Նիկոլ Փաշինյան: Հայաստանում, ցավոք, լիարժեք կայացած ընդամենը մեկ ինտիտուտ է եղել՝ համակարգված կոռուպցիան, իսկ Ամուլսարի հանքի բացման հավանականությունը մեծ է

Արմինֆո. Հայաստանում, ցավոք, մի կայացած ինստիտուտ է եղել, լիարժեք կայացած ընդամենը մեկ ինտիտուտ է եղել, և այդ ինստիտուտը եղել է կոռուպցիան: Մենք եկել ենք հեղափոխությունից հետո, միակ կայացած ինտիտուտը՝ համակարգված կոռուպցիան, ոչնչացրել ենք Հայաստանում: Այս մասին Նվեր Մնացականյանին տված հարցազրույցում նշել է վարչապետ Նիկոլ Փաշինյանը:

Պատասխանելով այն հարցին, թե ինչու է երկրում արմատական բարեփոխումների գործընթացն այդքան ձգձգվում՝ Փաշինյանն ընդգծել է, որ 2018-ին իշխանության գալով նոր կառավարությունը շիվարած է մնացել, որովհետև Հայաստանում առանց կոռուպցիայի ոչ մի բան չի աշխատել: Ու պարզվել է, որ այլ ինտիտուտներն այն աստիճանի կայացվածություն չունեն, որ գոնե առանց կոռուպցիայի կարողանան աշխատել: Այդպես է եղել, ինչպես նշել է Փաշինյանը, գրեթե բոլոր ոլորտներում, եւ այդ պատճառով էլ ստիպված են եղել երբեմն զգուշությամբ մոտենալ այս կամ այն հարցերին, որովհետև միշտ էլ հավանականություն կա, որ հոնքը սարքելու փոխարեն աչքն էլ կհանվի։ <Օրինակ, տեսեք, վարչապետ ընտրվելուց հետո, ես ի՞նչպիսի քայլեր եմ ձեռնարկել բանակի և զինված ուժերի նկատմամբ: Վարչապետ եմ դարձել հեղափոխությամբ: Եվ ամենապահպանողական քաղաքականությունը վարել եմ Զինված ուժերի ոլորտում: Պաշտպանության նախարար եմ նշանակել մի մարդու, ով մերժվածի իշխանության օրոք երկար տարիներ եղել է Պաշտպանության նախարարի առաջին տեղակալ և միակ մարդն է եղել, որ 2018թ. մերժվածի կառավարությունում ունեցել է նախարարի կարգավիճակ ու իմ կառավարությունում նույնպես շարունակել է ունենալ նախարարի կարգավիճակ>,- ասել է Փաշինյանը։

Շարունակելով այս միտքը այն տեսանկյունից, որ ՀՀ երրորդ նախագահ Սերժ Սարգսյանը նրան մեղադրել է սպառազինության գնումների մշակված և ընդունված պլանին հետևելուց հրաժարվելու մեջ, ինչը 44-օրյա պատերազմում պարտվելու պատճառներից մեկն է՝ Փաշինյանը <մերժվածի> այս կարծիքը որակել է՝ որպես իրականությանը չհամապատասխանող։(Փաշինյանն իր հարցազրույցում Սարգսյանին բացառապես <մերժված>  էր անվանում, հավանաբար այն բանից հետո, երբ Սարգսյանը նախընտրեց նրան անվանել բացառապես <կապիտուլյանտ> - խմբ.)։ Վարչապետի խոսքով՝ սպառազինության և տեխնիկայի գնման պլանի մեջ ոչ մի փոփոխություն տեղի չի ունեցել: <2018թ. դրությամբ եղել են ահռելի մեծ գումարների պայմանագրեր, որոնք իրականացված չեն եղել: Եվ եթե մենք բոլորին ձերբակալեինք, այդ տասնյակ միլիարդների ճակատագիրը կմնար անհայտ: Մենք խնդիր ենք դրել, պարտադրել, որ մատակարարումներն իրականացվեն: Եվ երկրորդը, եթե կա զենքի մատակարարման վատ խողովակ, այդ զենքի մատակարարման վատ խողովակը չի կարելի փակել, քանի դեռ դու չունես մատակարարման թեկուզ մի փոքր ավելի կամ թեկուզ նույնպիսի վատ խողովակ, կամ մի վատ խողովակը փոխարինել մի այլ վատ խողովակով: Իսկ ի՞նչ է տեղի ունենալու այդ ժամանակաշրջանում: Որովհետև այդպես չէ, որ միանգամից, մի ինչ-որ ժամանակ դատարկ է մնալու, իսկ ո՞վ է երաշխավոր, որ այդ դատարկության շրջանում չէ, որ սկսվելու է պատերազմը>,- ասել է նա։ Եվ, այնուամենայնիվ, ինչպես ընդգծել է վարչապետը, բանակը, որ մենք ունեցել ենք 2020թ., դա նույն բանակն է, որ մենք ունեցել ենք 2018թ., այն տարբերությամբ, որ այստեղ բարձրացվել են սպայական և շարքային կազմերի աշխատավարձերը, որ ռազմական ծախսերն աճել են 20 և ավելի տոկոսով:< Մի տարում ռազմական ծախսերը 20 և ավելի տոկոսով աճել են: Եվ մենք լուծել ենք բազմաթիվ հարցեր՝ սկսած կենցաղայինից, կներեք արտահայտությանս, վարտիքից սկսած մինչև սնունդ, սպառազինություն և այդպես շարունակ>,- ասել է նա։

Անդրադառնալով բարեփոխումների թեմային ՝ Փաշինյանն ընդգծել է, որ դրանք պետք է լինեն հստակ, երկարաժամկետ և լուրջ, ուստի չի կարելի շտապել դրանց հետ, քանի որ դա կարող է ունենալ, ընդհակառակը, բացասական հետևանքներ, առավել ևս այն պայմաններում, երբ չեզոքացվում է անցյալի գլխավոր շարժիչ ուժը ՝ համակարգային կոռուպցիան ։ Որպես բարեփոխումների դրական օրինակ ՝ Փաշինյանը բերել է երկրում մենաշնորհների դեմ պայքարը։ Այն շուկաները, որտեղ կողքից որևէ մեկը չէր կարող մտնել, այսօր ազատորեն մարդիկ ներմուծում են ինչ ուզում են, արտահանում են ինչ ուզում են։

Խոսելով երկրի տնտեսական վիճակի մասին (Հայաստանի ՀՆԱ - ն 2020թ.արդյունքներով 7,6%-ով անկում է ապրել․-խմբ)՝ վարչապետը նշել է, որ նման իրավիճակը կապված է ոչ միայն պատերազմի, այլեւ կորոնավիրուսային համաճարակի պատճառով երկրում ստեղծված ծանր իրավիճակի հետ: Նա կարծում է, որ արագ տարածվող վիրուսի պայմաններում դժվար էր անցյալ տարի ինչ-որ բան կանխատեսել, սակայն, այնուամենայնիվ, կառավարությունը վատ չէր կարողանում լուծել խնդիրը։ < Մենք այդ ժամանակ ասում էինք, որ մեր կանխատեսումներով՝ բոլոր երկրները գալու են նույն իրավիճակի առաջ կանգնեն: Եվ այն երկրները, որոնց օրինակը մեր աչքն էին մտցնում՝ այսօր կորոնավիորսի համավարակի հետ կապված աղետալի վիճակում են ու ոչ մեկ չի հիշում դրա մասին, ոչ մեկ չի հիշում՝ ինչ էինք իրենց ասում 2020 թ.-ի հուլիսին, օգոստոսին և այլն և այդպես շարունակ>,- ասել է Փաշինյանը։

Փաշինյանը ընդդիմախոսներին հիշեցրել է, որ չնայած 2018 թվականին երկրում տեղի ունեցած <հեղափոխական իրադարձություններին>՝ տնտեսական աճը չի դադարել, իսկ 2019 թվականի արդյունքներով Հայաստանը վերջին 10 տարիների ընթացքում աննախադեպ ՀՆԱ աճ է ստացել (7.6% - խմբ.):

Տնտեսության հետագա զարգացման կարևորության տեսանկյունից Փաշինյանն ընդգծել է, որ իր կարծիքը խոշոր ներդրումային նախագծի ՝ Ամուլսարի ոսկու հանքավայրի գործարկման հնարավորությունների մասին մնում է անփոփոխ։ < Ամուլսարի հետ կապված շատ կարևոր էի համարում անվտանգային կոմպոնենտը, ասելով, որ տեսեք՝ պատերազմական իրավիճակի մեջ ենք և երբ պատերազմ սկսվի, տուրիստների հոսքը չի շարունակվելու մեր երկիր: Այդ ժամանակ մենք արժութային խնդիրների առաջ կարող ենք կանգնել: Եվ այդ իրավիճակում կոնկրետ հանքարդյունաբերությունն է, որ երկրի համար երաշխավորում է վալյուտային հոսքեր: Ժամանակը դա ցույց տվեց: Բայց մյուս կողմից կարող եմ արձանագրել, որ մենք նաև կարողացանք պատշաճ կառավարել ֆինանսական շուկան և արդյունքում հունվարին եվրոպարտատոմսերի թողարկում ունեցանք, որն ամենահաջողված թողարկումն էր Հայաստանի Հանրապետության պատմության մեջ>,- ասել է Փաշինյանը՝ կարծիք հայտնելով, որ Ամուլսարի հանքի բացման հավանականությունը մեծ է։