Իրանը շարունակում է ցուցադրել իր ուժային հնարավորությունները՝ Ղարաբաղում լարվածության ֆոնին

Արմինֆո. Իրանը շարունակում է ցուցադրել իր ուժային հնարավորությունները՝ Լեռնային Ղարաբաղի հակամարտության գոտում իրավիճակի սրման ֆոնին ։

Այսօր իրանական բանակի ռազմաօդային ուժերը սկսել են Modafe'an-e Aseman-e Velayat անվանմամբ զորավարժությունների հիմնական փուլը։ Զորավարժությունների ներկայացուցիչ, երկրորդ բրիգադի գեներալ Ֆարհադ Գուդարզին ասել է, որ երկօրյա վարժանքներն ուղղված են պրոքսի թշնամիներին հակազդելու ունակությունները մշակելուն ՝ ժամանակակից մեթոդների օգտագործմամբ, փոխանցում է ԻՌՆԱ - ն ։

Ընդ որում, նա տեղեկացրել է, որ զորավարժություններին մասնակցում են Սու-24 կործանիչներ եւ ՄիԳ-29, F-5, F-5, F-7 եւ F-14 կործանիչներ, որոնք արդեն հիմնանորոգվել են Իրանի ռազմաօդային ուժերի մասնագետների կողմից, ինչպես նաեւ տարբեր տեսակի անօդաչու թռչող սարքեր:

Բրիգադի գեներալը նաեւ հավելել է, որ Իրանը ձգտում է ապահովել կայուն անվտանգություն:

Հարկ է նաև նշել, որ բացի այդ Իրանը հանդես է եկել Ղարաբաղյան հակամարտության կարգավորման իր խաղաղ ծրագրով, որի առաջխաղացմամբ զբաղվում է ԻԻՀ նախագահի հատուկ ներկայացուցիչ, քաղաքական հարցերով արտաքին գործերի փոխնախարար Աբբաս Արաքչին։

Արաքչին ադրբեջանական ԶԼՄ-ներին հարցազրույցում եւս մեկ անգամ ընդգծել է, որ Ադրբեջանի եւ Հայաստանի միջեւ վեճը լուծելու Իրանի նախաձեռնությունը ենթադրում է տարածաշրջանի ազդեցիկ երկրների մասնակցություն: Նրա խոսքով, Լեռնային Ղարաբաղի տարածաշրջանում խաղաղության հաստատման Իրանի ծրագիրը հիմնված է ռեալիզմի, տարածաշրջանային մոտեցումների եւ տարածաշրջանի ազդեցիկ երկրների մասնակցության վրա: Արաքչին հավելել է, որ այդ ծրագրի նպատակն է դադարեցնել մարդկային և այլ կորուստները, և այն արգասաբեր կլինի, եթե բոլոր կողմերը բարի կամք դրսևորեն և կանխվի որոշակի արտատարածաշրջանային երկրների միջամտությունը այդ գործընթացին, որոնք փորձում են վնաս հասցնել տարածաշրջանային հարաբերություններին: