Արմինֆո. Հաշվի առնելով Մարդու իրավունքների պաշտպանի աշխատակազմ հասցեագրված մի շարք ահազանգերը, ինչպես նաև դիտարկումների արդյունքները՝ Պաշտպանի հանձնարարությամբ արագ արձագանքման խմբեր են մեկնել Ոստիկանության բաժիններ։
«Այցերի ընթացքում տեղի կունենան առանձնազրույցներ բերման ենթարկված քաղաքացիների հետ, կուսումնասիրվեն նրանց բերման ենթարկելու հիմքերն ու իրավունքների ապահովման վիճակը, ինչպես նաև այդ առնչությամբ իրավապահ մարմինների կազմած փաստաթղթերը։ Մարդու իրավունքների պաշտպանի աշխատակազմը շարունակում է իրականացնել տեղի ունեցող ակցիաների մշտադիտարկում», - ասվում է ՄԻՊ գրասենյակի հաղորդագրությունում:
Ավելի վաղ ՀՀ մարդու իրավունքների պաշտպան Արման Թաթոյանը հանդես էր եկել համերաշխության եւ համախմբվածության կոչով, որում ասվում է. ««Սիրելի՛ հայրենակիցներ, մեր երկրի համար պատասխանատու այս օրերին բոլորիս առավել քան անհրաժեշտ է համախմբվածություն և համերաշխություն։ Պետական մարմիններից յուրաքանչյուրն իր իրավասությանը համապատասխան պարտավոր է սեփական գործողութուններում ու երկրում երաշխավորել իրավունքի գերակայությունը, ապահովել մարդու իրավունքների բարձր պաշտպանությունը: Երկրի առջև ծառացած խնդիրների լուծման հրամայականը յուրաքանչյուրիցս պահանջում է զգոնություն ու առավել մեծ ուշադրություն մեր խոսքի ու վարքագծի հանդեպ՝ հանուն մեր երկրում համերաշխության ու խաղաղության մթնոլորտի ապահովման։ Այս օրերին կարևոր դեր ունեն հանրային ճանաչում ունեցող անձանց խոսքն ու պահվածքը՝ ծառայելով որպես համախմբվածության ու համերաշխության օրինակ: Անկախ քաղաքական կամ որևէ այլ տեսակի հայացքներից՝ չպետք է թույլ տալ, պետք է ուղղակի բացառել լարվածության տանող որևէ տեսակի զարգացում կամ դեպք:
Մարդու իրավունքների պաշտպանի աշխատակազմն աշխատում է ռեսուրսների ու իրավական կարգավիճակի առավելագույն հնարավորություններով՝ արտակարգ գրաֆիկով: Պաշտպանին օրենքով վերապահված լիազորությունների սահմաններում կձեռնարկվեն բոլոր միջոցները մարդու իրավունքների պաշտպանության նպատակով»:
Նշենք, որ այսօր 12: 00-ին լրացել է վերջնագրի ժամկետը, որը ընդդիմությունը տվել էր գործող վարչապետ Նիկոլ Փաշինյանին, որպեսզի նա ինքնակամ եւ անարյուն հանձնի իշխանությունը եւ հրաժարական տա: Ընդդիմադիր ուժերը ներկայացրել են ՀՀ միասնական վարչապետի թեկնածու՝ ի դեմս Վազգեն Մանուկյանի, որը կզբաղեցնի Փաշինյանի տեղը, կձևավորի ժամանակավոր կառավարություն, կզբաղվի նոյեմբերի 9-ին Լեռնային Ղարաբաղի շուրջ պատերազմում կապիտուլյացիայի մասին տխրահռչակ փաստաթղթի ստորագրումից հետո ստեղծված ճգնաժամից երկրի դուրս բերմամբ։ Մանուկյանը նաև պարտավորվում է մեկ տարվա ընթացքում կազմակերպել խորհրդարանական ընտրություններ, որոնց ինքն ու իր թիմը չեն մասնակցի։
Եվ քանի որ վարչապետը չի պատրաստվում հրաժարական տալ, ընդդիմությունն անհնազանդության ակցիաներ է անցկացնում ՝ Երեւանում եւ մարզերում փողոցներ փակելու տեսքով։ Ժամանակավորապես արգելափակվել է մետրոպոլիտենի գործունեությունը: Ոստիկանությունն արդեն բերման է ենթարկել 34 մարդու, որոնց թվում է նաև ՀՅԴ ներկայացուցիչ Գեղամ Մանուկյանը։