Հինգշաբթի, 17 Հունիսի 2021 14:17

Արմինֆո. Լսելով նախընտրական քարոզարշավի բովանդակությունը՝ ինչպես իշխանության, այնպես էլ նրա հիմնական ընդդիմախոսների, սպառնալիքները, հայհոյանքներն ու աղաղակները, անկեղծորեն անհարմար ես զգում մեր ողջ հասարակության, մասնավորապես, երիտասարդ սերնդի, ուսանողների առջեւ, որոնց համար մենք՝ մեր սերունդը, պետք է օրինակ ծառայենք։ ԱրմԻնֆո-ին այդպիսի կարծիք է հայտնել "Հայ ազգային կոնգրես" կուսակցության փոխնախագահ Արամ Մանուկյանը։

 

"Այս լույսի ներքո, ի հակակշիռ այդ բոլոր մուրճերի եւ տնային կենցաղի այլ սարսափազդու առարկաների, որոնք թափահարում են մեր մրցակիցները, մենք դնում ենք խոսքը: Խոսքը՝ հիմնված քաղաքական իմաստության եւ քաղաքական փորձի վրա: Բազմամյա փորձի վրա: Գիտեք, չէ որ խոսքը նույնպես շատ լավ զենք է։ Հատկապես, երբ այն հղում է անում ոչ թե բնազդներին, այլ բանականությանն ու տրամաբանությանը: Հատկապես, երբ խոսքով փորձում ենք կանխել հայոց պետականության ոչնչացումը", - ընդգծել է նա։

 

Այս լույսի ներքո՝ քաղաքական գործիչը գալիք ընտրությունները որակել է որպես շատ բարդ և կարևոր քաղաքական գործընթաց, որի միջոցով հնարավոր կլինի փրկել պետականությունն ու երկիրը: Մանուկյանը հատուկ ընդգծել է, որ ընտրությունների խաղագումարին հենց այդ արժեքներն են դրված։ Վերջինը նա պայմանավորում է ինչպես "նախկինների" իշխանության գալու հեռանկարով, այնպես էլ ներկայիս վարչակազմի պահպանմամբ։ "Մենք՝ բոլորս, պետք է հասկանանք, որ բոլոր այդ մարդիկ երկիրը կառավարելու են մոտավորապես այնպես, ինչպես նրանք այսօր մեր աչքի առաջ նախընտրական քարոզարշավ են անցկացնում", - նկատել է նա:

 

Քաղաքական գործիչն այսօր, ինչպես երբեք, տեսնում է հոդաբաշխ, տրամաբանորեն հիմնավորված եւ հաշվարկված խոսքի հնչեցման անհրաժեշտություն: Մանուկյանը համոզված է, որ առաջիկա ընտրություններում ՀԱԿ-ի հաջողության գրավականը կդառնա հենց խոսքը, քանի որ հայ ընտրազանգվածի էական մասը, կիսելով իր վերը նշած մտահոգությունները, պատրաստ է լսել զուսպ, ռացիոնալ եւ ստուգված խոսք՝ հայհոյանքի, բղավոցների եւ սպառնալիքների փոխարեն: Եվ աստիճանաբար անտարբերությունից դեպի ռացիոնալիզմ հակվող նման մարդկանց թիվը, ըստ նրա անձնական դիտարկումների, անընդհատ աճում է։

 

"Առաջին նախագահ Լևոն Տեր-Պետրոսյանի ելույթների դիտումների թիվն աճում է երկրաչափական պրոգրեսիայով։ Եվ, կարծում եմ, որ դա անխուսափելիորեն կանդրադառնա մեր վարկանիշի և ընտրությունների հեռանկարների վրա։ Կարծում եմ, որ ընտրությունների արդյունքում ոչ մի ուժ ի վիճակի չի լինի միանձնյա կառավարություն ձևավորել։ Հնարավոր է,  նույնիսկ, կոալիցիա չստեղծվի։ Եվ ահա այստեղ, մեր կանխատեսումների իրականացման դեպքում, արդիականացվում է մեր առաջարկը, որի էությունն այն է, որ վարչապետ ընտրվի մի մարդ, ով կներկայացնի բոլորին ՝ ոչ մեկին կոնկրետ չներկայացնելով ։ Խոսքը վերաբերում է անկուսակցական տեխնոկրատի, որը կարող է բանակցություններ վարել եւ զարգացնել երկիրը ՝ չնայելով ոչ ոքի", - ընդգծել է նա։

Այս ամենը, ըստ Մանուկյանի, թույլ կտա մարել ներքաղաքական հրդեհը, հանդարտեցնել կրքերը և երկրում իրավիճակը բերել ներքաղաքական հավասարակշռության։ Դա կմեծացնի այս փուլում երկրի արտաքին քաղաքական հիմնական խնդիրների լուծմանն ուղղված հաջող բանակցությունների հնարավորությունները։ Եվ արդեն մեկ-երկու տարի հետո սկզբունքորեն նոր իրադրությունում, արդեն որոշակի իմունիտետով օժտված երկրում հնարավոր կլինի նոր ընտրությունների անցկացում ՝ համապատասխան արդյունքներով և նոր լեգիտիմ իշխանության ձևավորման հնարավորությամբ", - ամփոփել է քաղաքական գործիչը։