Ուրբաթ, 14 Մայիսի 2021 12:28

Արմինֆո. Մենք տեսնում ենք, որ Ֆրանսիան Հայաստանի ղեկավարությանը քաղաքական մանեւրելու տարածություն է տրամադրում՝ Սյունիքի մարզի շուրջ խնդիրը լուծելու համար։ Սակայն մենք տեսնում ենք նաև, որ Երևանը չի ցանկանում օգտվել այդ հնարավորություններից։ ԱրմԻնֆո-ին այդպիսի կարծիք է հայտնել անկախ վերլուծաբան Սարո Սարոյանը։

 

Մայիսի 13-ին ՀՀ վարչապետ Նիկոլ Փաշինյանի հետ հեռախոսազրույցում Ֆրանսիայի նախագահ Էմանուել Մակրոնը, հնչեցնելով Ֆրանսիայի հավատարմությունը Հայաստանի տարածքային ամբողջականության պահպանմանը, ընդգծել է Հայաստանի տարածքից ադրբեջանական զորքերի անհապաղ դուրսբերման անհրաժեշտությունը: "Ֆրանսիան ցանկանում է, որ ՄԱԿ - ի Անվտանգության խորհրդի միջոցով գտնվի տարածաշրջանում ստեղծված լարվածության լուծումը՝ տարածաշրջանային կայունության եւ անվտանգության վերականգնման համար", - նշվում է Ելիսեյան պալատի հայտարարության մեջ:

 

"Մակրոնի մտահոգությունների եւ առաջարկությունների հիմքում Թուրքիայի հետ Ռուսաստանի մերձեցման միանգամայն ակնհայտ հերթական շրջադարձն է։ Ամեն կասկածից վեր է, որ առանց Մոսկվայի համաձայնության Ալիեւը չէր համարձակվի Սյունիք ներխուժել։ Այլ հարց է, թե ինչ ձևով է տրվել այդ համաձայնությունը։ Բայց, ամեն դեպքում, դա, իր հերթին, նշանակում է, որ այդ ամբողջ գործողությունը համաձայնեցված է եղել նաև Էրդողանի հետ", - ընդգծել է նա։

 

Նման աշխարհաքաղաքական վերափոխումները, Սարոյանի գնահատմամբ, իրավիճակը դուրս բերեցին միանգամայն այլ մակարդակի։ Եվ հարցը ՄԱԿ-ի Անվտանգության խորհրդի քննարկմանը ներկայացնելու Ֆրանսիայի առաջարկը խոսում է Փարիզի կողմից այդ իրավիճակի լրջության ըմբռնման մասին ։ Ըստ վերլուծաբանի, փորձելով այդպիսով հավասարակշռել տեղի ունեցողը, Արևմուտքը փորձում է ստանալ իրավական և քաղաքական հիմնավորումներ, այլ կերպ ասած՝ լծակներ այս իրավիճակում սեփական գործողությունների համար։

 

Այդուհանդերձ, Ֆրանսիայի նախագահի հետ հեռախոսազրույցի հրապարակված բովանդակությունից, ըստ վերլուծաբանի, Ֆրանսիայի առաջարկներին Փաշինյանի համաձայնություն չի երևում։ Ինչը հերթական անգամ հաստատում է Կրեմլի կողմից Հայաստանի վարչապետի գործողությունների կաշկանդվածության փաստը։ Բայց Մակրոնի առաջարկին Փաշինյանի համաձայնության բացակայությունը հերթական անգամ ցույց է տալիս, որ շատ ծանր իրավիճակը, որում հայտնվել է Հայաստանը, նրա սեփական ղեկավարության բազմամյա քաղաքականության օրինաչափ արդյունքն է։

 

"Այս բոլոր տարիների ընթացքում Հայաստանը չի շեղվել արտաքին քաղաքականության ռուսաստանամետ գծից՝ սեփական անվտանգության ապահովման գործում ապավինելով բացառախես Մոսկվային։ Եվ այն, որ  այսօր, ինչպես տեսնում ենք, անվտանգության այդ երաշխիքները, գործնականում, չկան, Երևանի այդ նույն քաղաքականության օրինաչափ արդյունքն է։ Որքան էլ դա պարադոքսալ թվա առաջին հայացքից", - ընդգծել է նա։

 

Մեկնաբանելով ստեղծված իրավիճակից դուրս գալու Հայաստանի հնարավորությունները՝ Սարոյանը նշել է, որ ցանկացած ճանապարհ, առաջին հերթին, կախված է երկրի ղեկավարությունից: Այս լույսի ներքո՝ նա ընդգծել է, որ դրա համար անհրաժեշտ պետական մեխանիզմներն այսօր կենտրոնացված են ոչ կոմպետենտ, անողնաշար և անզոր մարդկանց ձեռքում։ Եվ երկիրը գտնվում է այնպիսի քաղաքական գործիչների բացակայության պայմաններում, որոնք ի զորու են հասնել սկզբունքորեն նոր լուծումների։

 

"Դժբախտաբար, ստիպված ենք արձանագրել, որ մեր պետությունը կառավարող ինստիտուտների եւ անհատների առումով մենք հասել ենք հատակին։ Սև Լճի շուրջ ստեղծված իրավիճակը հենց այդ մասին է խոսում։ Այս լուրջ իրավիճակի հաղթահարումը կամային լուծումներ է պահանջում։ Իսկ կամային որոշումները պահանջում են կամային քաղաքական գործիչներ, որոնք, ամեն ինչից զատ, օժտված են  գիտելիքներով ու փորձով՝ նման լուրջ քայլեր ձեռնարկելու համար։ Այդ մարդիկ համակված են վախով և լուրջ փոփոխությունների ուղղությամբ ինքնուրույն որոշումներ կայացնել չեն կարող և չեն ուզում", - ամփոփել է վերլուծաբանը։

 

Մայիսի 12-ի առավոտյան Ադրբեջանի զինված ուժերը սահմանը հատել են Սև լճի շրջանում՝ խորանալով Հայաստանի տարածք մինչև 3,5 կմ ՝ լճի նկատմամբ վերահսկողություն հաստատելու նպատակով: Նույն օրը երեկոյան Հայաստանի անվտանգության խորհրդի նիստում վարչապետի պաշտոնակատար Նիկոլ Փաշինյանը Սյունիքի մարզում տեղի ունեցածը որակել է  դիվերսիոն անցում: Նա նաեւ այս իրավիճակը գնահատել է որպես ճգնաժամային իրավիճակին առնվազն մոտ։ Նախօրեին Երևանը պաշտոնապես դիմել է ՀԱՊԿ-ի օգնությանը։