Բորիս Պոդոպրիգորա. Ղարաբաղին հատուկ կարգավիճակ տալու նախադրյալներ կան

Արմինֆո. Այժմ Ադրբեջանին աջակցում են միանգամից մի քանի խոշոր քաղաքական խաղացողներ։ Այսպես, Բաքվի կողմից բացահայտ կերպով հանդես է գալիս Թուրքիան, կան նաեւ Ադրբեջանի եւ Թել Ավիվի համագործակցության վկայություններ։ Այդ մասին հայտարարել է հայտնի կոնֆլիկտաբան և արևելագետ Բորիս Պոդոպրիգորան՝ Լեռնային Ղարաբաղի հակամարտության շուրջ ստեղծված իրավիճակի մասին "Պոլիտէքսպերտին" տված իր մեկնաբանության մեջ։

"Տեղեկատվությունն այն մասին, որ Ադրբեջանը ռազմատեխնիկական օգնություն է ստացել Իսրայելից, կիսապաշտոնական է, բայց վստահություն է առաջացնում։ Դա շատ բանի մասին է խոսում։ Ուրեմն, ԱՄՆ-ի կողմից եղել է թողտվություն։ Իմ պատկերացմամբ՝ Իսրայելը ոչ մեկին օգնություն չի ցուցաբերում, եթե ԱՄՆ - ն նման որոշմանը հավանություն չտա", - հայտարարել է քաղաքագետը։ Նրա խոսքով ՝ այս պահին Իսրայելը Ադրբեջանի համար զենքի գլխավոր մատակարարներից մեկն է։ Բաքվի բանակն իր զինանոցում ունի Atmos 2000 հրետանային կայանքներ, Spike հակատանկային հրթիռային համալիրներ, LAR-160 համազարկային կրակի ռեակտիվ համակարգեր, Aerostar անօդաչու թռչող սարքեր եւ զենքի այլ համակարգեր: Փոխարենը՝ Թել Ավիվը ստանում է նավթ եւ գազ։

Ըստ փորձագետի, դրանից բխում է հակամարտությունը տարածաշրջանային դարձնող հետեւյալ գործոնը. հակամարտությանը մասնակից բոլոր երկրների միջեւ խցկվել Է Իրանը, որը բոլոր ուժերով փորձում է չեզոքություն պահպանել' լարված հարաբերություններ ունենալով Թուրքիայի եւ Իսրայելի հետ:

Պոդոպրիգորան նշում է, որ Թեհրանն ավանդաբար նման քաղաքական շարժումները դիտարկում է որպես սադրանքներ իրանական ռեժիմի դեմ:

Բորիս Պոդոպրիգորան կարծում է, որ Ռուսաստանը Ղարաբաղին առնչվող պատմության մեջ պետք է հանդես գա որպես լուրջ քաղաքական ուժի մաս։ Նրա կարծիքով ՝ այդ վիճարկվող տարածքին պետք է տալ միջազգային կարգավիճակ ՝ որպես ժամանակավոր անկլավ։ Իսկ Մոսկվան և մյուս խոշոր համաշխարհային խաղացողները պետք է հանդես գան որպես նրա երաշխավորներ։ Այլ ելք, ըստ նրա, չկա։

"Կամ էլ սպասել, մինչեւ մարտական ավյունն ու  կողմերի սպառազինությունն այնքան կնվազի, որ արդեն պատերազմի մասին չեն մտածի։ Բայց ես վախենում եմ, որ սա այն դեպքը չէ, քանի որ Ադրբեջանի կողմից միանգամայն բացահայտ հանդես է գալիս Թուրքիան։ Սա է իրավիճակի ողջ բարդությունը։ Ես չեմ բացառում, որ գիտակցաբար մամլել են մի քանի գործոն. բելառուսական, մեր ներքին խնդիրները և ավելացրել Հարավային Կովկասի գործոնը։ Վախենում եմ, որ այն կարող է որեւէ ընդունելի լուծում չգտնել տեսանելի ապագայում", - կարծում է արեւելագետը։

Սակայն,  փորձագետը վստահ է, որ Ղարաբաղին հատուկ կարգավիճակ տալու նախադրյալներ կան։ Ռուսաստանի եւ Ֆրանսիայի նախագահներ Վլադիմիր Պուտինը եւ Էմանուել Մակրոնը լուրջ մտահոգություն են հայտնել հայկական եւ ադրբեջանական ուժերի միջեւ ղարաբաղյան հակամարտության շարունակվող սրման կապակցությամբ: Այդ հարցի շուրջ երկրների ղեկավարները կարծիքներ են փոխանակել հեռախոսազրույցի ընթացքում: Նրանք նաեւ հաստատել են իրենց կոչերը այդ տարածքում խաղաղություն վերադարձի  անհրաժեշտության մասին։