Ակադեմիկոս․ Ադրբեջանական բլիցկրիգի հերթական փորձի նախապատրաստմանը մասնակցել է Անկարան

Արմինֆո.Ադրբեջանական բլիցկրիգի հերթական փորձի նախապատրաստմանը ամենաուղղակի կերպով մասնակցել է Թուրքիան։ ԱրմԻնֆո-ին այդպիսի  կարծիք է հայտնել ԳԱԱ Արևելագիտության ինստիտուտի տնօրեն, ակադեմիկոս Ռուբեն Սաֆրաստյանը։

<Առաջին՝ անմիջապես աչքի ընկնող գործոնը, թուրք լրագրողների ուղիղ հեռարձակումն է մարտադաշտից Արցախի բնակավայրերի ադրբեջանական գնդակոծությունների առաջին իսկ րոպեներից։ Այսպիսով՝ հարկ է արձանագրել թուրքական ԶԼՄ-ների, առաջին հերթին՝ պետական, ադրբեջանական գրոհի մեկնարկին նախապատրաստման փաստը ։ Թուրք լրագրողները գիտեին, թե որտեղ եւ երբ են սկսվելու ռազմական գործողությունները>,- ընդգծել է նա ։

Սաֆրաստյանը նաեւ նշել է վերջին օրերին որոշ դիվանագիտական խողովակներով եւ ԶԼՄ - ների միջոցով տարածվող՝ Սիրիայից Ադրբեջան երեք հարյուր վարձկանների տեղափոխման մասին տեղեկությունների լիակատար համապատասխանությունը իրականությանը: Նրա գնահատականներով ՝ ահաբեկիչների փուլ առ փուլ տեղափոխումն Ադրբեջան ևս մատնանշում է Բաքվի գործողությունների համակարգումը Անկարայի հետ ։

<Եվ երրորդ գործոնը՝ Նախիջեւանում եւ Արցախի հարեւանությամբ գտնվող  Ադրբեջանի տարածքներում թուրք - ադրբեջանական համատեղ զորավարժությունների անցկացումից հետո թուրքական զրահատեխնիկայի, ԱԹՍ-ների, հրթիռների, հրետանու եւ նույնիսկ զինծառայողների մի մասը Թուրքիա չի վերադարձել ։ Դա նույպես վկայում է Ադրբեջանի ղեկավարության ընթացիկ ռազմական արկածախնդրությանը Թուրքիայի մասնակցության մասին>, - ամփոփել է Սաֆրաստյանը։