Հայկական գրանցմամբ առևանգված օդանավում ուղևորներ չեն եղել

Արմինֆո. Հայաստանի քաղավիացիայի կոմիտեն, ըստ էության, հաստատում է հայկական  գրանցմամբ Բոինգ-737 օդանավի առևանգման փաստը:

Ավելի վաղ վարչապետի նախկին խորհրդական Հակոբ Ճաղարյանը Facebook-ի իր էջում գրել էր. <Փետրվարի 21-ին ՀՀ քաղաքացիական Ավիացիայի Կոմիտեն (ՔԱԿ) հեռագիր է ստացել Միացյալ Արաբական Էմիրությունների  (Աբու Դաբի) Քաղաացիական Ավիացիայի Գլխավոր Վարչության կողմից (GDCA), հայկական  գրանցմամբ, EK-FAA համարանիշով Բոինգ-737 օդանավի առևանգման մասին:  Օդանավը թռիչք է կատարել Էստոնական Տալլինից, և, ըստ պլանի պետք է վայրէջք կաարեր Երևանում: Բայց դրա փոխարեն  օդում որոշում է կայացվել գնալ Արաբական էմիրաթներ տեխսպասարկման: Եվ «տեխնիկական անսարքության պատճառով» վայրէջք է կատարել Թեհրանում>։

Մինչդեռ, ըստ ՀՀ քաղավիացիայի կոմիտեի հաղորդագրության, նշված օդանավում ուղևորներ չեն եղել, իսկ օդաչուներն եղել են օտարերկրյա քաղաքացիներ: <Թռիչքը կրել է տեխնիկական բնույթ, վայրէջքի մասին տեղեկատվությունը քննության փուլում է: Չարտոնված թռիչքուղու և չարտոնված վայրէջքի վերաբերյալ Կոմիտեում ընթանում է քննություն: Ելնելով քննության շահերից՝ Կոմիտեն կտեղեկացնի վերջնական արդյունքների մասին, քննության ավարտից հետո>,- նշվում է ՔԱԿ հաղորդագրության մեջ։

Հետաքրքիր է, որ ավելի վաղ գերատեսչությունը հայտնել էր, առևանգման փաստի մասին Կոմիտեն պաշտոնապես հաստատված տեղեկատվություն չի ստացել համապատասխան մարմիններից:  Միաժամանակ Կոմիտեն տեղյակ է օդանավի գտնվելու վայրի մասին և ներկայումս սերտ համագործակցում է առնչվող պետությունների ավիացիոն իշխանությունների հետ: