Արմինֆո.8-րդ գումարման խորհրդարանի աշխատանքի, առնվազն, առաջին ամիսներին դրա օրակարգում հիմնական տեղ կզբաղեցնեն Նիկոլ Փաշինյանի, Ռոբերտ Քոչարյանի եւ Սերժ Սարգսյանի փոխադարձ մեղադրանքները։ ԱրմԻնֆո-ին այդպիսի կարծիք է հայտնել արտակարգ և լիազոր դեսպան, ԼՂՀ նախկին արտգործնախարար Արման Մելիքյանը։
"Նախկին նախագահներն ու նրանց մերձավոր շրջապատը վարչապետին ու նրա թիմին կմեղադրեն պատերազմի նախադրյալներ ստեղծելու, Ադրբեջանի ու Թուրքիայի ագրեսիային արժանի հակահարված տալու անկարողության, կապիտուլյացիայի մեջ։ Ցավոք, նման օրակարգն, ամենայն հավանականությամբ, Ազգային ժողովը վերածելու է հաղթանակած "պողպատե թավիշի" և պարտված "ղարաբաղյան կլանի" անզիջում պայքարի թատերաբեմի", - ընդգծել է նա։
Խորհրդարանի դերի և գործառույթների նման նենգափոխումը, դիվանագետի կանխատեսմամբ, սպառնում է բացասական հետևանքներով Արցախի և Հայաստանի փոխհարաբերություններում՝ արդեն հասարակական մակարդակով։ Ըստ Մելիքյանի ՝ անցյալի և ներկայի այս պայքարը լիովին ի վիճակի է էլ ավելի խորացնել արհեստական անդունդը Հայաստանի հայերի և արցախահայության միջև։ Որպես արդյունք՝ նման օրակարգն, ըստ նրա, կարող է Արցախի ճակատագրի նկատմամբ համընդհանուր անհանգստությունը վերածել Երևանի հանդեպ անվստահության բուն Արցախում։ Եվ, համապատասխանաբար, Արցախի նկատմամբ արհամարհական վերաբերմունքի՝ քաղաքական պոռնկությունն ու քաղքենիությունը մարմնավորող քաղաքական շրջանակների կողմից։
Հայաստանի արտաքին քաղաքական հարցերի լուծմանն աջակցելու նոր խորհրդարանի ունակությունը, դիվանագետի կարծիքով, ամենացավոտ հարցերից մեկն է ։ Հատկապես՝ հաշվի առնելով սեփական արտաքին քաղաքական գործունեության ուղղությունը կազմակերպելու կառավարության անկարողությունը։ Ընդ որում, նույնիսկ ԱԳՆ ղեկավարության բացակայությունը Մելիքյանը խնդրի ձեւական կողմ է համարում։ Մինչդեռ, դրա էությունը նոր ՝ հին իշխանության օրակարգի բովանդակության մեջ է, հայեցակարգի առկայության, Հայաստանի ՝ միջազգային հանրության, դաշնակիցների ու թշնամիների հետ փոխհարաբերությունների բովանդակության մեջ է։
Հայաստանի շուրջ ներկայիս աշխարհաքաղաքական իրավիճակը, դիվանագետի գնահատմամբ, բնութագրվում է երկու խնդիր հնարավորինս շտապ լուծելու Բաքվի փորձերով։ Ստեղծել անվտանգ ցամաքային կապ Նախիջևանի հետ և սեփական նախասիրություններին համապատասխան իրականացնել Հայաստանի հետ սահմանների սահմանազատում և սահմանորոշում։ Բաքվի նման մաքսիմալիստական նկրտումներին Երևանի արդյունավետ հակազդեցությունը Մելիքյանը կապում է սեփական, հայկական բանակցային քաղաքական-իրավական հարթակի մշակման անհրաժեշտության հետ ։ Այդ հարթակը, ըստ դիվանագետի, պետք է ներառի որոշակի մոտեցումներ արցախյան հիմնախնդրի կարգավորման բանակցային գործընթացում ։ Ընդ որում, հաշվի առնելով դրա խորացումը, աճն ու նոր առանձնահատկությունը անցյալ տարվա պատերազմի արդյունքում։ Այդ մոտեցումները պետք է հիմնարար բնույթ կրեն և ունենան գերազանց իրավական և քաղաքական հիմք, ռազմական բնույթի որոշ ասպեկտներ ։
"Առայժմ այս ամենը ես չեմ տեսնում, ինչպես չեմ տեսնում նաեւ մասնագետներ, որոնք կարող են իրականացնել այդ բարդ աշխատանքը։ Ես նաև չգիտեմ, թե արդյոք այսօրվա հայաստանյան քաղաքական էլիտան գիտակցում է նման հարթակի մշակման, ինչպես նաև դրա համար անհրաժեշտ կադրային, մասնագիտացված ռեսուրսի ձևավորման անհրաժեշտությունը։ Կարծում եմ, որ պետք է գիտակցի ՝ հաշվի առնելով Թուրքիայի և Ադրբեջանի մշակած հետևողական քաղաքականությանը հետագա դիմակայության անհնարինությունը ինքնաբուխ հայտարարությունների և զգացումներով լի կոչերի միջոցով", - ամփոփել է դիվանագետը։