Վերլուծաբան. Ֆրանսիայի Սենատի բանաձեւը թուրքական էքսպանսիայի զսպմանն ուղղված քայլ է

Արմինֆո.Նախօրեին Ֆրանսիայի Սենատի ընդունած բանաձևը քայլ է թուրքական էքսպանսիան զսպելու ուղղությամբ, ընդ որում՝ ոչ միայն Հարավային Կովկասում։ ԱրմԻնֆո-ին այդպիսի կարծիք է հայտնել անկախ վերլուծաբան Սարո Սարոյանը։

Նոյեմբերի 25-ին Ֆրանսիայի Սենատը ձայների բացարձակ մեծամասնությամբ՝ 305 կողմ, 1 Դեմ, բանաձև է ընդունել՝ կոչ անելով երկրի կառավարությանը ճանաչել Արցախի անկախությունը։ Բանաձևը նաև դատապարտում է Ադրբեջանի ռազմական ագրեսիան, որն իրականացվել է Թուրքիայի իշխանությունների և օտարերկրյա վարձկանների աջակցությամբ, ինչպես նաև պահանջում է անհապաղ հետ քաշել ադրբեջանական զինուժն ու նրանց աջակցող կազմավորումները սեպտեմբերի 27-ին ռազմական գործողությունների սկսվելուց հետո գրավված տարածքներից:

"Նոյեմբերի 9-ի եռակողմ հայտարարության մեջ ձևակերպված Արցախում 44-օրյա պատերազմի արդյունքները ցույց տվեցին Թուրքիայի էքսպանսիոն քաղաքականությանը դիմակայելու Ռուսաստանի անկարողությունը։ Էրդողանական Թուրքիան ներթափանցել է մինչ այդ ռուսական "վոտչինա" համարվող տարածաշրջան։ Նման իրավիճակը, բնականաբար, լուրջ մտահոգություն է առաջացրել եվրոպական երկրներում և, ընդհանրապես, Արևմուտքում։ Ասել է թե՝ Թուրքիայի զսպման հարցում շահագրգռված ուժերի բոլոր կենտրոններում", - ընդգծել է նա։

44-օրյա պատերազմի արդյունքները գնահատելով որպես աշխարհաքաղաքական հավասարակշռության հերթական խախտում, այս անգամ՝ Հարավային Կովկասում, Սարոյանը Ֆրանսիայի Սենատի բանաձևը դիտարկում է որպես այդ հավասարակշռության վերականգնմանն ուղղված քայլ։ Ավելին, վերլուծաբանը չի բացառում եվրոպական այլ երկրների կողմից նմանատիպ քայլերը, ինչպես նաև ԱՄՆ-ի կողմից որոշակի քայլեր, որը նույնպես մտահոգություն ունի թուրքական էքսպանսիոնիզմի առնչությամբ։

Այսպիսով՝ եվրոպական երկրների, այդ թվում՝ Ֆրանսիայի կողմից Արցախի անկախության ճանաչման գործընթացի հետագա առաջխաղացման հեռանկարը վերլուծաբանը պայմանավորում է այդ քայլերին Թուրքիայի պատասխանով։ Մասնավորապես, Կովկասում, իսկ ավելի հավանական է, Մերձավոր Արեւելքում, ներառյալ արեւելյան միջերկրածովյան տարածաշրջանը "հետ հանձնելու" Անկարայի հնարավորությամբ։ Այդ դեպքում, նրա կանխատեսմամբ, ճանաչման գործընթացը կդադարեցվի։

"Սակայն, հաշվարկելով նման սցենարի հավանականությունը, պետք է հաշվի առնել Թուրքիայի նախագահի անձնական գործոնը ։ Էրդողանն արդեն սովոր է հասնել դրված նպատակներին։ Նա սովոր է մշտական հաղթանակների, սովոր է պարտության բացակայության: Այս լույսի ներքո՝ մեծ է հավանականությունը, որ Անկարան ուղղակի չի ենթարկվի ճնշմանը և կշարունակի սեփական էքսպանսիոնիզմը։ Այդ դեպքում Ֆրանսիան եւ Եվրոպան ստիպված չեն լինի հաշտվել հավասարակշռության խախտման հետ, հաշտվել տարածաշրջանային նոր ստատուս քվոյի հետ", - ամփոփել է վերլուծաբանը։

Ֆրանսիայի Սենատի բանաձևը նաև կոչ է անում Ֆրանսիայի կառավարությանը լայնածավալ աջակցություն ցուցաբերել արցախցիներին, ինչպես նաև նախաձեռնել Արցախի խաղաղ բնակչության դեմ ռազմական հանցագործությունների հետաքննության միջազգային հանձնաժողով: Բանաձևը կոչ է անում Ֆրանսիայի կառավարությանը գործադրել բոլոր ջանքերը բանակցային գործընթացը վերսկսելու՝ 1994 թվականի սահմանների ապահովմամբ, ինչպես նաև ապահովել հայ բնակչության անվտանգությունն ու տեղահանված անձանց վերադարձի իրավունքը: