Արմինֆո.Հայ հասարակությունը համաձայնություն չի տվել երկրի կառավարման ոճին, որն այսօր մենք տեսնում ենք որպես "թավշյա" հեղափոխության արդյունք։ ԱրմԻնֆո-ին այդպիսի կարծիք է հայտնել իրավապաշտպան Արթուր Սաքունցը։
"Սահմանազատման-սահմանագծման պայմանագրի նախագիծը, ցանկացած պայմանագիր, ցանկացած համաձայնագիր անմիջական առնչություն ունի Հայաստանի քաղաքացու անվտանգության հետ։ Այս լույսի ներքո՝ այդ անվտանգությանը վերաբերող գործընթացների մասին տեղեկատվություն ստանալը ոչ թե այն մարմիններից, որոնց պարտականությունն է ապահովել այդ նույն անվտանգությունը, չափազանց անտրամաբանական ու տարօրինակ է թվում։ Հենց այդ պատճառով այդ նախագծի մասին տեղեկատվությունը պետք է տրամադրվեր հենց նման որոշումներ կայացնող մարդկանց, կառույցների կողմից, այլ ոչ թե՝ կողմնակի մարդկանց կողմից", - ընդգծել է նա։
Մայիսի 20-ին Հայաստանի նախկին նախագահ Սերժ Սարգսյանի փեսա Միքայել Մինասյանը հայտարարել էր, որ երկրի վարչապետ Նիկոլ Փաշինյանը համաձայնել է սահմանազատման նոր սկզբունքներին եւ տարածքային զիջումներին ՝ Հայաստանի տարածքից ադրբեջանական զորքերի դուրսբերման դիմաց: Ի հավաստումն ՝ նա համացանցում զետեղել էր եռակողմ փաստաթուղթ, որը, նրա պնդումների համաձայն, գտնվում է համաձայնեցման փուլում։ Փաշինյանը նույն օրը խորհրդարանում ունեցած ելույթի ժամանակ հաստատել էր համացանցում հրապարակված փաստաթղթի իսկությունը, հայտարարելով, որ պատրաստվում է այն ստորագրել, "քանի որ համաձայնագիրն ամբողջությամբ համապատասխանում է Հայաստանի շահերին":
Ըստ իրավապաշտպանի' Հայաստանի ազգային անվտանգության եւ նրա քաղաքացիների ավտանգության տեսանկյունից կարևորագույն որոշումներն այսօր կայացվում են համընդհանուր լռության, անուշադրության և մոռացության մթնոլորտում: Իսկ կողմնակալ, քաղաքականացված կարծիքներից զատ այլ կարծիքներ, մասնավորապես, հասարակության կարծիքը, պարզապես, չեն հնչեցվում։ Եվ դա այն պայմաններում, երբ հենց հասարակության կարծիքը, հասարակական կազմակերպությունների կարծիքը, Հայաստանի քաղաքացիների կարծիքը, այսպես թե այնպես, նման կարևորության որոշումներ կայացնելիս պետք է ունենա և ունի որոշիչ նշանակություն։
"Մենք՝ բոլորս, ի սկզբանե, դեռևս 2018 թվականին համաձայնություն չենք տվել երկրի կառավարման նման գործելաոճին։ Համապատասխանաբար, մենք չենք կարող այսօր կրկին վերադառնալ երկարամյա անգիր արած մանտրաներին՝ "որոշեք ինչպես ուզում եք","միևնույն է, ամեն ինչ իրենց ձեռքում է"։ Առավել ևս՝ այն պայմաններում, երբ այս ամենը վերաբերում է արդեն անմիջականորեն մեր սեփական անվտանգությանը։ Եվ այստեղ ես կցանկանայի հատուկ ընդգծել և հիշեցնել, որ "թավշյա" հեղափոխությունը շատ բանով հենց Նիկոլ Փաշինյանի նախորդների բազմամյա ոչ թափանցիկ, ոչ հաշվետու կառավարման օրինաչափ արդյունք էր", - ընդգծել է նա։
Ըստ Սաքունցի ՝ հանրությանը անհրաժեշտ տեղեկատվության ողջ ծավալը ժամանակին տրամադրելու բացակայության ֆոնին՝ ողջ վերը թվարկվածից բխում է գլխավոր խնդիրը. երկրի արդյունավետ հակաճգնաժամային կառավարումն ապահովելու գործող իշխանության անկարողությունը։ Իրավապաշտպանը ցավով է նշել, որ կառավարության կողմից ընդունված որոշումների նկատմամբ քաղաքացիների վստահության ապահովման համար անհրաժեշտ ողջ գործիքակազմը կիրառելու ցանկության բացակայության արդյունքում այսօր իշխանությունը զրկված է այդ վստահությունից: Ավելին, սահմանների սահմանագծման մասին պայմանագրի նախագծի վերաբերյալ նույն տեղեկատվության հայտնվելը վստահության չներշնչող այլ աղբյուրներից միայն բարձրացնում է նման իրավիճակում որոշումներ կայացնողների նկատմամբ հասարակական անվստահության աստիճանը։