հանցագործությունների դադարեցման որեւէ հույսի իսպառ բացակայությունը սահմանազատումից եւ սահմանագծումից հետո:

Ռուս սահմանապահների տեղակայումը հայ-ադրբեջանական սահմանին, քաղաքագետի կարծիքով, նպատակ է հետապնդում ընդամենն ամրապնդել ընթացիկ իրավիճակը։ Եվ ռուս զինծառայողներից հայերի նկատմամբ այլ վերաբերմունք ակնկալել, քան դա եղել է, օրինակ, Խծաբերդում ադրբեջանցիների կողմից սպանված և գերեվարված հայ զինվորականների նկատմամբ, նրա կարծիքով, պետք չէ։ Այս լույսի ներքո՝ ռուսական ներկայությունը սահմանին, նրա կանխատեսմամբ, միայն լրացուցիչ անպատժելիություն կհաղորդի ադրբեջանցիների հանցագործություններին։

"Այսպես թե այնպես, բայց, ամեն դեպքում, այսօր ակնհայտ են ԵԱՀԿ Մինսկի խմբի համանախագահների ձևաչափի շրջանակներում Արցախի կարգավիճակի հարցի լուծման հասնել Ֆրանսիայի և ԱՄՆ-ի մտադրություններն ու վճռականությունը։ Սակայն այդ մտադրությունները հակասում են Ադրբեջանի մտադրություններին։ Որպես հետևանք՝ վերջինս միտումնավոր սրում է իրավիճակը սահմանին՝ սեփական ծրագրերն առաջ մղելու նպատակով։ Ի՞նչ է անում Ռուսաստանը՝ ի պատասխան։ Ըստ էության, լուռ համաձայնություն է դրսեւորում՝ ի պատասխան հայ զինծառայողների սպանություններին։ Այսպիսով, այսօրվա իրավիճակը, որում հայտնվել է Հայաստանը, կարելի է բնութագրել որպես պատային: Մենք չենք կարող ոչ համագործակցել Արևմուտքի հետ, ոչ լեգիտիմացնել այն իրողությունները, որոնք ձգտում է տարածաշրջանում հաստատել Ադրբեջանը", - ամփոփել է Ղուկասյանը։